استانادا سپورت ارداگەرلەرىنىڭ ءبىرىنشى رەسپۋبليكالىق فورۋمى باستالدى

16-17 تامىز كۇندەرى استانادا سپورت كۇنى قارساڭىندا تۋريزم جانە سپورت مينيسترلىگىنىڭ قولداۋىمەن قازاقستان سپورت ارداگەرلەرى وداعىنىڭ قۇرىلۋىنا وراي سپورت ارداگەرلەرىنىڭ ءبىرىنشى رەسپۋبليكالىق فورۋمى بولادى.

قازاقستان سپورت ارداگەرلەرى وداعى بيىل اقپان ايىندا قۇرىلعان. ونىڭ ماقساتى – ەلىمىزدىڭ جەر جەرىندە قوعامدىق بىرلەستىكتىڭ فيليالدارىن قۇرىپ، جەرگىلىكتى جەردە ەسىمدەرى ەلەنبەي، ەسكەرىلمەي، ۇمىتىلىپ بارا جاتقان سپورت ارداگەرلەرىن الەۋمەتتىك-تۇرمىستىق جاعىنان قولداپ، ءتيىستى كوڭىل ءبولۋ.

قازىر ارامىزدا كەزىندە حالىقارالىق ارەنادا ەلىمىزدىڭ نامىسىن قورعاعان سپورت ارداگەرلەرى مەن جاتتىقتىرۋشىلار كوپ. ولار ەكى عاسىردىڭ اڭىز ادامدارى. ءبىز سپورت ارداگەرلەرىنىڭ ەڭبەگىن باعالاپ، ەشقاشان ۇمىتپاۋىمىز كەرەك. وداقتى وسى ماقساتتى قۇرىپ وتىرمىز. بۇل قوعامدىق ۇيىمنىڭ قۇرىلۋىنا جەتى ادام ۇيىتقى بولدى. الداعى ۋاقىتتا قارجى كوزدەرىن ىزدەستىرىپ، قوعامدىق بىرلەستىكتىڭ جۇمىسىن جانداندىرۋدى قولعا الامىز، — دەدى قازاقستان سپورت ارداگەرلەرى وداعىنىڭ توراعاسى ەلسيار قاناعاتوۆ.

ونىڭ ايتۋىنشا، قوعامدىق ۇيىمنىڭ العاشقى جۇمىسى سپورت ارداگەرلەرىنىڭ ءبىرىنشى رەسپۋبليكالىق فورۋمىن ۇيىمداستىرۋدان باستالىپ وتىر. بۇل جيىن ەكى كۇن بولىپ، ونىڭ اياسىندا ارداگەرلەرى اراسىندا اسىق اتۋ، ۇستەل تەننيسى، بيليارد جانە شاحماتتان جارىستار وتەدى.

بيىل اقپان ايىندا ءبىر توپ سپورت ارداگەرى بولىپ، وسى يگى باستامانى تۋريزم جانە سپورت مينيسترلىگىنە جەتكىزدىك. قۋانىشتىسى سول، مينيستر باستامامىزدى تولىعىمەن قولدادى. سودان كەيىن  قوعامدىق بىرلەستىگىمىز رەسمي تىركەۋدەن ءوتتى. ەندى مىنە، مينيسترلىكتىڭ جانىنداعى قوردان قارجى ءبولىنىپ، العاشقى فورۋمدى ۇيىمداستىرىپ جاتىرمىز، — دەدى سپورت ارداگەرلەرى وداعىنىڭ توراعاسى.

قازاقستان سپورت ارداگەرلەرى وداعى توراعاسىنىڭ ايتۋىنشا، قوعامدىق بىرلەستىكتىڭ قۇرىلۋىنا جەتى ادامنان تۇراتىن اقساقالدار كەڭەسى ۇيىتقى بولعان. ونىڭ قۇرامىنا بەلگىلى قوعام جانە سپورت قايراتكەرلەرى ەلسيار قاناعاتوۆ، ديحانباي بيتكوزوۆ، مارات جاقىت، ۆيكتور ابويموۆ، جومارت سابىرجانوۆ، مادىعالي قارسىبەكوۆ، نەسىپ ءجۇنىسباي ۇلى كىرىپ وتىر. وسى اقساقالدار كەڭەسى ۇيىمنىڭ قىزمەتى مەن جۇمىسىن رەتتەپ، جەتىلدىرىپ وتىراتىن بولادى.

ول سونىمەن بىرگە قوعامدىق بىرلەستىكتىڭ تىرناقالدى جۇمىسىن فورۋمدى لايىقتى وتكىزۋدەن باستالىپ وتىرعانىن، وعان ەلىمىزدىڭ ءار وڭىرىنەن 100-گە جۋىق سپورت ارداگەرى مەن جاتتىقتىرۋشىلار قاتىساتىنىن ايتتى.

داستان كەنجالين،

استانا