SportPress.kz قازاقستان سپورت جاڭالىقتارى
ۋكراينا، گرۋزيا مەن پولشا قۇرامالارى ەۋروپا چەمپيوناتىنا جولداما الدى. ال قازاقستان جولداستىق كەزدەسۋدە ليۋكسەمبۋرگتەن جەڭىلدى.
قازاقستان قۇراماسى ليۋكسەمبۋرگ كومانداسىنان 1:2 ەسەبىمەن ەسە جىبەردى. ۇلتتىق قۇراما وسىنىڭ الدىندا 21 ناۋرىزدا ۇلتتار ليگاسىنىڭ جارتىلاي فينالىندا افينادا گرەكيادان 0:5 ەسەبىمەن ويسىراي جەڭىلسە، ليۋكسەمبۋرگ تبيليسيدە گرۋزياعا 0:2 ەسەبىمەن جول بەرگەن ەدى.
بۇل ماتچتا ءبىرىنشى بولىپ قوناقتار ەسەپ اشتى. ويىننىڭ 2-مينۋتىندا اسحات تاعىبەرگەننىڭ قاقپا الاڭىنا قاراي اۋەلەتىپ جىبەرگەن دوبىنا باسىن توسا قويعان 21 جاستاعى ادىلەت سادىبەكوۆ گولدىڭ اۆتورى اتاندى.
بىراق الاڭ يەلەرى ەسەپتى تەز ارادا تەڭەستىرىپ كەتتى. 24-مينۋتتا سلوۆاكيانىڭ «سلوۆان» كلۋبىنىڭ فورۆاردى جەلسون رودريگەش تارازى باسىن تەڭەستىردى. ودان كەيىن ليۋكسەمبۋرگتىڭ ويىنشىسى دانەل سيناني ۇزىلىسكە شىعار الدىندا تابلوداعى ەسەپتى وزگەرتتى.
ماتچتىڭ ەكىنشى تايمىندا قارسىلاستاردىڭ ءبىر-بىرىنە گول سالا العان جوق. ماتچتاعى ەسەپ 2:1 بولىپ الاڭ يەلەرىنىڭ پايداسىنا شەشىلدى.
ەندى ۇلتتىق قۇراما ماۋسىم ايىندا ارمەنيا كومانداسىمەن جولداستىق كەزدەسۋ وتكىزەدى. ال ۋكراينا، گرۋزيا مەن پولشا قۇراما كوماندالارى ەۋروپا چەمپيوناتىنا جولدامانى جەڭىپ الدى. ۋكرايندار وسىمەن قاتارىنان ءتورتىنشى رەت قۇرلىق چەمپيوناتىنا شىعىپ وتىرسا، گرۋزيا كومانداسى العاش رەت فۋتبول الامانعا قاتىسقالى وتىر.
ۋكراينا قۇراماسى پولشانىڭ ۆروتسلاۆ قالاسىندا يسلانديامەن ويناپ، 2:1 ەسەبىمەن جەڭىسكە جەتتى. بۇل ماتچتا ۋكرايندار 0:1 ەسەبىمەن جەڭىلىپ جاتىپ، ەكى بىردەي گولدى قارسىلاستار قاقپاسىنا توعىتتى. ءسويتىپ، ۋكراينا قۇراماسى سوڭعى ەكى ويىندا دا جەڭىلىپ جاتىپ، جەڭىستى ج ۇلىپ الدى. ولار وسىنىڭ الدىندا بوسنيا جانە گەرتسوگوۆينا قۇراماسىن 2:1 ەسەبىمەن جەڭگەن بولاتىن.
بۇل ماتچتا 30-مينۋتتا البەرت گۋدمۋندسسون ەسەپ اشسا، ۋكرايندار ەكى گولدى ويىننىڭ ەكىنشى جارتىسىندا سالدى. اۋەلى 54-مينۋتتا ۆيكتور تسىگانكوۆ ەسەپتى تەڭەستىرسە، 84-مينۋتتا ميحايل مۋدريك جەڭىس گولىنىڭ اۆتورى اتاندى. ال گرۋزيا مەن گرەكيا جانە ۋەلس پەن پولشا كوماندالارىنىڭ ماتچتارىندا ەسەپ اشىلعان جوق. بۇل ويىنداردا ەۋروپا چەمپيوناتىنا جولدامانىڭ تاعدىرى ماتچتىڭ سوڭىندا بەرىلگەن پەنالتيلەر سەرياسىندا شەشىلدى. مۇندا پولشا ۋەلستى پەنالتيدە 5:4 ەسەبىمەن، ال گرۋزيا گرەكيانى 4:2 ەسەبىمەن جەڭدى.
ءسويتىپ، ۇلتتار ليگاسىنان ەۋرو-2024 دوداسىنا ءۇش قۇراما قوسىلدى.
گرۋزيا قۇراماسىنىڭ سوڭعى، شەشۋشى پەنالتيىن قازاقستان پرەمەر-ليگاسىندا دوپ تەپكەن ويىنشى سالدى. ول — نيكا كۆەكۆەسكيري. 2017- 2020 جىلدارى قوستانايدىڭ «توبىل» كومانداسىنىڭ نامىسىن قورعاعان. قازاقستاننىڭ كۇمىس (2020) جانە قولا (2018) جۇلدەگەرى.
گرۋزيانىڭ ءۇشىنشى پەنالتيىن گرەكيانىڭ قاقپاسىنا سالعان ويىنشى دا قازاقستانعا جاقسى تانىس. لاشا دۆالي 2017 جىلى پاۆلوداردىڭ «ەرتىس» كلۋبىندا ويناعان.
ەندى ۋكراينا ەۋروپا چەمپيوناتىندا بەلگيا، سلوۆاكيا مەن رۋمىنيا قۇرامالارىمەن ءبىپ توپتا ويناسا، گرۋزيا تۇركيا، پورتۋگاليا مەن چەحيانىڭ توبىنا ءتۇستى. پولشا چەمپيوناتقا فرانتسيا، اۋستريا جانە نيدەرلاندپەن ءبىر توپتا قاتىسادى.
ەۋروپا چەمپيوناتى 14 ماۋسىم مەن 14 شىلدە ارالىعىندا گەرمانيانىڭ 10 قالاسىندا بولادى. ەۋرو-2024 دوداسىندا 24 ەلدىڭ ۇلتتىق قۇراما كوماندالارى كۇش سىناسادى.
داستان كەنجالين،
استانا
