XIX Azıada: 27 qyrkúıektegi jarys kúniniń nátıjeleri

Keshe Qytaıdyń Hanchjoý qalasynda ótip jatqan Azııa oıyndarynda Qazaqstan komandasy bir altyn jáne eki qola medal jeńip aldy.

Stend atý:

Sapynda Ásem Orynbaı, Zoıa Kravchenko jáne Olga Panarına bar Qazaqstannyń áıelder komandasy skıt baǵdarlamasynda altyn medal jeńip alyp, Azııa oıyndarynyń rekordyn (350 ball) ornatty.

Al jekeleı synda Ásem Orynbaı qola júldege ıe boldy.

Júzý:

Vatterflıaı ádisimen (100 metr) júzýdiń fınaldyq kezeńinde Ádilbek Mýsın 51.86 sekýndta márege jetip, qola medal jeńip aldy.

Ý-shý sanda:

52 kelige deıingi salmaq dárejesinde óner kórsetken Aıan Tursyn qola júldege ıe boldy.

Boks:

Eki dúrkin álem chempıony Nazym Qyzaıbaı (50 kg) Nepaldan kelgen qarsylasy Sýsma Tamangty – 5:0 esebimen senimdi túrde utty, al Saǵyndyq Toǵambaı Mońǵolııadan kelgen Barıahaan Dorjdy ekinshi raýndta merziminen buryn jeńdi. Keshki sessııada Ertýǵan Zeınýllınov (63,5 kg) Tájikstannan kelgen boksshy Bahodýr Ýsmonovty 3:2 esebimen jeńdi.

Tennıs:

Aralas jupta Jibek Qulambaeva men Grıgorıı Lomakın 32 mınýt ishinde Tájikstannan kelgen qarsylastaryn 6:0, 6:1 esebimen jeńip, jarystyń kelesi kezeńine shyqty.

3x3 Basketbol:

Qazaqstannyń áıelder komandasy Nepal quramasyn 17:10 esebimen jeńdi.

Gandbol:

Qazaqstan áıelder komandasy toptyq irikteý kezeńinde О́zbekstan quramasyn 37:33 esebimen utty.

Tórtinshi  jarys kúniniń qorytyndysy boıynsha Qazaqstan quramasynyń qorjynynda 1 altyn, 2 kúmis jáne 7 qola júlde bar.

Týrızm jáne sport mınıstrligi

FOTO: Týrızm jáne sport mınıstrligi