Astanada sport ardagerleriniń birinshi respýblıkalyq forýmy bastaldy

16-17 tamyz kúnderi Astanada Sport kúni qarsańynda Týrızm jáne sport mınıstrliginiń qoldaýymen Qazaqstan sport ardagerleri odaǵynyń qurylýyna oraı sport ardagerleriniń birinshi respýblıkalyq forýmy bolady.

Qazaqstan sport ardagerleri odaǵy bıyl aqpan aıynda qurylǵan. Onyń maqsaty – elimizdiń jer jerinde qoǵamdyq birlestiktiń fılıaldaryn quryp, jergilikti jerde esimderi elenbeı, eskerilmeı, umytylyp bara jatqan sport ardagerlerin áleýmettik-turmystyq jaǵynan qoldap, tıisti kóńil bólý.

Qazir aramyzda kezinde halyqaralyq arenada elimizdiń namysyn qorǵaǵan sport ardagerleri men jattyqtyrýshylar kóp. Olar eki ǵasyrdyń ańyz adamdary. Biz sport ardagerleriniń eńbegin baǵalap, eshqashan umytpaýymyz kerek. Odaqty osy maqsatty quryp otyrmyz. Bul qoǵamdyq uıymnyń qurylýyna jeti adam uıytqy boldy. Aldaǵy ýaqytta qarjy kózderin izdestirip, qoǵamdyq birlestiktiń jumysyn jandandyrýdy qolǵa alamyz, — dedi Qazaqstan sport ardagerleri odaǵynyń tóraǵasy Elsııar Qanaǵatov.

Onyń aıtýynsha, qoǵamdyq uıymnyń alǵashqy jumysy sport ardagerleriniń birinshi respýblıkalyq forýmyn uıymdastyrýdan bastalyp otyr. Bul jıyn eki kún bolyp, onyń aıasynda ardagerleri arasynda asyq atý, ústel tennısi, bılıard jáne shahmattan jarystar ótedi.

Bıyl aqpan aıynda bir top sport ardageri bolyp, osy ıgi bastamany Týrızm jáne sport mınıstrligine jetkizdik. Qýanyshtysy sol, mınıstr bastamamyzdy tolyǵymen qoldady. Sodan keıin  qoǵamdyq birlestigimiz resmı tirkeýden ótti. Endi mine, mınıstrliktiń janyndaǵy qordan qarjy bólinip, alǵashqy forýmdy uıymdastyryp jatyrmyz, — dedi Sport ardagerleri odaǵynyń tóraǵasy.

Qazaqstan sport ardagerleri odaǵy tóraǵasynyń aıtýynsha, qoǵamdyq birlestiktiń qurylýyna jeti adamnan turatyn Aqsaqaldar keńesi uıytqy bolǵan. Onyń quramyna belgili qoǵam jáne sport qaıratkerleri Elsııar Qanaǵatov, Dıhanbaı Bıtkózov, Marat Jaqyt, Vıktor Aboımov, Jomart Sabyrjanov, Mádiǵalı Qarsybekov, Nesip Júnisbaıuly kirip otyr. Osy Aqsaqaldar keńesi uıymnyń qyzmeti men jumysyn rettep, jetildirip otyratyn bolady.

Ol sonymen birge qoǵamdyq birlestiktiń tyrnaqaldy jumysyn forýmdy laıyqty ótkizýden bastalyp otyrǵanyn, oǵan elimizdiń ár óńirinen 100-ge jýyq sport ardageri men jattyqtyrýshylar qatysatynyn aıtty.

Dastan KENJALIN,

ASTANA