اسۋ بەرمەس اسقار جوق

جۋىردا الماتى وبلىسى ەسىك ەلدى مەكەنىندە دزيۋدو كۇرەسىنەن 2013-2014 جىلدارى تۋعان كىشى جاسوپىرىمدەر اراسىندا الماتى وبلىسىنىڭ اشىق بىرىنشىلىگى بولىپ ءوتتى.

تاۋەلسىزدىك كۇنىنە ارنالعان بوتا بالۋاندار اراسىنداعى جارىس ەسىك قالاسىنداعى №1 بالالار مەن جاسوسپىرمدەر سپورت مەكتەبىنىڭ شاڭىراعىندا ۇيىمداستىرىلعان ەدى. بۇگىنگى تاڭدا اۋىل جاستارىنىڭ دزيۋدو كۇرەسىنە قىزىعۋشىلىق تانىتىپ، كوپتەپ كۇرەس ۇيىرمەلەرىنە جازىلىپ توبىن جازباي كەلە باستاۋى كوڭىل قۋانتادى. ونىڭ باستى سەبەبى وتكەن پاريج وليمپياداسىندا التىن جۇلدەنى جەڭىپ العان قازاقتىڭ ءاپايتوس اقتاڭگەر بالۋانى ەلدوس سمەتوۆتەي ەر تۇلعانىڭ وسكەلەڭ ۇرپاققا ۇلكەن ۇلگى بولىپ قالۋىندا دەپ ويلايمىز. «جۇيرىك الىسقا، جىگىت نامىسقا شابادى»، دەمەكشى، پاريج وليمپياداسىندا وزگە سپورت تۇرلەرىندەگى وعلاندارىمىز التىن جۇلدەنىڭ سىڭعىرىن ەستىمەي تىم-تىرىس جاتقان كەزدە ەلدوس سمەتوۆ پەن عۇمار قىرعىزباەۆتاردىڭ ەل قورجىنىنا التىن مەن قولا مەدال سالىپ بەرۋى ميللونداعان جانكۇيەرىمىزدى ءبىر سەرىپىلتىپ قانا قايماي، وسى سپورت تۇرىنە بالالارىن جەتەلەپ اكەلىپ بەرۋىنە جول اشتى. مىنە، سونىڭ ناتيجەسىن وسىنداي ەل اراسىندا وتكەن بوتا بالۋانداردىڭ اراسىنداعى الامان جەكپە-جەكتەردە كۇا بولىپ كەلەمىز. ەسىك قالاسىندا وتكەن جارىسقا قوناەۆ قالاسى، بالقاش اۋدانى، ىلە، قاراساي، ۇيعىر، رايىمبەك، جامبىل، كەگەن، تالعار مەن ەڭبەكشىقازاق اۋداندارىنان 300 گە جۋىق بالۋان كەلىپ قاتىسىپ، 17 سالماقتا ءوزارا مىقتىلاردا انىقتادى.

كۇرەس الاڭىندا دزيۋدونىڭ قىر-سىرىن ۇستازىنان ۇعىپ ەندى عانا ءدۇبىرلى تۋرنيرلەرگە ۇركە كەلىپ كەلىپ قاتىسىپ وتىرعان بالا بالۋاندىڭ جەكپە-جەگىنە كورىپ ءتانتى بولدىق. جەر بەتىندە نامىسىن تۋ ەتكەن ءبىر ۇلت بولسا ول قازاق دەر ەدىك. ماڭدايدان تەر شىقپاي، جەڭىلسە كوزىنەن جاس شىقپاي جەڭىسكە جەتۋ مۇمكىن ەمەس ەكەنىن جاس جەتكىنشەكتەر جاقسى بىلە باستاعان سەكىلدى. بابامىز مۇندايدا «جىعىلىپ جىلاماي بالا وسپەيدى ، قاراپ سىلاماي تال وسپەيدى»، دەپ جاتادى. كەيبىرى جەڭىلىپ قالعانىنا نامىستانىپ بوزكىلەمنەن شىعا بەرە كوز جاستارىنا ەرىك بەرىپ جاتىر. مۇنى بايقاي وتىرىپ، نامىستى بالۋان بالاپاندارىمىزدىڭ الار اسۋلارى ءالى الدا دەپ تۇيدىك. سوندىقتاندا قىزىعى دا قۋانا قول سوقتىق. نامىس بار جەردە تابىس بولاتىنىنى سەنىمىمىز زور. ويتكەنى «اسۋ بەرمەس اسقار جوق»، دەمەكشى، وسى بالالاردىڭ اراسىنان ەرتەڭ ەلدوس سەكىلدى اعا بۋىن الىپتاردىڭ ءىزىن باسار وليمپيادا، الەم چەمپيوندارى شىعاتىنىنا ءتىپتى كۇمان جوق. سونىمەن دۇبىرىمەن ءدۇيىم جۇرتتى ۇيىرگەن بۇل ءتۋرنيردىڭ اشىلۋ سالتاناتىن دا ۇيىمداستىرۋشىلاردىڭ جوسپارىنىن شىقپاي جوعارى دەڭگەيدە ءوتتى.

جارىستىڭ اشىلۋىندا ەڭبەكشىقازاق اۋدانىنىڭ اكىمىنىڭ كەڭەسشىسى، الماتى وبلىسىنىڭ سامبو كۇرەسى فەدەراتسياسىنىڭ ۆيتسە-پرەزيدەنتى باقىتبەك تولگەن ۇلى ساقالوۆ، الماتى وبلىسى پروكۋراتۋراسىنىڭ كادرلىق جۇمىس توبىنىڭ اعا پروكۋرورى ەرجان بولات ۇلى مەدەۋباەۆ، ەڭبەكشىقازاق اۋدانىنىڭ پروكۋرورى باۋىرجان ماراتبەك ۇلى قىبىراەۆ، دزيۋدو كۇرەسىنەن قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى تولەگەن ساميدين ۇلى سۇلتانوۆ، قازاق كۇرەسىنەن قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى قاپار توقتارباي ۇلى راۋانوۆ، قازاق كۇرەسىنەن الەمنىڭ ەكى دۇركىن چەمپيونى باۋىرجان ءتالىپ پەن ەڭبەكشىقازاق اۋدانىنىڭ №1 بالالار مەن جاسوسپىرىمدەر سپورت مەكتەبىنىڭ ديرەكتورى  اباي قانات ۇلى سىرعاباەۆ قاتىسىپ، ءجاسوسپىرىم بالۋاندارعا جاراقاتسىز جەڭىستى جەكپە-جەكتەر تىلەدى. سونىمەن كۇن ۇزاق بوزكىلەمدە جەڭىس ءۇشىن بار شەبەرلىكتەرىن كورسەتكەن جاسوپىرىمدەردىڭ اراسىنان ۇزدىك شىققانداردىڭ ەسىمدەرى دە بەلگىلى بولدى.

جارىس قورتىندىسى بويىنشا ا.مۇساباەۆ (قوناەۆ ق.) ا.دۇيسەنباي (تالعار اۋدانى) س.قۋات ۇلى (قىزىل تۋ) ع.تۇرسىنباي (ەڭبەكشىقازاق اۋدانى) ن.باعدات (ەڭبەكشىقازاق اۋدانى) ي.ءىلياسوۆ ي. (ەڭبەكشىقازاق اۋدانى) ا.زيناليەۆ (ىلە اۋد) ا. سەرىك (ايمەن) ا. كادىرحان (تالعار اۋدانى) ا.سايلاۋبەك (كىزىل تۋ)، ە.جەكسەنبەك (ەڭبەكشىقازاق اۋدانى) م.ماقسۇتوۆ (ايمەن) ك. ورىن ديلشاتوۆ (ەڭبەكشىقازاق اۋدانى №2) د.ءشارىپباي (ج.ۇشكەمپىروۆ بجسم) ب.پالمۋرزا (ەڭبەكشىقازاق اۋدانى) م.سۇلتان (تالعار اۋدانى)، ج.كۇلباەۆ ج. (كىربالتاباي) مەن ەڭبەكشىقازاق اۋدانىنان كەلگەن ا. نۋريەۆتەر جارىس جەڭىمپازدارى اتانىپ، ۇلكەن قوشامەتكە يە بولدى. نەگىزى بالۋان بالالاردىڭ تاجىربيەسى تولىعىپ، شەبەرلىكتەرىنىڭ ءوسۋى ءۇشىن وسىنداي تۋرنيرلەردىڭ ءجيى ۇيىمداستىرىلىپ تۇرۋىنىڭ ماڭىزى زور. سوندىقتاندا كوپتەگەن بوتا بالۋانداردىڭ ۇلى دۇبىرگە قوسىلا شابۋى ءۇشىن ايتۋلى ءتۋرنيردىڭ قوسقان ۇلەسى ەرەكشە دەپ ايتار ەدىك.

اقىن ورداباي ۇلى،

الماتى وبلىسى