تەڭگە ىلۋدەن ءىىى ازيا چەمپيوناتىنا قاتىساتىن سپورتشىلار

تەڭگە ءىلۋ سپورتىنىڭ قىسقاشا تاريحى

ۇزاق  جىلدار بويى توي-مەرەكەلەردە شاعىن كورسەتىلىم رەتىندە عانا وينالىپ كەلگەن تەڭگە ءىلۋ ەلىمىزدىڭ ۇلتجاندى ازاماتتارىنىڭ كۇش سالۋىمەن تاۋەلسىزدىك جىلدارى ۇلتتىق سپورت ويىنى دارەجەسىنە كوتەرىلە باستادى. ۇلتتىق سپورت تۇرلەرى قاۋىمداستىعى اتقارعان جۇيەلى جۇمىستار 2013 جىلدان باستاپ ۇلتتىق سپورت جارىستارىن  حالىقارالىق دەڭگەيدە وتكىزۋدى ءبىر ىزگە ءتۇسىردى.

2007 جىلى تەڭگە ءىلۋدىڭ ارنايى ەرەجەسى جازىلىپ، ۇلتتىق سپورت تۇرلەرىنەن وتكىزىلگەن  قازاقستان   چەمپيوناتىندا العاش رەت ەرەسەكتەر اراسىندا تەڭگە ءىلۋ باسەكەسى ۇيىمداستىرىلدى.

2017 جىلى تەڭگە ىلۋدەن قازاقستان چەمپيوناتى الماتى قالاسىندا « ۇلى دالا ويىندارىمەن» بىرگە وتكىزىلدى. تەڭگە ىلۋدەن  XI رەت وتكەن بۇل چەمپيوناتتىڭ باس جۇلدەسىن ماعجان ساپاربەك (وڭتۇستىك قازاقستان وبلىسى) جەڭىپ الدى. ال، ءالىحان باشەمباەۆ (اقتوبە وبلىسى) 2 ورىندى،  زۇلپىحار بەيبارىس (الماتى قالاسى) 3 ورىندى يەلەندى.

جاستار  اراسىنداعى تەڭگە ءىلۋ باسەكەسىنىڭ تاريحى دا 2007 جىلدان باستاۋ الادى.

2017 جىلى جاستار اراسىنداعى چەمپيونات جامبىل وبلىسىندا ۇيىمداستىرىلدى. 11 رەت وتكەن بۇل جارىستا ءالىحان باشەمباەۆ (اقتوبە وبلىسى) چەمپيون اتاندى. ەكىنشى ورىن ماعجان ساپاربەككە (وڭتۇستىك قازاقستان وبلىسى) ءۇشىنشى ورىن ەرلان دۇيسەنبايعا (ماڭعىستاۋ وبلىسى) بۇيىردى.

2012 جىلى تەڭگە ىلۋدەن العاش رەت جاسوسپىرىمدەر اراسىنداعى چەمپيونات ۇيىمداستىرىلدى.

2017 جىلى شىمكەنتتە 6 رەت ۇيىمداستىرىلعان قازاقستان چەمپيوناتىنا 1999-2001 جىلى تۋعان جاسوسپىرىمدەر باق سىنادى. بۇل چەمپيوناتتا تەڭگە ءىلۋ باسەكەسىنىڭ ناتيجەسىندە 1 ورىندى – راحات قامباروۆ (وڭتۇستىك قازاقستان وبلىسى)،  2 ورىندى – زاڭعار قويباعاروۆ (جامبىل وبلىسى)، 3 ورىندى   – باقىتجان تورەحان (باتىس قازاقستان وبلىسى) جەڭىپ الدى.

2015 جىلى ەلوردا تورىندە تەڭگە ىلۋدەن ءى ازيا چەمپيوناتىنىڭ جالاۋى كوتەرىلدى. ازيانىڭ 8 مەملەكەتىنىڭ سپورتشىلارى باق سىناعان العاشقى ازيا چەمپيوناتىندا قازاقتىڭ قوس ساڭلاق ۇلى تالاسسىز جەڭىمپاز اتاندى.  وڭتۇستىكتىڭ وعلانى  عالىمجان ءىزجانوۆ باس جۇلدەنى جەڭىپ الدى. اقتوبەلىك ءالىحان باشىمباەۆ ازيانىڭ كۇمىس جۇلدەسىن يەلەندى. قولا جۇلدە موڭعوليالىق قانداسىمىز قۋاتحان ابدولعا بۇيىردى.

ەندى مىنە، ەلوردا تورىندەگى «قازانات» اتشابارىندا 1 ماۋسىم كۇنى تەڭگە ىلۋدەن ءىى ازيا چەمپيوناتىنىڭ جالاۋى كوتەرىلمەكشى. بۇل باسەكەدە 9 مەملەكەت سپورتشىلارى سىنعا تۇسەدى.  قازاق ەلى باپتاپ قوسقان ۇزدىك تەڭگە ىلۋشىلەر  مەن چەمپيوناتتا باق سىنايتىن شەتەلدىك تەڭگە ءىلۋ شەبەرلەرىنىڭ اتى-جونىمەن تانىس بولا وتىرىڭىزدار.

ماعجان ساپاربەك – 2001 جىلى تۋعان. تۋعان جەرى – وڭتۇستىك قازاقستان وبلىسى  قازىعۇرت اۋدانى، قازىعۇرت ەلدىمەكەنى. تەڭگە ءىلۋ سپورتىمەن 2014 جىلدان باستاپ شۇعىلدانعان. رەسپۋبليكالىق جارىستاردا كوپتەگەن جۇلدەلى ورىنداردى يەلەندى. 2016 جىلى  قازان ايىندا اقتوبە قالاسىندا وتكەن جاستار اراسىنداعى قازاقستان چەمپيوناتىندا – 1 ورىندى،  2017 جىلى الماتى قالاسىندا وتكەن ەرەسەكتەر اراسىنداعى ەل چەمپيوناتىندا 1 ورىندى جەڭىپ الدى.

قازاقستان رەسپۋبليكاسى ۇلتتىق قۇراما كومانداسىنىڭ مۇشەسى، قازاقستاننىڭ سپورت شەبەرى. ءىى ازيا چەمپيوناتىنا ىرىكتەۋ جارىسىندا ۇزدىك تانىلعان سپورتشى.

عالىمجان ءىزجانوۆ  – 1999 جىلى تۋعان. تۋعان جەرى – وڭتۇستىك قازاقستان وبلىسى  شىمكەنت قالاسى. تەڭگە ءىلۋ سپورتىمەن 2010 جىلدان باستاپ شۇعىلدانعان. كوپتەگەن رەسپۋبليكالىق جارىستاردىڭ جەڭىمپازى اتاندى.  تەڭگە ىلۋدەن 2015 جىلى شىمكەنت قالاسىندا وتكەن ءا.داۋىلباەۆ اتىنداعى رەسپۋبليكالىق ءتۋرنيردىڭ  جەڭىمپازى. 2016 جىلى جاسوسپىرىمدەر اراسىنداعى قازاقستان چەمپيوناتىنىڭ كۇمىس جۇلدەگەرى. 2017 جىلعى «اق بيداي» ءVى رەسپۋبليكالىق اۋىل سپورتى ويىندارىنىڭ چەمپيونى. 2015 جىلى استانا قالاسىندا تەڭگە ىلۋدەن وتكەن ءى اشىق ازيا چەمپيوناتىن جەڭىپ الدى.

تەڭگە ىلۋدەن ءىى ازيا چەمپيوناتىنا قاتىساتىن مەملەكەتتەر سپورتشىلارىنىڭ ءتىزىمى 

THE LIST OF PARTICIPANTS OF II ASIAN TENGE ILU CHAMPIONSHIP 

تولەگەن  جاكىتاي