قازاقستان ساداق اتۋدان ازيا كۋبوگىنىڭ كەزەڭىندە قولا جۇلدە الدى

سينگاپۋردا ساداق اتۋدان ازيا كۋبوگىنىڭ كەزەڭى بولىپ جاتىر.

جارىستا قازاقستان ساداقشىلارى ايەلدەر كوماندالارى اراسىندا بلوكتىق ساداق اتۋدان قولا مەدال ءۇشىن باق سىنادى.

قازاقستان قۇراماسى بانگلادەش سپورتشىلارىمەن نىسانا كوزدەپ، ولاردى 230:224 ەسەبىمەن جەڭدى. كوماندانىڭ نامىسىن ادەل جەكسەنبينوۆا، روكسانا يۋنۋسوۆا مەن ۆيكتوريا ليان قورعادى.

ەندى ازيا كۋبوگىنىڭ التىن جۇلدەسى ءۇشىن ءۇندىستان مەن مالايزيا كوماندالارى باق سىنايدى.

جارتىلاي فينالدا قازاقستان قۇراماسى ءۇندىستاننان نەبارى ءبىر ۇپاي ارتتا قالىپ، جەڭىلگەن بولاتىن. ەسەپ 229:230 بولعان.

داستان كەنجالين،

استانا

فوتو: ۇلتتىق وليمپيادالىق كوميتەت