ءۇش تۇلعاعا ارنالعان ەسكەرتكىش تاقتا

قازاق سپورتىندا اتتارى ايشىقتى تۇلعالاردىڭ اراسىندا تيمۋر قامال ۇلى دوسىمبەتوۆ، ەدۋارد فەرديناندوۆيچ ايريح پەن قازبەك داۋلەتبەك ۇلى بايبولوۆتاردىڭ ەسىمدەرى ەرەكشە ايتىلادى. بۇل ءۇش ازاماتتىڭ قازاقستان سپورتىنىڭ دامۋىنا ءوز سالالارى بويىنشا سالىپ كەتكەن سارا جولىن جاس ۇرپاق ۇمىتپاس دەپ بىلەمىز.

ايتۋلى ءۇش تۇلعانىڭ قول استىنان تاربيە العان جۇزدەگەن سپورتشىلار ەلىمىزدىڭ كوك بايراعىن الەمدىك ارەنالاردا ابىرويمەن جەلبىرەتىپ، جەڭىس بيىگىنەن كورىنىپ كەلەدى. مىسالى، قازبەك داۋلەتبەك ۇلى بايبولوۆ كسرو-عا ەڭبەگى سىڭگەن جاتتىقتىرۋشى، دوپتى حوككەيدەن كەڭەس وداعىنىڭ سپورت شەبەرى، اتى ايگىلى دوپتى حوككەيدەن «دينامو» كلۋبىنىڭ باس باپكەرى بولسا، ەدۋارد فەرديناندوۆيچ ايريح كسرو-عا ەڭبەگى سىڭگەن جاتتىقتىرۋشى، قازاق كسر-نا ەڭبەگى سىڭگەن جاتتىقتىرۋشى، قازاقستاندا كوگالداعى حوككەي مەن دوپتى حوككەيدىڭ نەگىزىن قالاعان جان. سونىمەن قاتار «دينامو» كلۋبىنىڭ باس باپكەرى، 19 دۇركىن كسرو چەمپيونى، دوپتى حوككەيدەن ەۋروپا چەمپيوندارى كۋبوگىنىڭ يەگەرى. ال، تيمۋر قامال ۇلى دوسىمبەتوۆ كسرو-عا ەڭبەگى سىڭگەن جاتتىقتىرۋشى، قازىرگى بەسسايىستان الەم چەمپيونى، ۇلتتىق وليمپيادا كوميتەتىنىڭ تۇڭعىش پرەزيدەنتى، «دينامو» دەنە شىنىقتىرۋ جانە سپورت قوعامى توراعاسىنىڭ ءبىرىنشى ورىنباسارى بولعان تانىمال تۇلعا.

مىنە، وسىنداي قازاق سپورتىنىڭ دامۋىنا وراسان ۇلەسىن قوسقان تۇلعالاردىڭ ەسىمدەرىن كەلەر ۇرپاق ۇمىتپاي ەسكە الىپ، قالدىرىپ كەتكەن مول قازىناسىنان ۇلگى-ونەگە الۋعا مىندەتتى دەپ ويلايمىز.

جۋىردا الماتى قالاسىندا ورنالاسقان «دينامو» دەنە شىنىقتىرۋ جانە سپورت قوعامىنىڭ «دينامو» ستاديونىنىڭ قابىرعاسىنا اتتارى ەلگە ايگىلى ءۇش تۇلعانى ۇلىقتاۋ ماقساتىندا مەموريالدىق ەسكەرتكىش تاقتا قويىلدى.

سالتاناتتى ءىس-شارانىڭ اشىلۋىنا قاتارلارى سيرەپ قالعان اتتارى ايگىلى حوككەيدىڭ ارداگەرلەرى دە كەلگەن ەكەن. سونىمەن بىرگە قازبەك بايبولوۆتىڭ ۇلى مۇحتار قازبەك ۇلى دا كەلىپ قاتىسىپ، اكە رۋحىنا قويىلعان تاقتاعا تاعزىم ەتتى. الدىمەن ءسوز العان «دينامو» دەنە شىنىقتىرۋ جانە سپورت قوعامدىق بىرلەستىگى توراعاسىنىڭ ءبىرىنشى ورىنباسارى اسقار ءاليراحىم ۇلى ومارقۇلوۆ، قازاق سپورتىندا وشپەس ءىز قالدىرعان ءۇش تۇلعانىڭ ەسىمى ەشقاشان ۇمىتىلمايتىنىن ءسوز ەتىپ، جاس ديناموشىلار ءۇشىن اشىلىپ وتىرعان تاقتانىڭ ءمانى زور ەكەندىگىنە توقتالا كەتتى.

سودان كەيىن «گەنارالدار كەڭەسى» رەسپۋبليكالىق قوعامدىق بىرلەستىكتىڭ توراعاسى بەكسۇلتان سارسەك ۇلى سارسەكوۆ، «ارداگەرلەر كەڭەسى» قوعامدىق بىرلەستىگىنىڭ توراعاسى اسىلكەن ساعىنجان بايبولوۆ، دوپتى حوككەيدەن كسرو چەمپيونى، كوگالداعى حوككەيدەن كسرو-نىڭ 4 دۇركىن چەمپيونى، قازاق كسر-نا ەڭبەگى سىڭگەن جاتتىقتىرۋشى بوريس الەكساندروۆيا چەحلىستوۆ جانە قر ۇلتتىق وليمپيدا كوميتەتىنىڭ باس حاتشىسى ءالىمجان ۇبايدۇللا ۇلى اقاەۆ بۇگىنگى اشىلىپ وتىرعان قۋانىشتى ءىس-شاراعا قاتىستى ءوز ويلارىن ورتاعا سالىپ قۋانىشتارىمەن ءبولىستى.

سالتاناتتى ءىس-شارادا 1 مينۋتتىق ۇنسىزدىك جاريا ەتىلىپ بارىپ، مەموريالدىق ەسكەرتكىش تاقتانىڭ شىمىلدىعى ءتۇرىلدى. وسىلايشا، قازاق سپورتىندا ۇمىتىلماس ءىز قالدىرعان ءۇش تۇلعاعا گۇل شوقتارى قويىلىپ، ارداگەرلەر مەن ءجاسوسپىرىم ديناموشالار ەستەلىككە فوتوسۋرەتكە ءتۇستى.

اقىن ورداباي ۇلى،

الماتى