SportPress.kz قازاقستان سپورت جاڭالىقتارى
بوكستان قازاقستان كومانداسىنىڭ باس جاتتىقتىرۋشىسى مىرزاعالي ايتجانوۆ سپورتشىلاردىڭ كەلەسى جىلعا جوسپارى تۋرالى ايتىپ بەردى. ول ۇلتتىق قۇرامانىڭ ءبىرىنشى جانە ەكىنشى نومەرلى بوكسشىلارىنىڭ كەلەسى جىلى ماڭىزدى جارىستارعا قاتىساتىنىن، وسىعان بايلانىستى كوماندانىڭ جاتتىعۋ جۇمىستارىنا دا ەرەكشە كوڭىل بولىنەتىنىن ايتتى، دەپ حابارلادى olympic.kz.
قازىر كوماندانىڭ ءبىراز مۇشەسى عالىم جارىلعاپوۆتى ەسكە تۇسىرۋگە ارنالعان حالىقارالىق تۋرنيرگە قاتىسىپ جاتىر. الەم چەمپيونى اتانعان بوكسشىلارىمىز جاقىندا «چەمپيوندار ءتۇنى» كەشىندە باق سىنادى.
كەزەكتى جاتتىعۋ جيىنى جاڭا جىلدا باستالادى. قاڭتاردا الماتى وبلىسىنداعى «اقبۇلاق» وليمپيادالىق ورتالىعىندا، تاۋدا جالپى دەنە جاتتىعۋى بويىنشا جيىن وتەدى.
جيىندى ءۇش كەزەڭمەن وتكىزەمىز دەگەن جوسپار بار. جالپى دەنە جاتتىعۋدان سوڭ، ارنايى دەنە جاتتىعۋىنا كوڭىل بولەمىز، — دەدى باس جاتتىقتىرۋشى.
ونىڭ ايتۋىنشا، سودان كەيىن تەحنيكا مەن تاكتيكانى كۇشەيتۋگە ارنالعان جيىن بولادى. كەلەسى ماۋسىمدا ۇلتتىق قۇراما وليمپياداعا ىرىكتەۋ تۋرنيرلەرىنە قاتىسادى. كوماندانىڭ ماقساتى — مەيىلىنشە كوبىرەك جولداما الۋ.
