SportPress.kz قازاقستان سپورت جاڭالىقتارى
ەلىمىزدەگى ءبىلىم بەرۋ ۇيىمدارىندا «ءبىرتۇتاس تاربيە باعدارلاماسى» اياسىندا «حانتالاپاي» اتتى مەكتەپ جاسىنا دەيىنگى بالالارعا ارنالعان ۇلتتىق ويىنداردىڭ رەسپۋبليكالىق بايقاۋى بولدى. وعان 350 مىڭنان استام بالا قاتىستى، دەپ حابارلادى وقۋ-اعارتۋ مينيسترلىگى.
ءىس-شارا ۇلتتىق ويىندارعا دەگەن قىزىعۋشىلىقتى وياتۋ، قازاق حالقىنىڭ مادەني مۇراسى مەن داستۇرلەرىن دارىپتەۋ ماقساتىندا ۇيىمداستىرىلدى.
بايقاۋ اۋداندىق، قالالىق، وبلىستىق جانە رەسپۋبليكالىق كەزەڭدەردەن تۇردى. مەكتەپ جاسىنا دەيىنگى بالالار ءارتۇرلى كوڭىلدى ويىندارعا قاتىسىپ قانا قويماي، ەلىمىزدەگى ءتۇرلى ۇلتتاردىڭ مادەني مۇراسىمەن جانە داستۇرلەرىمەن تانىستى. بۇل بايقاۋ حالىق اراسىندا ۇمىت بولعان، ۇلتتىق ويىنداردىڭ جاندانۋىنا ىقپال ەتەدى جانە پەداگوگتەردىڭ كاسىبي شەبەرلىگىن ارتتىرادى، — دەدى بالالاردى ەرتە دامىتۋ ينستيتۋتىنىڭ ديرەكتورى گۇلشات وڭلانبەكقىزى.
بايقاۋدا «جۇزدەن جۇيرىك، مىڭنان تۇلپار»، «التىن ساقا»، «ۇزدىك ويىنشىلار»، «بەلسەندى ويىنشىلار»، «تاپقىرلار مەن ەپتىلەر»، مەن «ۇزدىك ۇيىمداستىرىلعان ويىن الاڭى» اتالىمى بويىنشا جەڭىمپازدار انىقتالدى.
