Túrkistan oblysynyń týmasy Azamat Maqulbekov jańa rekord jasady

1986 jyly týǵan sportshy Azamat Nurǵalıuly Maqulbekov kúsh pen tózimdiliktiń naǵyz sımvolyna aınaldy. Ol buǵan deıin V Dúnıejúzilik Kóshpendiler oıyndarynyń alyptar saıysynda jeńimpaz atanyp, el mereıin ústem etken edi. Sondaı-aq 40 kelilik qoshqardy 3555 ret otyryp-turyp kóterip, Qazaqstannyń rekordtar kitabyna engen bolatyn, dep habarlady Túrkistan oblysy ákiminiń baspasóz qyzmeti.

Endi mine, batyr sportshy jańa bıikti baǵyndyrdy. Almatydaǵy áıgili «Medeý» muz aıdynynyń 842 baspaldaǵyna 100 kelilik ógiz músindi 34 mınýt 28 sekýndta kóterip shyǵyp, Qazaqstannyń KInESK rekordtar kitabyna resmı túrde tirkeldi. Bul onyń eńbektiń, tabandylyqtyń jáne shynaıy erik-jigerdiń úlgisin kórsetken kezekti jetistigi boldy, — delingen habarlamada.

О́ńir basshysy baspasóz qyzmetiniń málimetine qaraǵanda, is-sharaǵa Túrkistan oblysynyń dene shynyqtyrý jáne sport basqarmasynyń basshysy Ǵalymjan Hýdııarov arnaıy kelip, sportshyǵa sáttilik tilep, qoldaý kórsetti.

Sonymen qatar, Qazaqstannyń KInES rekordtar kitabynyń resmı ókili Baqytjan Tastúlekov, respýblıkalyq Qazaqstan jáne Qazsport telearnalarynyń tilshileri de qatysyp, tarıhı sáttiń kýási boldy.

Jańa rekord ıesi atanǵan Azamat Maqulbekov – el namysyn abyroımen qorǵap júrgen batyr azamat. Túrkistan oblysy, Arys qalasynyń tolaǵaıy búginde Qazaqstannyń maqtanyshyna aınalyp otyr.