Kúresten ÁCh: Qazaqstan tórtinshi júldesin jeńip aldy

Qazaqstan quramasy grek-rım kúresinen Bolgarııanyń Samokov qalasynda ótip jatqan U20 álem chempıonatyndaǵy beldesýlerin aıaqtady.

Dúbirli dodanyń sońǵy kúni eki otandasymyz bozkilemge shyqty. Birinshi bolyp 87 kelige edıingi salmaqta Temirlan Turdaqyn kúresti. Ol qola medal úshin beldesýde Ázerbaıjan sportshysy Orhan Gadjıevti jeńdi. Odan keıin 63 kelige deıingi salmaqta Damır Ibraıshov ta úshinshi oryn úshin kúsh synasty. Alaıda ol Reseı balýany Igor Pýnchenkodan jeńilip qaldy.

Osylaısha, álem chempıonatynda otandastarymyz tórt júldeni jeńip aldy. Atap aıtqanda, Dıas Seıitqalıev (82 kelige deıin) kúmis júldeger atansa, Arsen Juma (55 kelige deıin), Iýsýf Ashrapov (72 kelige deıin) pen Temirlan Turdaqyn (87 kelige deıin) úshinshi orynǵa taban tiredi.

Dastan KENJALIN,

ASTANA