قازاق سپورتى — داريا، بالالار سپورتى — بۇلاق

جاراتىلعان ادامنىڭ بالالىق قۇشاعىندا قاناتى قاتايادى. سپورتتىڭ دا تابيعاتى  وسىنداي. بالالار سپورتى ىرگەتاس، سونى قالاۋ ارقىلى ۇلتتىق سپورت قامالى بويىن تىكتەيدى. مۇنى وي ەلەگىنەن وتكىزىپ، ارەكەتپەن جۇزەگە اسىرعان ەلدىڭ سپورتى دا وزىق. كەڭ قۇلاش جايعان اقش، رەسەي، قىتاي، گەرمانيا، جاپونيا سىندى سپورت بۇركىتتەرى قىراعىلى سونداي ءاۋ باستان وسى بالالار سپورتىنا ۇلتتىق سپورتتىڭ وركەندەۋىنىڭ كىلتى دەگەن ءمان بەرىپ تاستاعان.

جارتاسقا ۇرعىلاعان بۇلاقتاي قازاقستان دا كىلتتى كورە تۇرا كوپ ىزدەدى. ءالى دە ىزدەپ كەلەدى. باق-نىڭ ماسەلەنى كوتەرۋى، ىسمەر تۇلعالاردىڭ جاناشىرلىعى ارقاسىندا «Auyl sport – 2024» «Auyl football» جوبالارى قۇرىلدى. وعان «حالىق» قايىرىمدىلىق قورى مۇرىندىق بولدى.   بۇل جوبالاردىڭ باس ماقساتى ەل سپورتىن، ونىڭ ينفراقۇرىلىمىن دامىتۋ.   كومەيدەن توگىلەر سوزگە  وي تۇرتكى. ويدى قوزعاعان جوبا جوسپارى بۇعان دالەل.

«اۋىل فۋتبولى» جوباسى اياسىندا:

• 100 اۋىلدىق جاتتىقتىرۋشى ۋەفا ساناتىنداعى «D» بىلىكتىلىگى بويىنشا وقىتىلدى;
• 100 اۋىلدىق بالالار كومانداسى جاتتىعۋ قۇرالدارىمەن قامتاماسىز ەتىلدى;
• جاتتىقتىرۋشىلار مەن مەنەدجەرلەر – SMM كۋرسىن اياقتادى;
• جاتتىقتىرۋشىلار مەن مەنەدجەرلەر «سپورت سەكتسيالارىن جان باسىنا شاققانداعى قارجىلاندىرۋ» (ARTSport) مەملەكەتتىك باعدارلاماسى اياسىندا جۇمىس ىستەۋ بويىنشا سەگىز ساعاتتىق كۋرستان ءوتتى;
• ەڭ بەلسەندى جاتتىقتىرۋشىلار مەن مەنەدجەرلەر الداعى ۋاقىتتا «فۋتبولدى باسقارۋ» 20 ساعاتتىق كۋرسىنان وتەدى;
• قارعالى اۋىلىنداعى BAQSY دەنە شىنىقتىرۋ-ساۋىقتىرۋ كەشەنى بازاسىندا اۋىل فۋتبول ۇلتتىق قۇراماسىنىڭ ءۇش جاتتىعۋ نىسانى ساقاداي ساي تۇر» دەپ حابارلادى Halyk قايىرىمدىلىق قورى.

«AUYL SPORT» جوباسىنىڭ ماقساتى:

• اۋىلدىق ەلدىمەكەندەردەگى سپورتتى دامىتۋ;
• اۋىلداعى جاتتىقتىرۋشىلاردىڭ بىلىكتىلىگىن ارتتىرۋ;
• اۋىلدىق جەرلەردەگى بالالاردى سپورتقا تارتۋ;
• بۇقارالىق سپورتتى ناسيحاتتاۋ;

جوبا 6 نەگىزگى سپورت ءتۇرىن قامتيدى: بوكس، كۇرەس، كاراتە، باسكەتبول، ۆولەيبول جانە شاحمات. جاس ەرەكشەلىگى 8-14 جاس.

ماسەلە ءىستى بىتىرگەن دە ەمەس، باستاعان دا دەمەۋشى مە ەدى اباي. مىنە، اقىرى ەل بوپ، باس بولىپ، تاۋەكەل دەپ جۇمىلا كىرىستىك. بۇ جولدا باستاماعا ەل بوپ ارتىنىپ-تارتىنىپ جۇدىرىقتاي  جۇمىلا تۇسكەنىمىز جاقسىلىقتىڭ نىشانى دا.  ويىما تۇزدىق قازاق سپورت جانە تۋريزم اكادەمياسىنىڭ تاربيە جانە سپورتتىق جۇمىس پرورەكتورى مۇحتار ەسقاليەۆتىڭ ءسوزى. «الەمدى باعىندىرىپ جۇرگەن جۇلدەگەرلەردىڭ كوپشىلىگى اۋىلدان شىققان. جوباعا بارلىعى اتسالىسادى. اكادەميانىڭ پروفەسسورلىق وقىتۋشىلار قۇرامى دا جوبانىڭ دامۋىنا ۇلەس قوسادى»

قازاق ابايىنىڭ ويىنان ءىس باستاسا، قادىر مىرزا ءالىنىڭ ماسەلە ءىستى باستاعان مەن ءبىتىرۋ قيىن دەگەنىن ەستە ۇستاسا يگى. جەڭىس- تاۋەكەل دەپ باس سۇعۋ. ۇلى جەڭىس- تاۋەكەل كەمەسىن جاعاعا جەتكىزۋ.

قازاق سپورتى—داريا. بالالار سپورتى—بۇلاق. بۇلاقتاردىڭ ءبارى دە قازاق سپورتى دارياسىنا قۇيا بەرسىن! قۇيا بەرسىن!

ءدىلناز بيشەر

الماتى