تۇركىستان وبلىسىنىڭ تۋماسى ازامات ماقۇلبەكوۆ جاڭا رەكورد جاسادى

1986 جىلى تۋعان سپورتشى ازامات نۇرعالي ۇلى ماقۇلبەكوۆ كۇش پەن توزىمدىلىكتىڭ ناعىز سيمۆولىنا اينالدى. ول بۇعان دەيىن V دۇنيەجۇزىلىك كوشپەندىلەر ويىندارىنىڭ الىپتار سايىسىندا جەڭىمپاز اتانىپ، ەل مەرەيىن ۇستەم ەتكەن ەدى. سونداي-اق 40 كەلىلىك قوشقاردى 3555 رەت وتىرىپ-تۇرىپ كوتەرىپ، قازاقستاننىڭ رەكوردتار كىتابىنا ەنگەن بولاتىن، دەپ حابارلادى تۇركىستان وبلىسى اكىمىنىڭ ءباسپاسوز قىزمەتى.

ەندى مىنە، باتىر سپورتشى جاڭا بيىكتى باعىندىردى. الماتىداعى ايگىلى «مەدەۋ» مۇز ايدىنىنىڭ 842 باسپالداعىنا 100 كەلىلىك وگىز ءمۇسىندى 34 مينۋت 28 سەكۋندتا كوتەرىپ شىعىپ، قازاقستاننىڭ كينەسك رەكوردتار كىتابىنا رەسمي تۇردە تىركەلدى. بۇل ونىڭ ەڭبەكتىڭ، تاباندىلىقتىڭ جانە شىنايى ەرىك-جىگەردىڭ ۇلگىسىن كورسەتكەن كەزەكتى جەتىستىگى بولدى، — دەلىنگەن حابارلامادا.

ءوڭىر باسشىسى ءباسپاسوز قىزمەتىنىڭ مالىمەتىنە قاراعاندا، ءىس-شاراعا تۇركىستان وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى عالىمجان حۋدياروۆ ارنايى كەلىپ، سپورتشىعا ساتتىلىك تىلەپ، قولداۋ كورسەتتى.

سونىمەن قاتار، قازاقستاننىڭ كينەس رەكوردتار كىتابىنىڭ رەسمي وكىلى باقىتجان تاستۇلەكوۆ، رەسپۋبليكالىق Qazaqstan جانە Qazsport تەلەارنالارىنىڭ تىلشىلەرى دە قاتىسىپ، تاريحي ءساتتىڭ كۋاسى بولدى.

جاڭا رەكورد يەسى اتانعان ازامات ماقۇلبەكوۆ – ەل نامىسىن ابىرويمەن قورعاپ جۇرگەن باتىر ازامات. تۇركىستان وبلىسى، ارىس قالاسىنىڭ تولاعايى بۇگىندە قازاقستاننىڭ ماقتانىشىنا اينالىپ وتىر.