چەمپيوندار ليگاسى: «قايرات» «رەال مادريدتەن» ساباق الدى

UEFA چەمپيوندار ليگاسى نەگىزگى كەزەڭىنىڭ ەكىنشى تۋرىندا الماتىنىڭ ورتالىق ستاديونىندا «قايرات» كلۋبى يسپانيانىڭ «رەال مادريد» كومانداسىمەن وينادى.

بۇل ماتچتا جەرگىلىكتى كلۋب فۋتبولداعى الەمدىك گراند سانالاتىن پيرەنەي تۇبەگى ەلىنىڭ جاساعىنان 0:5 ەسەبىمەن جەڭىلدى. «قايرات» جەڭىلسە دە كوپ تاجىريبە الدى. ويتكەنى، الماتى كومانداسىنىڭ العاش رەت UEFA چەمپيوندار ليگاسى نەگىزگى كەزەڭىنە شىعۋىنىڭ ءوزى ۇلكەن جەتىستىك بولسا، «رەال مادريد» كومانداسىمەن ويناۋىنىڭ ءوزى ۇلكەن تاجىريبە دەۋگە بولادى. ءيا، كەيبىر ادامدار ايتقانداي، بۇل «ۇلكەن جەڭىس» ەمەس، ۇلكەن تاجىريبە، ساباق. وسى تاجىريبەدەن كەيىن «قايرات» ەندى الەمنىڭ فۋتبول الاڭىنا (بولشايا فۋتبولنايا سەميا) شىعىپ، اتويلاي شابادى دەپ سەنەمىز.

جالپى، ماتچتا قوناقتاردىڭ الاڭ يەلەرىنىڭ قاقپاسىنا بۇدان دا كوپ گول سوعۋعا مۇمكىندىگى بولدى. وعان ءبىر جاعىنان «قايراتتىڭ» 18 جاستاعى قاقپاشىسى شەرحان قالمىرزا جەتى سەيۆ جاساپ، مۇمكىندىك بەرمەسە، ەكىنشى جاعىنان الىپ قاراساق، «رەالدىڭ» ءوزىنىڭ كوپ دوپتى تورعا توعىتۋعا ىنتاسى بولمادى. نەگە دەسەڭىز، ەۋروپادا فۋتبول سىپايىلىعى بار. ول قارسىلاستى قۇرمەتتەۋ دەگەندى بىلدىرەدى. قارسىلاستى قۇرمەتتەۋ ءبىر جاعىنان سىپايىلىق كورسەتۋ بولسا، ەكىنشىدەن اياۋشىلىقتان دا شىعۋى مۇمكىن دەگەن دە وي كەلەدى.  قالاي دەسەك دە «رەال مادريد» كلۋبى جاسىل الاڭدا اياقپەن ەمەس، باسپەن، ياعني سانا-سەزىمىمەن، وي-ورىسىمەن وينايتىن كوماندا ەكەنىن كورسەتتى.

وسىدان 12 جىل بۇرىن، دالىرەك ايتساق 2013 جىلى 22 ناۋرىزدا استانادا الەم چەمپيوناتىنىڭ ىرىكتەۋ تۋرنيرىندە ۇلتتىق قۇراما گەرمانيا كومانداسىمەن ويناعان ەدى.  ولار س توبىندا ويناعان. وسى ماتچتا گەرمانيا الاڭ يەلەرىن 3:0 ەسەبىمەن جەڭدى. سول كەزدە ەسەپ 3:0 ەمەس، 10:0 بولاتىن ەدى. الايدا، «نەمىس» ماشيناسى» ولاي ەتپەدى. ولار سىپايىلىق تانىتىپ، قازاقستان قۇراماسىنىڭ قاقپاسىنا ءۇش دوپ سوعىپ، الاڭدا ەمىن-ەركىن ءجۇرىپ، راحاتتانىپ وينادى. بۇل ماتچتا قوناقتاردىڭ قۇرامىندا ميۋللەر، شۆاينشتايگەر، وزيل، حەديرا، دراكسلەر، پودولسكي، گيۋندوگان، مەرتەزاكەر، لام، نويەر (قاقپاشى) مەن باسقا دا فۋتبولشىلار الاڭعا شىقتى. وسى قۇراممەن ولار استانادان ون گولدى ارقالاپ الىپ كەتەتىن ەدى.

قىسقاسى، «قايراتتىڭ» بۇگىنگى ويىنىنا قايتا كەلسەك، الاڭ يەلەرىنە ەۋروپانىڭ تەرەزەسىن اشىپ بەردى دەۋگە بولادى. ەندى الماتىنىڭ كومانداسىن جەر-جۇزىندەگى بارلىق ەلدىڭ جانكۇيەرى بىلەدى. بۇل ارينە، «قايراتتىڭ» ويىنشىلارىنا كوز تىگەتىن كلۋبتار كوبەيەدى دەگەن ءسوز.

«قايرات» – «رەال» (مادريد) 0:5 (0:1)

الماتى. ورتالىق ستاديون. 22 788 كورەرمەن.

اربيتر: ماركو گۋيدا (يتاليا).

«قايرات»: شەرحان قالمىرزا، ەركىن تاپالوۆ (يۋگ ستانوەۆ، 64)، الەكساندر مارتىنوۆيچ، ەگور سوروكين، لۋيش ماتا، الەكساندر مرىنسكي، وفري اراد (ولجاس بايبەك، 64)، دامير قاسابولات، ۆالەري گرومىكا (گەورگي زاريا، 80)، جورجينو (ەدميلسون سانتوس، 64)، داستان ساتباەۆ (ريكاردينو، 80).

«رەال مادريد»: تيبو كۋرتۋا، راۋل اسەنسيو، دين حەيسەن، داۆيد الابا، فران گارسيا، ورەلەن چۋامەني (دجۋد بەللينگەم، 80)، داني سەبالوس، فرانكو ماستانتۋونو (رودريگو، 70)، اردا گيۋلەر (ەدۋاردۋ كاماۆينگا، 80)، ۆينيسۋس جۋنيور (برام دياس، 70)، كيليان مباپپە (گونسالو گارسيا، 81).

گولدار: كيليان مباپپە (25، پەنالتي، 52، 74). ەدۋاردۋ كاماۆينگا (83). برايم دياس (90+3).

ەسكەرتۋلەر: ۆالەري گرومىكا (48)، وفري اراد (55).

بۇعان دەيىن «قايرات» U-19 كومانداسى جاسوسپىرىمدەر ليگاسىندا «رەال مادريد» جاستارىنان 1:4 ەسەبىمەن جەڭىلىپ قالدى. وسى مالىمەتتى دە بىلە جۇرىڭىزدەر.

داستان كەنجالين،

استانا

فوتو: MAXIM SHIPENKOV/EPA/تاسس