SportPress.kz Қазақстан спорт жаңалықтары
Бокстан Қазақстан командасының бас жаттықтырушысы Мырзағали Айтжанов спортшылардың келесі жылға жоспары туралы айтып берді. Ол ұлттық құраманың бірінші және екінші номерлі боксшыларының келесі жылы маңызды жарыстарға қатысатынын, осыған байланысты команданың жаттығу жұмыстарына да ерекше көңіл бөлінетінін айтты, деп хабарлады olympic.kz.
Қазір команданың біраз мүшесі Ғалым Жарылғаповты еске түсіруге арналған халықаралық турнирге қатысып жатыр. Әлем чемпионы атанған боксшыларымыз жақында «Чемпиондар түні» кешінде бақ сынады.
Кезекті жаттығу жиыны жаңа жылда басталады. Қаңтарда Алматы облысындағы «Ақбұлақ» Олимпиадалық орталығында, тауда жалпы дене жаттығуы бойынша жиын өтеді.
Жиынды үш кезеңмен өткіземіз деген жоспар бар. Жалпы дене жаттығудан соң, арнайы дене жаттығуына көңіл бөлеміз, — деді бас жаттықтырушы.
Оның айтуынша, содан кейін техника мен тактиканы күшейтуге арналған жиын болады. Келесі маусымда ұлттық құрама Олимпиадаға іріктеу турнирлеріне қатысады. Команданың мақсаты — мейілінше көбірек жолдама алу.
