SportPress.kz قازاقستان سپورت جاڭالىقتارى
بيىلعى جىلدىڭ باستى دوداسى — جازعى وليمپيالىق ويىنداردىڭ سالتاناتتى تۇردە اشىلاۋىنا 100 كۇن ۋاقىت قالدى.
وليمپيادا پاريج قالاسىندا 26 شىلدەسى مەن 11 تامىز ارالىعىندا بولادى.
پاريج قالاسى 2017 جىلدىڭ 13 قىركۇيەگىندە پەرۋدىڭ ليما قالاسىندا وتكەن حالىقارالىق وليمپيادالىق كوميتەتتىڭ 130-سەسسياسىندا 2024 جىلعى وليمپيادانى وتكىزەتىن قالا بولىپ ءبىراۋىزدان سايلاندى.
بۇعان دەيىن فرانتسيانىڭ استاناسى ءوز تاريحىندا ەكى رەت 1900 جانە 1924 جىلدارى تورتجىلدىقتىڭ باستى دوداسىن وتكىزدى. ەندى پاريج ۇلىبريتانيانىڭ استاناسى — لوندوننان (1908، 1948 جانە 2012) كەيىن ءۇش رەت وليمپيالىق ويىنداردى وتكىزگەن ەكىنشى قالا بولىپ وتىر.
بيىلعى وليمپيادا مەن پاراليمپيادا ويىندارىنىڭ ەمبلەماسى 2019 جىلدىڭ 21 قازانىندا ۇسىنىلدى.
وليمپيادا مەن پاراليمپيادا ويىندارىن ۇيىمداستىرۋ كوميتەتى 2022 جىلدىڭ 14 قاراشاسىندا تاليسمانداردى تانىستىردى.
وليمپيالىق ويىنداردىڭ باعدارلاماسىنا سپورتتىڭ 32 ءتۇرى كىرگەن. وعان 206 ەلدەن 10 500 سپورتشى قاتىسادى دەپ جوسپارلانىپ وتىر.
بيىل العاش رەت برەيكينگتەن مەدالدار تاراتىلادى. جۇلدەنىڭ بىرىنە قازاقستان دا ءۇمىتتى بولۋى مۇمكىن.
سەرفينگ دوداسى فرانتسيانىڭ ماتەريكتىك بولىگىندە ەمەس، تايتي ارالىندا وتەدى.
پاريج پەن تايتي ارالدارىرىڭ اراسى — 15 700 شاقىرىم. بۇل — وليمپيادا ويىندارىنىڭ رەكوردى. بۇعان دەيىن ەشبىر جارىس وليمپيادانى قابىلداۋشى قالادان سونشالىقتى الىس بولعان جوق.
تاريحتا تۇڭعىش رەت وليمپيادا مەن پاراليمپيادا ويىندارىنىڭ بويتۇمارى بىردەي بولادى.
فرانتسيا بيلىگى وليمپيادانى وتكىزۋ ءۇشىن 8 ميلليارد ەۋرودان استام قاراجات ءبولۋدى جوسپارلاعان.
پاريجدە العاش رەت حالىقارالىق سپورتتىق فەدەراتسيا جەڭىمپازدارعا سىياقى تاعايىندايدى. مۇنداي باستامانى الەمدىك جەڭىل اتلەتيكا ۇيىمى كوتەرىپ وتىر. 48 ديستسيپلينانىڭ بىرىندە جەڭىسكە جەتكەن ءاربىر اتلەت World Athletics تاراپىنان 50 مىڭ دوللار كولەمىندە سىياقى الادى. ەستافەتادا بۇل سومانى كوماندانىڭ ءاربىر قاتىسۋشىسى ءوزارا ءبولىپ الادى.
وليمپيادانىڭ اشىلۋى سەنا وزەنىندە وتەدى. سپورتشىلار شەرۋى وزەن ۇستىندە وتەدى. ءاربىر دەلەگاتسيا جەكەلەگەن قايىقپەن جۇزەدى.
پاريجدەگى وليمپيادا الاۋىنىڭ قازانى تيۋيلري ساياباعىندا ورناتىلادى. وليمپيادانىڭ الاۋى 16 ساۋىردە جاعىلدى.
وليمپيادانىڭ اشىلۋى كۇنى پاريجدەگى اۋە كەڭىستىگى جابىلادى.
پاريجدەگى وليمپيادا الاۋىنىڭ قازانى تيۋيلري ساياباعىندا ورناتىلادى.
جارىسقا بيلەتتى ادام قولىنان ساتىپ الۋعا بولمايدى. رەسمي تۇردە سپورتتىق جارىسقا كىرۋ ءۇشىن ارنايى سايتتاردى قولداناسىز.
ويىندى ۇيىمداستىرۋ ىسىنە 44 مىڭ ەرىكتى تارتىلعان. بار الەمنەن 26 مىڭ جۋرناليست اككرەديتاتسيا العان.
وليمپيالىق اۋىل 2021 جىلدان بەرى سوعىلدى.
وليمپيالىق اۋىلدى 2024 جىلعى ويىنداردىڭ باستالۋىنا بەس اي قالعاندا اشتى.
پاريجدە 6 100 كوشە بار. ونىڭ ەڭ كىشكەنتايى 5 مەتردەن ءسال اسادى.
اشىلۋ جانە جابىلۋ سالتاناتىنىڭ كوركەمدىك جەتەكشىسى – توماس دجوللي.
ويىننىڭ اشىلۋ سالتاناتى سەنا وزەنىندە وتسە، جابىلۋ سالتاناتى «ستاد دە فرانس» ستاديونىندا جوسپارلانعان.
گاندبول مەن ساداق اتۋدان جارىستار وليمپيادا اشىلۋىنا بىرنەشە كۇن قالعاندا باستالادى.
العاشقى جۇلدەلەر 27 شىلدەدە ساراپقا سالىنادى.
وليمپيادانىڭ سوڭعى جارىس كۇنىندە توعىز سپورت ءتۇرىنىڭ وكىلدەرى جۇلدەگە تالاسادى. سپورتشىلار 329 جۇلدە جيىنتىعىن ساراپقا سالادى.
جابىلۋ سالتاناتىندا ەستافەتانى اقش-قا جولدايدى. 2028 جىلعى جازعى وليمپيادا لوس-اندجەلەستە وتەدى.
2024 جىلعى وليمپيادا ويىندارىنىڭ ۇرانى — «كەڭىنەن اشىق ويىندار».
قازاقستان اتىنان ەڭ العاشقى ليتسەنزيانى ۆەلوسپورتتان 2023 جىلى تايلاندتا وتكەن ازيا چەمپيوناتىندا جەڭىپ الدى. قازىر قازاقستاندا سپورتتىڭ 12 تۇرىنەن 32 ليتسەنزيا (30 سپورتشى) بار.32-جولدامانى جاقىندا نيدەرلاندتىڭ روتتەردام قالاسىندا 42،1 شاقىرىمعا جۇگىرۋدەن (مارافون) وتكەن جارىستا جاننا ماماجانوۆا ەل رەكوردىن جاڭارتىپ، جەڭىپ الدى. ول 2 ساعات 26 مينۋت 42 سەكۋند جۇگىرىپ، مارەگە ءتورتىنشى بولىپ جەتتى.
30 جاستاعى جاننا ماماجانوۆا ەكىنشى رەت وليمپياداعا قاتىساتىن العاشقى مارافونشى بولىپ وتىر.
ەلىمىز تاۋەلسىزدىك العان كەزدەن بەرى بيىلعى دوداعا دەيىن 7 جازعى وليمپياداعا قاتىسىپ، 14 التىن، 22 كۇمىس، 35 قولا جۇلدە جەڭىپ العان.
بۇگىن استانادا «وليمپياداعا 100 كۇن قالدى» اتتى بىرقاتار ءىس-شارا ۇيىمداستىرىلدى.
كۇننىڭ العاشقى جارتىسىندا ترياتلون ساياباعىندا بەس شاقىرىمدىق بۇقارالىق جۇگىرۋ ءوتتى. ءىس-شارانىڭ ماقساتى – سپورتشىلاردى، ليتسەنزياعا ۇمىتكەرلەردى جانە ەلدەگى وليمپيادالىق قوزعالىستى قولداۋ.
تۇستەن كەيىن الەمدىك ارەنادا قازاقستان سپورتى ءۇشىن سەرپىلىس جاساعان سپورتشىلاردىڭ تاريحى، ەموتسيالارى مەن سەزىمدەرىنە ارنالعان «Qazaq Olympic Style – وتكەننەن بولاشاققا» اتتى كورمە اشىلدى.
كورمەگە قويىلعان ەكسپوناتتاردىڭ ىشىندە ريو-دە-جانەيرو وليمپياداسىنىڭ قولا جۇلدەگەرى ولگا رىپاكوۆانىڭ كوستيۋمى، سيدنەي وليمپياداسىنىڭ چەمپيونى ولگا شيشيگينانىڭ تاريحي سپورتتىق فورماسى، ەل تاريحىندا شاڭعى قوسسايىسىننان وليمپياداعا تۇڭعىش رەت قاتىسقان شىڭعىس راكپاروۆتىڭ سپورتتىق جيىنتىعى جانە 1980 جىلعى وليمپيادادا ونەر كورسەتكەن وتاندىق سپورتشىلاردىڭ قولتاڭباسى قويىلعان بىرەگەي كەنەپ بار.
ەل بويىنشا بارلىق مەكتەپتە وقۋشىلار اراسىندا وليمپيالىق ويىندارعا ارنالعان اكتسيا باستالدى. سونداي-اق شىعارماشىلىق جانە كوركەمدىك بايقاۋلار جاريالاندى.
