Sý tasqyny: Arqalyqqa qarasty aýyldarda kıiz úıler tigildi (VIDEO)

Bolat Nazarbaevtyń «Salıqaly urpaq» qoǵamdyq qory Arqalyq qalasynyń tasqyn sýdan zardap shekken Ekidiń men Qyzyl juldyz aýyldarynyń turǵyndaryna 35 kıiz úı tigip berdi.

Arqalyq qalasynyń ákimi Ámirhan Asanovtyń aıtýynsha, qoǵamdyq qordyń dırektory Qasym Qasabekov arnaıy kelip, 32 kıiz úıdi Ekidiń aýylynyń turǵyndaryna tabys etti.

Alty qanatty aq shańqan kıiz úıler qurylyp, jerebe arqyly ıeleri anyqtaldy. Qıyn jaǵdaıda kómek kórsetkeni úshin «Salıqaly urpaq» qoǵamdyq qoryna Arqalyq qalasy ákiminiń orynbasary Meshitbaı Jumanov jyly lebizin bildirip, qor dırektory Qasym Qambarulyna qala ákiminiń alǵys hatyn tabys etse, aýyl aǵaıyndary rızashylyqpen ıyǵyna shapan japty.

Bul iske belgili jýrnalıst, Qazaqstan ulttyq telearnasynyń shef-redaktory Nurbek Bekbaýdyń da kómegi tıdi. Qasym Qasabekovtiń aıtýynsha, ol Nurbek Bekbaýdyń ıdeıasyn alyp, kıiz úılerdi qaz qatar tikken.

Arqalyq qalasyna qarasty Ekidiń men Qyzyl juldyz eldimekenderi tasqyn sý kezinde panasyz qalǵan halyq kóshirilgen bolatyn. Sondyqtan «Salıqaly urpaq» qoǵamdyq qorynyń músheleri jaǵdaıdy kózben kórý úshin osy aýyldarǵa arnaıy baryp, jergilikti turǵyndardyń jan-aıqaıyn tyńdap, qandaı muqtajdyq basym ekendigin bilgen edi. Ýaqytsha panalaıtyn kıiz úı suraǵan halyqtyń tilegi oryndaldy.

Sý tasqynynyń saldarynan barlyq dúnıe-múlkinen, malynan aıyrylǵan halyqtyń jaǵdaıy áli kúnge deıin tym kúrdeli ekendigine kózimiz jetti. Turǵyndardyń kópshiligi panalaıtyn oryn tappaı qınalyp otyr eken. Sondyqtan kóptiń tileýi — kıiz úı boldy. Biz ýáde etip, birden tapsyrys berdik. Tapsyrysymyz ýaqytynda daıyn bolyp, kıiz úılerdi aýyl ishine quryp, halyqqa tabys ettik, sózimizde turdyq. Bastysy, kıiz úılerdiń sapasyna mán berdik. Barlyǵy talapqa saı jasaldy. Jergilikti halyq rıza, sheksiz alǵystaryn bildirip jatyr. «Jumyla kótergen júk jeńil», — deıdi ǵoı. Sondyqtan, qandaı qıynshylyq bolsa da, halyqpen birge bolaıyq, — dedi «Salıqaly urpaq» qoǵamdyq qorynyń dırektory Qasym Qasabekov.

Eske sala ketsek, Arqalyq qalasyna qarasty Ekidiń men Qyzyl juldyz aýyldaryndaǵy sý tasqynynan 200-ge jýyq adam tikushaqtyń kómegimen qaýipsiz aımaqqa, Arqalyq qalasyndaǵy evakýaııalyq pýnktterge kóshirilgen edi. Jalpy, qala aýmaǵyndaǵy sý basqan aýyldarda 87 úı, al tek Ekidiń aýylynyń ózinde 38 baspana turýǵa jaramsyz dep tanylǵan.

Búginde jańa úılerdiń qurylysy bastalyp, halyqqa birte-birte ótemaqy tólenip, kásipkerler tarapynan da tıisti kómek kórsetilip jatyr. Al Arqalyqqa qonys aýdarǵan halyq qala ákimdiginiń muryndyq bolýymen qaladan úıler aldy.

Dastan KENJALIN,

ASTANA

 

View this post on Instagram

 

A post shared by Arqalyq qalasynyń ákimi (@amirhan_asanov_b)

 

View this post on Instagram

 

A post shared by dastan (@dastan_kenzhalin)