Úsh tulǵaǵa arnalǵan eskertkish taqta

Qazaq sportynda attary aıshyqty tulǵalardyń arasynda Tımýr Qamaluly Dosymbetov, Edýard Ferdınandovıch Aırıh pen Qazbek Dáýletbekuly Baıbolovtardyń esimderi erekshe aıtylady. Bul úsh azamattyń Qazaqstan sportynyń damýyna óz salalary boıynsha salyp ketken sara jolyn jas urpaq umytpas dep bilemiz.

Aıtýly úsh tulǵanyń qol astynan tárbıe alǵan júzdegen sportshylar elimizdiń kók baıraǵyn álemdik arenalarda abyroımen jelbiretip, jeńis bıiginen kórinip keledi. Mysaly, Qazbek Dáýletbekuly Baıbolov KSRO-ǵa eńbegi sińgen jattyqtyrýshy, dopty hokkeıden Keńes Odaǵynyń sport sheberi, aty áıgili dopty hokkeıden «Dınamo» klýbynyń bas bapkeri bolsa, Edýard Ferdınandovıch Aırıh KSRO-ǵa eńbegi sińgen jattyqtyrýshy, Qazaq KSR-na eńbegi sińgen jattyqtyrýshy, Qazaqstanda kógaldaǵy hokkeı men dopty hokkeıdiń negizin qalaǵan jan. Sonymen qatar «Dınamo» klýbynyń bas bapkeri, 19 dúrkin KSRO chempıony, dopty hokkeıden Eýropa chempıondary kýbogynyń ıegeri. Al, Tımýr Qamaluly Dosymbetov KSRO-ǵa eńbegi sińgen jattyqtyrýshy, qazirgi bessaıystan álem chempıony, Ulttyq Olımpıada komıtetiniń tuńǵysh prezıdenti, «Dınamo» Dene shynyqtyrý jáne sport qoǵamy tóraǵasynyń birinshi orynbasary bolǵan tanymal tulǵa.

Mine, osyndaı qazaq sportynyń damýyna orasan úlesin qosqan tulǵalardyń esimderin keler urpaq umytpaı eske alyp, qaldyryp ketken mol qazynasynan úlgi-ónege alýǵa mindetti dep oılaımyz.

Jýyrda Almaty qalasynda ornalasqan «Dınamo» Dene shynyqtyrý jáne sport qoǵamynyń «Dınamo» stadıonynyń qabyrǵasyna attary elge áıgili úsh tulǵany ulyqtaý maqsatynda memorıaldyq eskertkish taqta qoıyldy.

Saltanatty is-sharanyń ashylýyna qatarlary sırep qalǵan attary áıgili hokkeıdiń ardagerleri de kelgen eken. Sonymen birge Qazbek Baıbolovtyń uly Muhtar Qazbekuly da kelip qatysyp, áke rýhyna qoıylǵan taqtaǵa taǵzym etti. Aldymen sóz alǵan «Dınamo» Dene shynyqtyrý jáne sport qoǵamdyq birlestigi tóraǵasynyń birinshi orynbasary Asqar Álırahymuly Omarqulov, qazaq sportynda óshpes iz qaldyrǵan úsh tulǵanyń esimi eshqashan umytylmaıtynyn sóz etip, jas dınamoshylar úshin ashylyp otyrǵan taqtanyń máni zor ekendigine toqtala ketti.

Sodan keıin «Genaraldar keńesi» Respýblıkalyq qoǵamdyq birlestiktiń tóraǵasy Beksultan Sársekuly Sársekov, «Ardagerler keńesi» qoǵamdyq birlestiginiń tóraǵasy Asylken Saǵynjan Baıbolov, dopty hokkeıden KSRO chempıony, kógaldaǵy hokkeıden KSRO-nyń 4 dúrkin chempıony, Qazaq KSR-na eńbegi sińgen jattyqtyrýshy Borıs Aleksandrovııa Chehlystov jáne QR Ulttyq Olımpıda komıtetiniń bas hatshysy Álimjan Ubaıdullauly Aqaev búgingi ashylyp otyrǵan qýanyshty is-sharaǵa qatysty óz oılaryn ortaǵa salyp qýanyshtarymen bólisti.

Saltanatty is-sharada 1 mınýttyq únsizdik jarııa etilip baryp, memorıaldyq eskertkish taqtanyń shymyldyǵy túrildi. Osylaısha, qazaq sportynda umytylmas iz qaldyrǵan úsh tulǵaǵa gúl shoqtary qoıylyp, ardagerler men jasóspirim dınamoshalar estelikke fotosýretke tústi.

Aqyn ORDABAIULY,

ALMATY