ازيادا چەمپيونى مەن جۇلدەگەرىنە اقشالاي سىياقى بەرىلەدى

تۋريزم جانە سپورت مينيسترلىگى XIX جازعى ازيا ويىندارىندا جۇلدە العان سپورتشىلار مەن ولاردىڭ جاتتىقتىرۋشىلارىنا بەرىلەتىن اقشالاي سىياقى جاريالادى.

ازيا ويىندارىنىڭ چەمپيونى اتانعان سپورتشىعا 10 000 اقش دوللارى كولەمىندە اقشالاي سىياقى بەرىلەدى. ال، التىن مەدال يەگەرىن جارىسقا دايىنداعان جاتتىقتىرۋشىعا 5 000 اقش دوللارى قاراستىرىلىپ وتىر.

ازيادانىڭ كۇمىس جۇلدەگەرى 5 000 اقش دوللارى، ال جاتتىقتىرۋشىسى 3 000 اقش دوللارى كولەمىندە سىياقى الادى. سونداي-اق، قولا مەدال ەنشىلەگەن قۇراما سپورتشىسىنا 3 000 اقش دوللارى، ال ونىڭ جاتتىقتىرۋشىسىنا 2 000 اقش دوللارى كولەمىندە اقشالاي ىنتالاندىرۋ بەلگىلەنگەن، — دەلىنگەن ۆەدومستۆونىڭ حابارلاماسىندا.

بيىلعى ازيادان كەيىن قازاقستان بوكس فەدەراتسياسى پرەزيدەنتىنىڭ جەكە قاراجاتىنان سىياقىلار دا بەرىلەدى. التىن مەدال ءۇشىن چەمپيوندار 50 مىڭ اقش دوللارىن، كۇمىس جۇلدەگەرلەر  30 مىڭ اقش دوللارىن، قولا مەدال ءۇشىن  10 مىڭ اقش دوللارىن الادى.

ازيا ويىندارى قىتايدىڭ حانچجوۋ قالاسىندا 23 قىركۇيەكتە باستالعان بولاتىن. ول 8 قازانعا دەيىن بولادى. بيىل بۇل جارىس وسىمەن 29-رەت بولىپ جاتىر. نەگىزى قىتاداعى ازيادا بىلتىر بولۋى كپەرەك ەدى. الايدا ويىنداردى ۇيىمداستىرۋ كوميتەتى قحر-داعى كورونوۆيرۋستىڭ پاندەمياسىنا بايلانىستى ونى بيىلعا شەگەردى. سول سەبەپتى جارىس رەسمي تۇردە ازيادا-2022 دەپ اتالادى.

بيىلعى قۇرلىقتىڭ باستى جارىسىنا  قازاقستان قۇراماسىنان 500-دەن استام سپورتشى سپورتتىڭ 30 تۇرىنەن سىنعا ءتۇسىپ جاتىر. ازىرشە سپورتشىلارىمىزدا 1 التىن، 2 كۇمىس جانە 7 قولا مەدال بار. التىن مەدالدى كەشە ستەند اتۋدان سكيت باعدارلاماسى بويىنشا سىنعا تۇسكەن ايەلدەر قۇراماسىنداعى زويا كراۆچەنكو، اسەم ورىنباي مەن ولگا پانارينا  جەڭىپ الدى. ولار كوماندالىق جارىستا چەمپيون اتانىپ قويماي، 344 ۇپاي جيناپ، ازيا ويىندارىنىڭ رەكوردىن جاڭارتتى.

تاعى ءبىر ايتاتىن نارسە، ازيا ويىنداردا العاش رەت وليمپيادا ليتسەنزيالارى دا بەرىلەدى. بۇعان دەيىن ازيادادا وليمپيادانىڭ جولداماسىن ۇلەستىرۋ دەگەن مۇلدەم بولماعان. ول تاريحتا الەعاش رەت بولىپ وتىر. ازيادادا قازاقستان سپورتشىلارى دا وسى مۇمكىندىكتى پايدالانىپ كەلەدى. قازىر قازاقستان قۇراماسىندا ءتورت جىلدا ءبىر اينالىپ كەلەتىن ءدۇبىرلى دوداعا جولداما العان بىرنەشە سپورتشى بار. ليتسەنزيانى ءالى دە الىپ جاتىرمىز.

تۋريزم جانە سپورت مينيسترلىگى

فوتو: Olympics.com