«قايرات» فۋتبول كلۋبىنا رەسەيلىك جاتتىقتىرۋشى كەلدى

الماتى قالاسىنىڭ «قايرات» فۋتبول كلۋبىنا رەسەيلىك الەكساندر كەرجاكوۆ باس جاتتىقتىرۋشى بولىپ تاعايىندالدى، دەپ حابارلادى fckairat.com.

بۇگىن ول كلۋبتىڭ سپورت بازاسىندا كوماندانىڭ باسشىلىق، باپكەرلەر قۇرامىمەن جانە ويىنشىلارمەن تانىستى.

باقىلاۋ كەڭەسىنىڭ توراعاسى قايرات بورانباەۆ كومانداعا جاڭا جاتتىقتىرۋشى ونىڭ كومەكشىلەرى رۋسلان ادجيندجال مەن ۆلاديمير كازاكوۆتى تانىستىردى. وسى كەزگە دەيىن كلۋبتىڭ باس جاتتىقتىرۋشىسى بولعان رافاەل ءۋرازباحتيننىڭ كوماندادا قالىپ، باسقا جۇمىسپەن اينالىساتىنى حابارلاندى.

«قايرات» فۋتبول كلۋبىنىڭ جاڭا جاتتىقتىرۋشىسى 41 جاستا.  ول رەسەي پرەمەر-ليگاسى مەن كۋبوك جولىنداعى ويىنداردا، ۇلتتىق قۇراما ساپىندا 233 گول سالعان. سانكت-پەتەربۋرگ قالاسىنىڭ «زەنيت» كلۋبىندا قارسىلاستار قاقپاسىن 161 رەت ءدال كوزدەسە،  رەسەي قۇراما كومانداسىندا ويناعان كەزىندە 30 گولدىڭ اۆتورى اتانعان.

ويىنشى رەتىندە «زەنيتتەن» بولەك، يسپانيانىڭ «سەۆيليا»، شۆەيتساريانىڭ «تسيۋريح» پەن ماسكەۋدىڭ «دينامو» كوماندالارىندا ويناعان.

ۋەفا كۋبوگىنىڭ، يسپانيا كۋبوگى مەن سۋپەركۋبوگىنىڭ، شۆەيتساريا كۋبوگىنىڭ يەگەرى. ءۇش دۇركىن رەسەي چەمپيونى، كۋبوك يەگەرى، ەكى مارتە ەل سۋپەركۋبوگىنىڭ، سونداي-اق پرەمەر-ليگا كۋبوگىنىڭ يەگەرى بولعان.

الەكساندر كەرجاكوۆ باپكەر قىزمەتىن 2017 جىلى «زەنيت» فك اكادەمياسىندا باستادى. 2018-2020 جىلدار ارالىعىندا رەسەيدىڭ U-17، U-18 بەن U-19 جاسوسپىرىمدەر قۇرامالارىن جاتتىقتىرعان. سونىمەن قاتار كەرجاكوۆ رەسەيلىك «توم»، «نيجني نوۆگورود»، كيپردىڭ «كارميوتيسسا» مەن سەربيانىڭ «سپارتاك» سۋبوتيتسا فۋتبول كلۋبتارىندا جاتتىقتىرۋشى بولىپ قىزمەت ەتكەن.

بيىل كەرجاكوۆ يسپانيانىڭ «سەۆيليا» مەن يتاليانىڭ «ينتەر» كلۋبتارىندا تاعىلىمدامادان ءوتتى.

2 ماۋسىمدا ساعات 19:00-دە «قايرات» QFL پرەمەر-ليگاسىنىڭ 10-تۋرىندا قاراعاندىنىڭ «شاحتەر» كلۋبىمەن وينايدى.