قازاقتان شىققان تۇڭعىش كينومەحانيك ءراپيا حالىقوۆانىڭ قۇرمەتىنە مۇراجاي اشىلدى

جامبىل وبلىسى قورداي اۋدانى كەنەن اۋىلىندا قازاقتان شىققان تۇڭعىش كينومەحانيك، كسرو كينەماتوگرافياسىنىڭ ۇزدىگى، «قۇرمەت»، «وكتبيار رەۆوليۋتسياسى» وردەندەرىنىڭ يەگەرى، قازاقستانعا ەڭبەگى سىڭگەن مادەنيەت قىزمەتكەرى، جامبىل وبلىسىنىڭ قۇرمەتتى كينومەحانيگى ءراپيا حالىقوۆانىڭ قۇرمەتىنە مۇراجاي اشىلدى.

ءراپيا حالىققىزى اشارشىلىقتا دۇنيەگە كەلىپ، سۇراپىل سوعىس جىلدارىندا ومىرگە قادام باسىپ، مادەنيەت سالاسىندا 36 جىل ەڭبەك ەتكەن. سول قىزمەتى ءۇشىن كسرو كينەماتوگرافياسىنىڭ ۇزدىگى، قازاقستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى اتاندى. قورداي اۋدانى اكىمىنىڭ ورىنباسارى داميرا سۇگىرباەۆانىڭ ايتۋىنشا، ءراپيا اپامىزدىڭ اتىنداعى مۇراجاي – قازاق كينوسىنان ماعلۇمات بەرەتىن قۇندى مادەني وردا بولاتىنى ءسوزسىز. جاستارعا رۋحاني-مادەني قازىنا بەرەتىن ۇلكەن مۇرا. سادىبەكوۆتەر اۋلەتى ءوز قاراجاتىنا اشتى.

وسى ءىستىڭ باسى-قاسىندا ءراپيا حالىققىزىنىڭ ۇلى بەلگىلى جۋرناليست اقىن ورداباي ۇلى ءجۇردى. ونىڭ ايتۋىنشا، مۇراجايعا اناسىنىڭ كوزى تىرىسىندە قولىنا ۇستاعان زاتتارى مەن تاريحي قۇندى جادىگەرلەر قويىلعان. سونىمەن قاتار مۇراجايدىڭ ءبىر بۇرىشىنا قازاقتان شىققان تۇڭعىش كينومەحانيكتىڭ ومىرلىك جارى بولعان قازاق كسر وقۋ-اعارتۋ ءىسىنىڭ ۇزدىگى، ۇلى وتان سوعىسىنىڭ ارداگەرى، العاش بولىپ قورداي اۋدىنىنىڭ قۇرمەتتى ازامات اتاعىن العان جاننىڭ ءبىرى، 40 جىل ۇستازدىق ەتىپ بالا وقىتقان ورداباي سادىبەكوۆ تۋرالى دا مۇراجاي اشىلىپ، كورەرمەندەردىڭ نازارىنا ۇسىنىلعان.

مۇراجايدىڭ اشىلۋ سالتاناتىنا قورداي اۋدانى اكىمىنىڭ ورىنباسارى داميرا ماراتقىزى، قورداي اۋدانى اقساقالدار القاسىنىڭ توراعاسى ءبىرجان الىمبەتوۆتەر ارنايى كەلىپ، مۇراجاي كابينەتتىڭ اشىلۋ لەنتاسىن قيدى. اۋىل حالقى مەن الماتىدان ارنايى كەلگەن مارتەبەلى قوناقتاردا مۇراجايدى ارالاپ، ءاربىر فوتو ارحيۆ پەن قۇندى جادىگەرلەرمەن تانىسىپ، ۇلكەن اسەرمەن شىقتى. سوسىن كوپشىلىك مادەنيەت ءۇيىنىڭ ورتالىق زالىنا بارىپ، كونتسەرتتى تاماشالادى. مادەنيەت ءۇيىنىڭ مەڭگەرۋشىسى جازيرا ورىنقىزىنىڭ ۇيلەسىمدى ۇيىمداستىرۋىمەن وتكەن سالتاناتتى ءىس-شارادا «قازاقفيلم» كومپانياسى  تۇسىرگەن «ءراپيا» اتتى دەرەكتى فيلم مەن ونىڭ ءومىر جولى تۋرالى جاراسىمدى جاسالعان سلايدتتار كورسەتىلدى.

ودان كەيىن كەنەن ازىرباەۆتىڭ شاكىرتى اسىلقۇل بۇرباەۆتىڭ ۇلى ەرلان بۇرباەۆتىڭ كەش يەسىنە ارناپ شىعارعان ولەڭ جولدارى وقىلدى. «جەلتوقسان اقيقاتى» رەسپۋبليكالىق قوعامدىق بىرلەستىگىنىڭ توراعاسى بولات قۇرىمباەۆ،  عىلىم اكادەمياسىنىڭ قاۋىپسىزدىك قىزمەتىنىڭ باسشىسى، پولكوۆنيك سايفۋتدين شامسۋتدينوۆ، كىتاپ پالاتاسىنىڭ رەداكتورى، بەلگىلى جۋرناليست نۇرىمجان ماۋىت، ارداگەر فوتوگراف قۋانتقان ساپاروۆ انامنىڭ قولىنان ءدام تاتىپ، عيباراتقا تولى اڭگىمەلەرىن تىڭداعاندارىن ءسوز ەتىپ، وسىنداي قۋانىشتى ءىس-شاراعا كۋا بولىپ وتىرعاندارىنا ريزاشىلىعىن ءبىلدىردى. سونىمەن بىرگە  20 جىلداي اسىل انامىزدىڭ جانىندا ءجۇرىپ، بەل شاكىرتى بولعان سەرىك سۇرانشىباي ۇلى، اۋىل اقساقالدار القاسىنىڭ توراعاسى تۇرسىمبەك، سيازباي، امان اعالارىمىزدى اياۋلى انامىز تۋرالى قىزىقتى ەستەلىكتەر ايتتى، — دەدى اقىن ورداباي ۇلى.

كەشتە قوناقتارعا اس بەرىلىپ، ءراپيا حالىققىزى مەن ورداباي سادىبەكوۆتىڭ رۋحىنا ارنالىپ قۇران باعىشتالدى. «بۇگىنگى كۇن — ەرتەڭگى تاريح»، دەمەكشى، بۇل كۇن دە ەرتەڭ تاريح بولىپ قالاتىنا سەنىم زور. قورداي اۋدانىندا الداعى جىلى ۇلكەن مۇراجايدىڭ قابىرعاسى قالانادى. اۋدان اكىمىنىڭ ورىنباسارى داميرا ماراتقىزى سول مۇراجايدا قازاقتان شىققان تۇڭعىش كينومەحانيك ءراپيا حالىققىزىنىڭ اتىندا ءبىر بولمە اشىلاتىنىن اتاپ ءوتتى.

داستان كەنجالين،

استانا