XIX ازيادا: قازاقستاننىڭ قورجىنى تاعى ەكى قولا جۇلدەمەن تولىقتى

حانچجوۋدا ءوتىپ جاتقان ازيا ويىندارىندا ەلىمىز قۇراما كومانداسىنىڭ قورجىنىنا تاعى ەكى مەدال ءتۇستى. بۇل جولى سپورتشىلار ءۇشىنشى ورىن الىپ، قولا مەدالگە قاناعات تۇتتى.

ەرلەر اراسىنداعى جاعاجاي ۆولەيبولىنان جۇپتىق باسەكەدە دميتري ياكوۆلەۆ پەن سەرگەي بوگاتۋ يران سپورتشىلارى اليرەزا اگاجانيگاساب پەن ابباس پوۋراسگاريدى 2:0 (25:23، 30:28) ەسەبىمەن جەڭىپ، مەدال اكەلدى.

ودان كەيىن تاەكۆوندوشىلار سمايىل دۇيسەباي مەن جانسەل دەنيز دە ءۇشىنشى ورىننان كورىندى.

سمايىل دۇيسەباي 80 كەلىدەن استام سالماقتا جارتىلاي فينالدا قىتاي سپورتشىسى چجاوسيان سوننان 0:2 ەسەبىمەن، ال جانسەل دەنيز (73 كگ) لي دابيننەن (وڭتۇستىك كورەيا) 1:2 ەسەبىمەن جەڭىلىپ قالدى. وسىلايشا، ۇلتتىق قۇرامانىڭ ەكى سپورتشىسى ءوز سالماعىندا ۇزدىك ۇشتىكتى تۇيىندەدى.

سمايىل ازيادادا بۋتان اتلەتى نيما ۆانگدي 2:0 جەڭىپ،  پاكىستاندىق ومار حامزادان دا باسىم ءتۇسىپ، جارتىلاي فينالعا جولداما العان بولاتىن. جانسەل حانچجوۋداعى ويىنداردى شيرەك فينالدان باستاپ، ليۆان وكىلى ۋوردا سەلمانانى 2:0 ەسەبىمەن جەڭگەن. جانسەل 2018 جىلى دجاكارتادا وتكەن جازعى ازيا ويىندارىنىڭ فينالىندا وسى لي دابيننەن ۇتىلىپ، كۇمىس جۇلدەگەر اتانعان ەدى.

تاعى ءبىر رەت ەسكە سالىپ وتسەك، حانچجوۋداعى ازياداعا قازاقستاننان سپورتتىڭ 30 تۇرىنەن 524 سپورتشى (262 ەر جانە 262 ايەل) قاتىسىپ جاتىر. ونىڭ 27-ءسى وليمپيالىق باعدارلاماعا كىرسە، قالعان 3-ءى وليمپيالىق ەمەس سپورت تۇرلەرى. سونىمەن قاتار، ازياداد 8 سپورت تۇرىنەن، اتاپ ايتقاندا، بوكس، ساداق اتۋ، قازىرگى بەسسايىس، ءجۇزۋ، برەيكينگ، كوگالداعى حوككەي، تەننيس جانە جەڭىل اتلەتيكا بويىنشا پاريج وليمپياداسىنا  ليتسەنزيالار ساراپقا سالىنادى.

جالپى العاندا، ازيانىڭ 45 ەلىنەن 15 مىڭنان استام سپورتشى 40 سپورت تۇرىنەن 481 مەدال جيىنتىعىنا تالاسىپ جاتىر.

شامكەن بايىربەك،

حانچجوۋ

فوتو: Olympics.com