«كانەلونى» ءبىر راۋندتا ءۇش رەت قۇلاتۋعا بولادى – جانىبەك ءالىمحان ۇلى (ۆيدەو)

كاسىپقوي بوكستان WBO جانە IBF تۇجىرىمى بويىنشا ورتا سالماقتاعى الەم چەمپيونى جانىبەك ءالىمحان ۇلى Qazaqstan تەلەارناسىنىڭ «تاڭشولپان» باعدارلاماسىنا بەرگەن سۇحباتىندا اتاقتى مەكسيكالىق بىلعارى قولعاپ شەبەرى ساۋل «كانەلو» الۆارەسپەن جەكپە-جەككە شىقسا، ءبىر راۋندتا ءۇش رەت قۇلاتا الاتىنىن ايتىپ قالدى.

ءبىز العاش رەت اقش-قا 2018 جىلى بارىپ، كەلىسىمشارت جاساستىق. ءبىز الدىمىزعا ايقىن ماقسات قويدىق. ءبىزدىڭ باستى ماقساتىمىز الەم چەمپيونى بولۋ ەدى. سول ماقساتقا جەتتىك. مىنە، اللاعا شۇكىر 13-جەكپە-جەكتە الەم چەمپيونى بولدىم. بەس جىلدا تەز ارادا ەكى تۇجىرىم بويىنشا دۇنيەجۇزىنىڭ چەمپيونى اتاندىم. قازىر ەكى تيتۋلدىڭ چەمپيونىمىن، — دەدى ول.

سۇحباتتا ول بوكستى حوببي رەتىندە قارايتىنىن ايتتى. ول qazaq style دەگەن اتتى تەگىن قويماعانىن، بولاشاقتا وكشەسىن باسىپ كەلە جاتقان جاس بوكسشىلار شارشى الاڭعا شىعىپ، قازاق ستايلدى دارىپتەسە بۇل ەلىمىزگە جاقسى ءبىر سەپتىگىن تيگىزەتىنىن اتاپ ءوتتى.

كاسىپقوي بوكستا مەكسيكانىڭ، اقش-تىڭ ءستيلى بار.  اقىرى بوكستاسىپ، جۇدىرىقتاسىپ جاتقاندا نەگە qazaq style جاساماسقا، نەشە ونى دامىتپاسقا دەپ ويلادىم.  وزىمىزدىڭ باۋىرلار سول قازاق ستيلىمەن بوكستاسسا، بولاشاقتا شارشى الاڭعا شىعىپ جاتقاندا سول قازاق ستايلدى دارىپتەسە بۇل ەلىمىزگە جاقسى ءبىر سەپتگىن تيگىزەر دەپ سانايمىن.

اقش-قا بارعان كەزدە لاقاپ ات تاڭداۋمەن جۇرگەن بولاتىنبىز. سول كەزدە تاڭداعان اتىمىز قازاق ەلىنە قالاي اسەر ەتەدى دەپ ويلاپ جۇردىك. ءبىرىنشى جەكپە-جەكتە امەريكالىقتار وزدەرى لاقاپ ات قويعان ەدى. بىراق، بەرىك سۇلتانوۆ مەنەدجەر اعاممەن اقىلداسىپ، سويلەسىپ، qazaq style دەگەن اتتى تاڭدادىق، — دەدى بوكسشى.

بوكسشىنىڭ ايتۋىنشا، كاسىپقوي بوكسقا بارعان كەزدە الەمدەگى ەڭ جارىق جۇلدىزبەن رينگكە شىعىپ، جۇدىرىقتاسقىسى كەلگەن.

بىزدە قازىر ەكىنشى ورتا سالماقتاعى الەم چەمپيونى «كانەلو» بولىپ تۇر. ونى 100 پايىز جەڭە الامىن. ويتكەنى، مەن ونىڭ ءاربىر جەكپە-جەگىن، جاتتىعۋلارىن بىلەمىن. باقىلاپ وتىرامىن. قاراپ جۇرەمىن. ونىڭ كەمشىلىگى مەن ارتىقشىلىعىن ايتا الامىن. ونىڭ ءبارىن داپتەرگە جازىپ وتىرامىن. ەگەر ونىمەن قولعاپ تۇيىستىرەتىن بولسام، قانداي تاكتيكا قولدانىپ، قانداي ايلامەن جەڭۋگە كەرەكتىگىن بىلەمىن. مەن ونى ءبىر راۋندتا ءۇش رەت قۇلاتا الامىن. بۇل جاي ءسوز ەمەس. ونى قۇداي قالاسا كەزەدسىپ جاتساق، ىسپەن دالەلدەۋگە تىرىسامىز، — دەدى الەم چەمپيونى.

ەسكە سالا كەتسەك، بۇعان دەيىن دە جانىبەك ءالىمحان ۇلى ەكىنشى ورتا سالماقتاعى ءابسوليۋتتى الەم چەمپيونى مەكسيكالىق ساۋل «كانەلو» الۆارەسكە قارسى جەكپە-جەك وتكىزۋگە دايىن ەكەنىن ايتقان ەدى. وتانداسىمىز ونى كەلەسى جىلدىڭ اقپان ايىندا جۇدىرىقتاسۋعا شاقىرىپ، وڭاي نوكاۋتقا تۇسەرەتىنىن ايتقان بولاتىن.

مەنىڭ دايىن ەكەنىمدى بىلەسىزدەر. «كانەلو» دايىن بولسا، مەن ونىمەن اقپان ايىندا جۇدىرىقتاسۋعا دايىنمىن. ماعان ءتورت بەلبەۋ كەرەك. مەن ونى وڭايشىلىقپەن نوكاۋتقا تۇسىرە الامىن. بوكستان حابارىڭىز بولسا، سىزدەر ءبارىن بىلەسىزدەر، — دەدى بوكسشى.

وتانداسىمىز سوڭعى رەت 15 قازاندا گەرمانيالىق ۆينچەنتسو گۋالتەريدى جەڭىپ، WBO جانە IBF تۇجىرىمى بويىنشا الەم چەمپيونى اتاندى.

داستان كەنجالين،

استانا

 

View this post on Instagram

 

A post shared by Qazaqstan.tv ۇلتتىق تەلەارناسى (@qazaqstantv)