استانادا قازاقستان فۋتبولىنىڭ مۋزەيى اشىلدى

استانادا قازاقستان فۋتبولىنىڭ 110 جىلدىعىنا وراي وتاندىق فۋتبولدى ناسيحاتتاۋ ماقساتىندا قازاقستان فۋتبولىنىڭ مۋزەيى اشىلدى، دەپ حابارلادى قازاقستان فۋتبول فەدەراتسياسى.

ءىس-شاراعا «استانا» فۋتبول ورتالىعىنىڭ تاربيەلەنۋشىلەرى، قازاق فۋتبولىنىڭ ارداگەرلەرى، وتاندىق فۋتبول كلۋبتارىنىڭ جەتەكشىلەرى، قازاقستان ۇلتتىق قۇراماسىنىڭ باس جاتتىقتىرۋشىسى ماگومەد اديەۆ پەن ۇلتتىق قۇراما كوماندانىڭ ويىنشىلارى باۋىرجان يسلامحان مەن يان ۆوروگوۆسكي قاتىستى.

مۋزەيدى قۇرۋعا اتسالىسقان ۇجىم 1913 جىلى سەمەيدە باستاۋ العان قازاقستان فۋتبولىنىڭ تاريحىن جاڭعىرتۋ ءۇشىن ەلىمىزدىڭ تۇكپىر-تۇكپىرىنەن جادىگەرلەر، دەرەكتەر مەن اقپارات جيناۋ جۇمىستارىن جۇرگىزدى.

وسى وقيعاعا وراي قازاقستان فۋتبول فەدەراتسياسىنا فيفا جانە ۋەفا-دان قۇتتىقتاۋ حاتتارى كەلىپ ءتۇستى.

فيفا پرەزيدەنتى دجانني ينفانتينونىڭ قۇتتىقتاۋ حاتىندا: «بىرنەشە اي بۇرىن مەن سىزدەردىڭ ادەمى ەلدەرىڭىزگە بارىپ، قازاقستاندا فۋتبولعا دەگەن كەرەمەت قۇشتارلىق پەن سۇيىسپەنشىلىكتى ءوز كوزىممەن كورۋ مۇمكىندىگىنە يە بولدىم. مۋزەي ەلدەگى فۋتبولدىڭ 110 جىلدىق تاريحىنا، ىستەرگە، تۇلعالارعا، سونداي-اق سپورتىمىزدى دامىتىپ جاتقان بارلىق ادامدارعا قۇرمەت كورسەتۋگە ءوز ۇلەسىن قوساتىنى ءسوزسىز»، — دەلىنگەن.

ۋەفا پرەزيدەنتى الەكساندەر چەفەرين قازاقستان فۋتبول فەدەراتسياسىنىڭ ۋەفا-عا مۇشە قاۋىمداستىقتار اراسىندا بەدەلگە يە بولعانىن اتاپ ءوتتى.

قازاقستان فۋتبول فەدەراتسياسىن مۋزەيدىڭ رەسمي اشىلۋىمەن قۇتتىقتاعىم كەلەدى. وسىنداي ماڭىزدى وقيعالار ۇلتتىق قاۋىمداستىقتىڭ دۇرىس باعىتتا دامىپ، ۋەفا-عا مۇشە قاۋىمداستىقتار اراسىندا بەدەلگە يە بولعانىنىڭ دالەلى بولدى. سىزدەردىڭ ۋەفا كلۋبتىق جارىستارىنا قاتىسۋلارىڭىز جانە ۇلتتىق قۇرامانىڭ جەتىستىكتەرى قاۋىمداستىقتىڭ بارلىق دەڭگەيدەگى پروگرەسسىن كورسەتەدى، ال الداعى ۋاقىتتا ەۋروپالىق فۋتبولدا ودان ءارى تولىق باسەكەگە تۇسۋگە مۇمكىندىكتەرىڭىز بار. قفف-عا تابىس تىلەيمىن، ويتكەنى سىزدەر بۇل دارەجەگە جەتۋ ءۇشىن ۇزاق جولدان وتتىڭىزدەر جانە قازىرگى تابىستارىڭىز – فۋتبولمەن ءومىر سۇرەتىن جانە فۋتبولدى جاقسى كورەتىندەرگە ارنالعان، — دەدى ول.

قازاقستان فۋتبولى مۋزەيىنىڭ اشىلۋىنا وراي ادىلەت بارمەنقۇلوۆ حالىقارالىق سپورت ءباسپاسوزى قاۋىمداستىعىنىڭ (AIPS) العىس حاتىمەن ماراپاتتالدى.

سونداي-اق سالتاناتتى ءىس-شارادا قازاقستان فۋتبول مۋزەيىنىڭ ەكسپوناتتارىن جاساۋ مەن تولىقتىرۋعا زور ۇلەس قوسقاندارعا قفف پرەزيدەنتىنىڭ العىس حاتى تابىس ەتىلدى. بۇل حات اتاقتى فۋتبولشى، جاتتىقتىرۋشى تيمۋر سانجار ۇلى سەگىزباەۆتىڭ قىزى ايگۇل سەگىزباەۆاقا، سپورت ءجۋرناليسى، سپورت تاقىربىندا 6 كىتاپتىڭ اۆتورى ءالىم اناپيانوۆقا، سپورت تاريحشىسى، شولۋشى، جۋرناليست ستانيسلاۆ سارسەكوۆكە، ەڭبەك سىڭىرگەن مادەنيەت قايراتكەرى، PhD دوكتورى نازگۇل كادريمبەتوۆاعا، قازاقستان رەسپۋبليكاسى ۇلتتىق مۋزەيىنىڭ، «استانا ارەنا» ستاديونىنىڭ جانە ەلىمىزدىڭ باسقا دا ماڭىزدى مادەنيەت جانە سپورت نىساندارىنىڭ ديزاينىن جاساۋعا قاتىسقان مۋزەي ديزاينەرى  اسىلحان نۇفتوللا ۇلى ماشتاەۆ تاپسىرىلدى.

ايگۇل تيمۋرقىزى اكەسىنىڭ جەكە زاتتارىن مۋزەي قورىنا سىيعا تارتتى. ءالىم ءىلياس ۇلى مۋزەي قورىنا كوپتەگەن ادەبيەت پەن باسقا دا جادىگەرلەردى سىيلاسا، ستانيسلاۆ سەرىك ۇلى مۋزەي قورىنا ءوزىنىڭ جەكە كوللەكتسياسىنان 150-دەن استام جادىگەردى تارتۋ ەتتى.

قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆتىڭ باستاماسىمەن اشىلعان مۋزەيدە قازاقستان فۋتبولىنىڭ تاريحى، ونىڭ ىشىندە اتى اڭىزعا اينالعان ويىنشىلاردىڭ جەتىستىكتەرى مەن ەلىمىزدەگى فۋتبولدىڭ دامۋىنداعى ماڭىزدى ساتتەرى كورسەتىلەدى.

ايتا كەتەيىك، مۋزەي قورىنا كەز كەلگەن ادام فۋتبولىمىزدىڭ تاريحىنا قاتىستى جادىگەرلەردى سىيعا تارتا الادى.

مۋزەي جۇمىس كۇندەرى ساعات 10. 00-دەن 17.00-گە دەيىن جۇمىس ىستەيدى.

فوتو: ميحايل شاپوۆالوۆ