كوكباستاۋدا كوككە قىراندار سامعادى

كوكباستاۋ يپپودرومىندا «ساياتشىلىق» ۇلتتىق سپورت تۇرلەرىنەن «سونار – 2018» حالىقارالىق جارىسى ءوتتى. بىرنەشە وبلىستان بۇركىت، قارشىعا، يتەلگىلەرىن الا كەلگەن قۇسبەگىلەر قۇس سالۋدان باسەكەگە ءتۇستى. جارىسقا يتاليا، يسپانيا، ۆەنگريا، رەسەي، موڭعوليادان دا وسى ونەرگە دەن قويعاندار قاتىستى.

بۇل ءداستۇرلى جارىس ءتۇرى نەگىزىنەن ەڭبەكشىقازاق اۋدانىندا ءوتىپ كەلسە، بيىل اقىندار مەن باتىرلار ەلىندە ۇيىمداستىرىلدى. «قانسوناردا بۇركىتشى شىعادى اڭعا، تاستان تۇلكى تابىلار اڭدىعانعا»، دەپ اباي اقىن جىرلاعان ۇلتىمىزدىڭ قانىنا سىڭگەن كونە ءداستۇردىڭ قىزىعىن بۇل جولى جامبىل جۇرتشىلىعى تاماشالادى. اتا ءداستۇردى ۇلىقتاۋ ماقساتىنداعى شارا تۇڭعىش پرەزيدەنت كۇنىنە ارنالعان جانە ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى اياسىندا وتكىزىلدى. جىلدا تامىز ايىنىڭ سوڭىندا كونستيتۋتسيا كۇنىنە وراي پرەزيدەنت كۋبوگى ءۇشىن ۇلتتىق ات سپورتى تۇرلەرىنەن تۇلپارلار دوداسى وتەتىن كوكباستاۋ جازىعىنا الىستان ات ارىتىپ كەلگەندەر جالپى سانى 70-تەن اسا قىراننىڭ بابىن سىنادى. ونىڭ ىشىندە 53 بۇركىت، 7 قارشىعا، وننان اسا يتەلگى كوكباستاۋ اسپانىندا كەزەك-كەزەك قىزىقتالدى.

جارىستىڭ اشىلۋ سالتاناتىنداعى قۇتتىقتاۋ سوزدەرىندە وبلىستىق دەنەشىنىقتىرۋ جانە سپورت باسقارماسىنىڭ باسشىسى نۇرباقىت تەڭىزباەۆ، «قىران» فەدەراتسياسى قوعامدىق قورىنىڭ اتقارۋشى ديرەكتورى باعدات مۇپتەكەقىزى، اۋدان اكىمى اپپاراتىنىڭ باسشىسى ابزال نۇرپەيىسوۆ، «ساياتشىلىق» ۇلتتىق سپورت تۇرلەرىنەن قازاقستان رەسپۋبليكاسىنىڭ باس جاتتىقتىرۋشىسى كۇنتۋعان بازاربەك قازاقتىڭ جەتى قازىناسىنىڭ ءبىرى قىران قۇستى حالقىمىز ەجەلدەن جانىنا جاقىن ەتكەنىن، ۇلى دالا ەلىندەگى ساياتشىلىقتىڭ تاريحى ءۇش مىڭ جىلعا كەتەتىنىن، سول ءداستۇردى جاڭعىرتىپ، جاستارعا سالاماتتى ءومىر سالتىن ناسيحاتتاپ، ۇلتتىڭ اسىل مۇراسى – قۇسبەگىلىكتى الەمدىك دەڭگەيگە كوتەرۋدى اتاپ ءوتتى. بۇركىتباي اقساقال كوپشىلىككە اق باتاسىن بەردى. شىعىس قازاقستان وبلىسى ءۇرجار اۋدانىنان اتبەگى، قۇسبەگى تاتتىمبەت كاپ ۇلى ات باپتاپ، قىران ۇشىرعان قازاقى قاسيەت تۋرالى رۋحتى ولەڭ وقىدى.

ساياتشىلار بۇركىتتىڭ توماعاسىن سىپىرىپ جىبەرىپ، قويانعا، تۇلكىگە سالدى، قولعا قوندىرۋدان شەبەرلىكتەرىن بايقاستى. قارشىعانى كەپتەرگە سالىپ، يتەلگىنى دالبايعا ويناتۋدان سايىسقا ءتۇستى. كۇتىپ-باپتالعان قىرانداردىڭ ۇشقىرلىعى، اڭ-قۇسقا ءتۇسۋ ەپتىلىگى، كەسكىن-كەلبەتى تابيعات اياسىندا تورەشىلەر سىنىنا سالىندى. تازى ەرتىپ، قۇس سالىپ جۇرگەندەردىڭ كيىم ۇلگىلەرى قاراعان كوزدى تويدىرارلىقتاي كەلىستى بولدى. قىرانى قىراعىلىق تانىتقاندار ىرىكتەلە كەلە، فينالدا ۇزدىكتەرى بەلگىلى بولدى. جارىس جەڭىمپازدارى قۇستىڭ ءۇش ءتۇرى بويىنشا انىقتالدى.

ءۇش كۇنگە سوزىلعان جارىستىڭ قورىتىندىسى بويىنشا بۇركىت سالۋدان شىعىس قازاقستان وبلىسىنان كەلگەن نۇعىم ومىربەك جەڭىمپاز اتاندى. ەكىنشى ورىنعا الماتى وبلىسىنان ابەن دۋلات، ءۇشىنشى ورىنعا جامبىل وبلىسىنىڭ بۇركىتشىسى باباجان باقداۋلەت، ءتورتىنشى  ورىنعا الماتى وبلىسىنىڭ ازاماتى سەيىتجان الماس، بەسىنشى ورىنعا تۇركىستان وبلىسىنان ۇلان تولەمىرزا يە بولدى. قارشىعا سالۋ بويىنشا ءبىرىنشى ورىندى جەتىسۋ ءوڭىرىنىڭ سپورتشىسى اتىعاي ەراسىل جەڭىپ السا، ەكىنشى ورىندى تۇركىستاندىق ماحمۇتحان زاكي، ءۇشىنشى ورىندى تاراز وڭىرىنەن باباجان بەرىكبولسىن ولجالادى. يتەلگى بويىنشا ءبىرىنشى ورىندى الماتى قالاسىنان رۋسلان ابىل السا، ەكىنشى ورىندى جامبىل وبلىسىنان سەرىكبولسىن جالعاس ۇلى، ءۇشىنشى ورىندى الماتى وبلىسىنىڭ سپورتشىسى مەدەت شاريپوۆ يەلەندى. قۇسىمەن مەرەيى ۇستەم بولعان جەڭىمپازدارعا كۋبوكتار، ديپلومدار، مەدالدار مەن اقشالاي سىيلىقتار تاپسىرىلدى.

جارىستىڭ ءتيىستى دەڭگەيدە وتكىزىلۋىنە جامبىل، قاراساي جانە ىلە اۋداندارىنىڭ اكىمدىكتەرى مەن سپورت بولىمدەرى اتسالىستى.

ريشاد تۇرعانباي،

جامبىل وبلىسى