Asý bermes asqar joq

Jýyrda Almaty oblysy Esik eldi mekeninde dzıýdo kúresinen 2013-2014 jyldary týǵan kishi jasópirimder arasynda Almaty oblysynyń ashyq birinshiligi bolyp ótti.

Táýelsizdik kúnine arnalǵan bota balýandar arasyndaǵy jarys Esik qalasyndaǵy №1 Balalar men jasóspirmder sport mektebiniń shańyraǵynda uıymdastyrylǵan edi. Búgingi tańda aýyl jastarynyń dzıýdo kúresine qyzyǵýshylyq tanytyp, kóptep kúres úıirmelerine jazylyp tobyn jazbaı kele bastaýy kóńil qýantady. Onyń basty sebebi ótken Parıj Olımpıadasynda altyn júldeni jeńip alǵan qazaqtyń apaıtós aqtańger balýany Eldos Smetovteı er tulǵanyń óskeleń urpaqqa úlken úlgi bolyp qalýynda dep oılaımyz. «Júırik alysqa, jigit namysqa shabady», demekshi, Parıj Olımpıadasynda ózge sport túrlerindegi oǵlandarymyz altyn júldeniń syńǵyryn estimeı tym-tyrys jatqan kezde Eldos Smetov pen Ǵumar Qyrǵyzbaevtardyń el qorjynyna altyn men qola medal salyp berýi mıllondaǵan jankúıerimizdi bir seripiltip qana qaımaı, osy sport túrine balalaryn jetelep ákelip berýine jol ashty. Mine, sonyń nátıjesin osyndaı el arasynda ótken bota balýandardyń arasyndaǵy alaman jekpe-jekterde kúá bolyp kelemiz. Esik qalasynda ótken jarysqa Qonaev qalasy, Balqash aýdany, Ile, Qarasaı, Uıǵyr, Raıymbek, Jambyl, Kegen, Talǵar men Eńbekshiqazaq aýdandarynan 300 ge jýyq balýan kelip qatysyp, 17 salmaqta ózara myqtylarda anyqtady.

Kúres alańynda dzıýdonyń qyr-syryn ustazynan uǵyp endi ǵana dúbirli týrnırlerge úrke kelip kelip qatysyp otyrǵan bala balýandyń jekpe-jegine kórip tánti boldyq. Jer betinde namysyn tý etken bir ult bolsa ol qazaq der edik. Mańdaıdan ter shyqpaı, jeńilse kózinen jas shyqpaı jeńiske jetý múmkin emes ekenin jas jetkinshekter jaqsy bile bastaǵan sekildi. Babamyz mundaıda «jyǵylyp jylamaı bala óspeıdi , qarap sylamaı tal óspeıdi», dep jatady. Keıbiri jeńilip qalǵanyna namystanyp bozkilemnen shyǵa bere kóz jastaryna erik berip jatyr. Muny baıqaı otyryp, namysty balýan balapandarymyzdyń alar asýlary áli alda dep túıdik. Sondyqtanda qyzyǵy da qýana qol soqtyq. Namys bar jerde tabys bolatynyny senimimiz zor. О́ıtkeni «asý bermes asqar joq», demekshi, osy balalardyń arasynan erteń Eldos sekildi aǵa býyn alyptardyń izin basar Olımpıada, álem chempıondary shyǵatynyna tipti kúmán joq. Sonymen dúbirimen dúıim jurtty úıirgen bul týrnırdiń ashylý saltanatyn da uıymdastyrýshylardyń josparynyn shyqpaı joǵary deńgeıde ótti.

Jarystyń ashylýynda Eńbekshiqazaq aýdanynyń ákiminiń keńesshisi, Almaty oblysynyń Sambo kúresi federaııasynyń vıe-prezıdenti Baqytbek Tólgenuly Saqalov, Almaty oblysy prokýratýrasynyń kadrlyq jumys tobynyń aǵa prokýrory Erjan Bolatuly Medeýbaev, Eńbekshiqazaq aýdanynyń prokýrory Baýyrjan Maratbekuly Qybyraev, dzıýdo kúresinen Qazaqstan Respýblıkasynyń eńbek sińirgen jattyqtyrýshysy Tólegen Samıdınuly Sultanov, qazaq kúresinen Qazaqstan Respýblıkasynyń eńbek sińirgen jattyqtyrýshysy Qapar Toqtarbaıuly Raýanov, qazaq kúresinen álemniń eki dúrkin chempıony Baýyrjan Tálip pen Eńbekshiqazaq aýdanynyń №1 Balalar men jasóspirimder sport mektebiniń dırektory  Abaı Qanatuly Syrǵabaev qatysyp, jasóspirim balýandarǵa jaraqatsyz jeńisti jekpe-jekter tiledi. Sonymen kún uzaq bozkilemde jeńis úshin bar sheberlikterin kórsetken jasópirimderdiń arasynan úzdik shyqqandardyń esimderi de belgili boldy.

Jarys qortyndysy boıynsha A.Musabaev (Qonaev q.) A.Dúısenbaı (Talǵar aýdany) S.Qýatuly (Qyzyl tý) Ǵ.Tursynbaı (Eńbekshiqazaq aýdany) N.Baǵdat (Eńbekshiqazaq aýdany) I.Ilııasov I. (Eńbekshiqazaq aýdany) A.Zınalıev (Ile aýd) A. Serik (Aımen) A. Kadyrhan (Talǵar aýdany) A.Saılaýbek (Kyzyl tý), E.Jeksenbek (Eńbekshiqazaq aýdany) M.Maqsutov (Aımen) K. Oryn Dılshatov (Eńbekshiqazaq aýdany №2) D.Sháripbaı (J.Úshkempirov BJSM) B.Palmýrza (Eńbekshiqazaq aýdany) M.Sultan (Talǵar aýdany), J.Kúlbaev J. (Kyrbaltabaı) men Eńbekshiqazaq aýdanynan kelgen A. Nýrıevter jarys jeńimpazdary atanyp, úlken qoshametke ıe boldy. Negizi balýan balalardyń tájirbıesi tolyǵyp, sheberlikteriniń ósýi úshin osyndaı týrnırlerdiń jıi uıymdastyrylyp turýynyń mańyzy zor. Sondyqtanda kóptegen bota balýandardyń uly dúbirge qosyla shabýy úshin aıtýly týrnırdiń qosqan úlesi erekshe dep aıtar edik.

Aqyn ORDABAIULY,

Almaty oblysy