SportPress.kz Qazaqstan sport jańalyqtary
Bokstan Qazaqstan komandasynyń bas jattyqtyrýshysy Myrzaǵalı Aıtjanov sportshylardyń kelesi jylǵa jospary týraly aıtyp berdi. Ol ulttyq quramanyń birinshi jáne ekinshi nomerli boksshylarynyń kelesi jyly mańyzdy jarystarǵa qatysatynyn, osyǵan baılanysty komandanyń jattyǵý jumystaryna da erekshe kóńil bólinetinin aıtty, dep habarlady olympic.kz.
Qazir komandanyń biraz múshesi Ǵalym Jarylǵapovty eske túsirýge arnalǵan halyqaralyq týrnırge qatysyp jatyr. Álem chempıony atanǵan boksshylarymyz jaqynda «Chempıondar túni» keshinde baq synady.
Kezekti jattyǵý jıyny jańa jylda bastalady. Qańtarda Almaty oblysyndaǵy «Aqbulaq» Olımpıadalyq ortalyǵynda, taýda jalpy dene jattyǵýy boıynsha jıyn ótedi.
Jıyndy úsh kezeńmen ótkizemiz degen jospar bar. Jalpy dene jattyǵýdan soń, arnaıy dene jattyǵýyna kóńil bólemiz, — dedi bas jattyqtyrýshy.
Onyń aıtýynsha, sodan keıin tehnıka men taktıkany kúsheıtýge arnalǵan jıyn bolady. Kelesi maýsymda ulttyq qurama Olımpıadaǵa irikteý týrnırlerine qatysady. Komandanyń maqsaty — meıilinshe kóbirek joldama alý.
