بوكستان بيىلعى جاسوسپىرىمدەر اراسىنداعى ازيا ويىندارىنىڭ سالماق دارەجەلەرى بەكىتىلدى

بيىل باحرەيندە جاسوسپىرىمدەر اراسىنداعى ازيا ويىندارى جالاۋىن كوتەرەدى. وسى دۇرمەكتى دودانىڭ الدىندا بوكس جەكپە-جەكتەرىنىڭ سالماق دارەجەلەرى رەسمي تۇردە بەكىتىلدى.

قازاقستان بوكس فەدەراتسياسىنىڭ مالىمەتىنە قاراعاندا، جەكپە-جەكتەر Exhibition World Bahrain كورمە ورتالىعىندا بولادى. وعان 2009–2010 جىلى تۋعان ۇلدار مەن قىزدار قاتىسىپ، 14 سالماق دارەجەسىندە جۇلدەلەردى ساراپقا سالادى.

ۇلدار: 46 كەلى، 50 كەلى، 54 كەلى، 60 كەلى، 66 كەلىگە 75 كەلىگە دەيىن جانە 80 كەلىدەن اسا سالماق;

قىزدار: 46 كەلى، 50 كەلى، 54 كەلى، 60 كەلى، 66 كەلى، 75 كەلىگە دەيىن جانە 80 كەلىدەن اسا سالماق.

جەكپە-جەكتەر ءۇش راۋندتان تۇرادى. ءار راۋند ەكى مينۋتقا سوزىلادى. راۋندتار اراسىندا ءبىر مينۋتتىق ءۇزىلىس بولادى. جەڭىمپازداردى انىقتاۋ ءۇشىن Asian Boxing پەن ازيا وليمپيادالىق كەڭەسى ماقۇلداعان ەلەكتروندى ۇپاي ساناۋ جۇيەسى قولدانىلادى.

باستاپقىدا بوكس ازيا ويىندارىنىڭ باعدارلاماسىنا ەنگىزىلمەگەن ەدى. الايدا World Boxing وليمپيادالىق كوميسسياسىنىڭ توراعاسى، قازاقستان ۇلتتىق وليمپيادالىق كوميتەتىنىڭ پرەزيدەنتى گەننادي گولوۆكيننىڭ باستاماسىمەن بۇل سپورت ءتۇرىن تىزىمگە قوسۋ تۋرالى شەشىم قابىلداندى. بۇل ۇسىنىس ايماقتا دا، سونداي-اق ازيا وليمپيادالىق كەڭەسى مەن Asian Boxing تاراپىنان دا قولداۋ تاپتى، — دەلىنگەن حابارلامادا.

جاسوسپىرىمدەر اراسىنداعى ازيا ويىندارى 2025 جىلدىڭ 22-31 قازان ارالىعىندا بولادى.  جارىستار 24 سپورت تۇرىنەن ۇيىمداستىرىلىپ، 5000-نان استام سپورتشى باق سىنايدى.

داستان كەنجالين،

استانا