SportPress.kz Qazaqstan sport jańalyqtary
Túrikmenstanda jańadan qurylyp, birden ıokary (joǵary) lıgadan oryn alǵan «Arkadag» fýtbol klýbyna qataryn el quramasynyń oıynshylarymen toltyrdy. Bul týraly «Hronıka Týrkmenıstana» aqparyna súıengen rast.kz habarlady.
«Fergana» aqparat basylymynyń jazýynsha, jańa paıda bolǵan «Arkadag» klýbynda Ortalyq Azııa chempıonatyna qatysý úshin Túrikmenstan quramasyna shaqyrylǵan 25 fýtbolshynyń 17-si, ıaǵnı 68 paıyzy oınaıdy.
Komanda basshylary tek quramanyń qazir Sıangannyń (Gonkong) «Kıtchı» komandasynda oınap júrgen lıderi Rýslan Mıngazovty ǵana shaqyrmapty. Komandanyń bas jattyqtyrýshysy Mergen Orazov osy kezge deıin «óte kóp jumys atqarǵan» fýtbolshyǵa tynyǵýǵa múmkindik bergenin aıtqan.
Eske sala keteıik, 2019-2020 jyldary bul forvard Pavlodardyń «Ertis» komandasy sapynda 13 ret alańǵa shyǵyp, 2 gol soqqan.
Al «Arkadag» qazir ıokary (joǵary) lıga chempıonatynda eshkimge des berer emes. Ol bıyl kóktemde bastalǵan jańa birinshilikte 8 týr oınalǵannan keıin 8 utyspen jeke-dara top bastap keledi. Komanda 31 gol soǵyp, 7 dop jiberip alǵan, 24 upaıy bar. Budan bólek, taǵy 2 joldastyq kezdesýdi jeńispen aıaqtaǵan.
Komanda qazir salynyp jatqan, biraq áli tolyq turǵyzylyp bitpegen Arkadag qalasynyń namysyn qorǵaıdy. Shahar Ahal velaıatynyń aýmaǵyna ornalasqan. Ol burynǵy prezıdent, qazir Túrikmenstan Halk maslahatynyń (parlamentiniń) raıysy, osy kezdegi prezıdent Serdar Berdymýhamedovtiń ákesi Gýrbangýly Berdymýhamedovtiń qurmetine boı kóterip jatyr.
«Arkadag» – Gýrbangýly Berdymýhamedovke zań júzinde berilgen resmı ataq. Ol «jeleýshi», «jebeýshi», «súıeýshi» degen maǵynany beredi. Bylaıynsha aıtqanda, «arqada turǵan taý», «arqa tireýshi taý» degen tirkesten shyqqan. Túrikmen jurty ol turǵanda ózderin «arqalaryn tamǵa súıegendeı» bolyp arqalanyp, rýhtanyp, jigerlenip, shıyrshyq atyp júretin bolsa kerek.
