XIX Azııa oıyndary: Qazaqstan úshinshi júldeni aldy

Qytaıdyń Hanchjoý qalasynan taǵy bir qýanyshty habar jetti. Qazaqstan sportshylary Azıadada úshinshi medaldi jeńip aldy.

Bul júldeni tapanshamen oq atýdan 25 metr qashyqtyqtaǵy nysanany dál kózdegen Nıkıta Chırıýkın ıelendi. Sóıtip, ol Qazaqstan quramasyna ekinshi qola medaldi syılady. Al osy jarysta bas júldeni qytaı sportshysy Lı Iýhong ıelendi. Nıkıta Chırıýkın 26 upaı jınady.

Nıkıta — kóptegen bedeldi jarystardyń jeńimpazy jáne júldegeri.  Búgin de ol bıikten kórindi. Básekelestik qıyn bolǵanyna qaramastan ol óziniń sheberligin kórsetti. Nıkıtany, onyń komandalastary men jattyqtyrýshylaryn osy júldemen quttyqtaımyn,- dedi týrızm jáne sport mınıstri Ermek Marjyqpaev.

Ázirshe Qazaqtan jalpykomandalyq esepte úzdik bes eldiń quramasynyń tizimine kirgen joq. Bul tizimde eki altyn júldeden kóp medal alǵan elderdiń ókilderi bar. Sonyń ishinde kórshiles О́zbekstannyń sportshylary 3 altyn, 4 kúmis jáne 3 qola medalmen tórtinshi orynda tur. Al topty qytaı sańlaqtary bastap keledi. Olar 27 altyn, 11 kúmis jáne 5 qola júldeni ıelengen. Odan keıingi orynda 5 altyn, 6 kúmis jáne 6 qola medalmen Ońtústik Koreıa ornalasqan.

Úshinshi oryndy 3 altyn, 9 kúmis jáne 6 qola júldemen japon sportshylary ıelik etip otyr. Tórtinshi orynda О́zbekstan bolsa, úzdik bestikti Gonkogtyń qyz-jigitteri túıindedi. Olarda 2 altyn, 2 kúmis jáne 6 qola júlde bar.

Dastan KENJALIN,

ASTANA

FOTO: Týrızm jáne sport mınıstrligi