Memleket basshysy boksshy Aıdos Erbosynulyna qoldaý jedelhatyn joldady

6 qarashada boksshy Aıdos Erbosynuly kýbalyq Devıd Morrelge qarsy jekpe-jekte nokaýtpen jeńildi. Merziminen buryn toqtatylǵan kezdesýden keıin bylǵary qolǵap sheberin zembilmen alyp ketti. Keıin onyń komaǵa túskeni aıtyldy. Ol sýper orta salmaqtaǵy WBA tujyrymy boıynsha álem chempıony ataǵy úshin judyryqtasqan bolatyn.

Búgin memleket basshysy Qasym-Jomart Toqaev Aıdos Erbosynulyna qoldaý bildirdi.

«Kýbalyq boksshymen jekpe-jegińizde búkil qazaqstandyq jankúıer Sizge tilekshi boldy. Báseke bolǵan jerde jeńis pen birge sátsizdiktiń de bolatyny zańdylyq. Eń bastysy – denniń saýlyǵy. Tezirek saýyǵyp, ortamyzǵa oralyp, otandyq bokstyń damýyna úlesińizdi qosa beretinińizge senim bildiremin», – delingen jedelhatta.

Keshe Búkilálemdik boks qaýymdastyǵy (WBA) qazaqstandyq boksshy Aıdos Erbosynulyna qatysty resmı málimdeme jasap, sportshynyń ómirine tóngen qaýip joǵyn aıtty.

«Aıdos eki aptadaı dárigerlerdiń baqylaýynda bolady. Qazirgi kezde komandasy onyń otbasyna jáne jeke ómirine qurmetpen qaraýdy suraıdy. WBA jaǵdaıdy ary qaraı baqylaıdy jáne Erbosynuly tez saýyǵady dep senedi. Budan bólek, búkil boks áleminen ol úshin duǵa etýdi suraımyz», — deıdi qaýymdastyq ókilderi.

Dastan KENJALIN,

ASTANA