Konferenııa lıgasy: «Astana» klýbyna pleı-offqa shyǵýǵa áli de múmkindik bar

Eýropanyń birneshe qalasynda ÝEFA Konferenııa lıgasy toptyq týrnıriniń machtary boldy. «Astana» klýby óz alańynda Horvatııanyń «Dınamo Zagreb» komandasymen kezdesip, 0:2 esebimen jeńilip qaldy.

Bul matchta qarsylastar ekinshi taımda eki gol salyp, jeńiske jetti. Birinshi taımda «Astanaǵa» esep ashýǵa tamasha múmkindik boldy. 9-mınýtta tóreshi qonaqtardyń qorǵaýshysy «Astananyń» jartylaı qorǵaýshysy Elhan Astanovty aıypdop alańynda qulatqannan keıin, penaltı belgiledi. Alaıda Dembo Darbo qaqpany dál kózdeı almady. Osylaısha oıynnyń birinshi jartysynda tablodaǵy esep ózgergen joq.

Ekinshi taımnyń 48-mınýtynda horvatııalyq komandada Gabrıel Vıdovıch esep ashty. Odan keıin Takýro Kaneko 79-mınýtta esepti eseledi. Sóıtip, «Astana» «Dınamo Zagrebten» altynshy ret jeńildi.

Bul oıynda «Astana» pleı-off satysyna shyǵý úshin qarsylasyn jeńýi kerek edi. Endi klýbtyń toptan shyǵýǵa múmkindigi azaıdy.

Qazir týrnır kestesinde 5-týrdan keıin Chehııanyń «Vıktorııa Plzen» komandasy 15 upaı jınap, kósh bastady. Keshe chehtar Kosovonyń «Balkanı» klýbyn syrt alańda 1:0 esebimen jeńdi. Ekinshi orynǵa «Astanany» jeńgen «Dınamo Zagreb» shyqty.  Horvatııalyq ujymda 6 upaı bar. Al úshinshi orynǵa «Astana» yǵysty. Elordanyń komandasynyń qorjynynda 4 upaı. «Astana» dop aıyrmashylyǵymen «Balkanıden» bir saty bıik tur. «Balkanı» de 4 upaı jınaǵan. Kosovonyń klýby 3 gol salyp, óz qaqpasyna 4 gol jiberip alsa, «Astana» 4 gol salyp, 10 dop jiberip alǵan.

Endi «Astana» úshin 15 jeltoqsanda syrt alańda Chehııanyń «Vıktorııa Plzen» komandasymen oıyn bárin sheshedi. Eger alań ıelerinen jeńilip nemese teń oınasa toptan shyǵa almaıdy. Al «Vıktorııany» jeńip jatsa, birinshi orynda turǵan «Dınamo Zagreb» óz alańynda «Balkanıden» jeńilýi kerek. Bul komandalardyń birinshi oıyny kosovolyq klýbtyń jeńisimen aıaqtalǵan. 5 qazanda «Balkanı» óz alańynda horvatııalyq jasaqty 2:0 esebimen jeńgen bolatyn.
Dastan KENJALIN,

ASTANA