Shejire kitap jaryqqa shyqty

Kúni keshe Astanadaǵy Ulttyq kitaphananyń ádemi zalynda ózge kitaptardan tabıǵaty bólek kitaptyń tusaýkeseri boldy. Kitaptyń aty — «SAŃLAQ». Zaty asyl óner sporttyń shejiresi!

…Osydan jeti jylǵa taıaý ýaqyt buryn osy kıeli mekemede kezinde el aýyp ketken bir ýys qazaqtyń ulany Dáýren Baqytqajyuly «QYTAIDAǴY QAZAQ SPORTShYLARY» degen ktabynyń tusaýkeserin ótkizip edi. Sol joly kitaptyń tusaýyn kesip turyp, myna men: «Dáýrenjan, endi búkil álemdegi biregeı qazaq sportshylaryn jınap,kitap etip shyǵaramyn dep jatyrsyń. Jaratýshymyz sol kitaptyń tusaýkeserinde bolýǵa jazsyn!», — dep edim. Arman oryndaldy. Bul joly Dáýrentaıdyń «SAŃLAQ. Álem qazaqtarynyń úzdik sportshylary» atty kitabynyń tusaýy kesilip, oqyrmandaryna jol tartty!

Kitapqa álemniń 16 memleketinde ǵumyr keship jatqan 500-den asa qazaq sportshylary tizip berilgen. Inemen qudyq qazǵandaı jankeshti jumys! Erekshe eńbek! Tyń týyndy! Meniń janyma jaqyn kitap! Tozbas shejire!!!

О́kinishtisi — bul kitapty shyǵarýǵa Otanyna ábden baýyr basyp ta bolmaǵan uldyń ózi ǵana júgirip, nebári 350 dana kitap qana shyǵara alǵan. Al, bul memleket qamqorlyǵymen shyǵyp, elimizdiń búkil oblysyna myńdap tarap, kúlli eldiń kitaphanalaryna 5-10 danadan beriletin-aq kitap!

Búginde attan túsip,aıqaıdan aıańǵa aýysqan basym «Osy sálemdi Mádenıet jáne sport mınıstri men vıe-mınıstrine, Aqparat jáne damý mınıstrine jetkizýge» ýáde ǵana bere aldym…

Osy bir kitapty qarap otyryp, elińde ǵana emes, nebir alys shet jerlerde júrip, qazaq bola bilgen, qazaq bolǵanda da asyl qazaq bola bilgen ul-qyzdarymyzǵa rıza bolyp, mundaı shejire kitap sporttan basqa salada da osylaı jınaqtalyp, jaryqqa shyǵar bolsa, ultymyzdyń qanshama ónerli ul-qyzymen tanysar edik dep, kóńil órekpip, júrek janyp, bılik basyndaǵy bala-baýyrlarymyzǵa úshbý sálem joldaǵan túrim osy!

Nesip JÚNISBAIULY,

Qazaqstannyń eńbek sińirgen qaıratkeri

ALMATY