Chempıondar lıgasy: «Qaırat» «Real Madrıdten» sabaq aldy

UEFA Chempıondar lıgasy negizgi kezeńiniń ekinshi týrynda Almatynyń Ortalyq stadıonynda «Qaırat» klýby Ispanııanyń «Real Madrıd» komandasymen oınady.

Bul matchta jergilikti klýb fýtboldaǵy álemdik grand sanalatyn Pıreneı túbegi eliniń jasaǵynan 0:5 esebimen jeńildi. «Qaırat» jeńilse de kóp tájirıbe aldy. О́ıtkeni, Almaty komandasynyń alǵash ret UEFA Chempıondar lıgasy negizgi kezeńine shyǵýynyń ózi úlken jetistik bolsa, «Real Madrıd» komandasymen oınaýynyń ózi úlken tájirıbe deýge bolady. Iá, keıbir adamdar aıtqandaı, bul «úlken jeńis» emes, úlken tájirıbe, sabaq. Osy tájirıbeden keıin «Qaırat» endi álemniń fýtbol alańyna (Bolshaıa fýtbolnaıa semıa) shyǵyp, atoılaı shabady dep senemiz.

Jalpy, matchta qonaqtardyń alań ıeleriniń qaqpasyna budan da kóp gol soǵýǵa múmkindigi boldy. Oǵan bir jaǵynan «Qaırattyń» 18 jastaǵy qaqpashysy Sherhan Qalmyrza jeti seıv jasap, múmkindik bermese, ekinshi jaǵynan alyp qarasaq, «Realdyń» óziniń kóp dopty torǵa toǵytýǵa yntasy bolmady. Nege deseńiz, Eýropada fýtbol sypaıylyǵy bar. Ol qarsylasty qurmetteý degendi bildiredi. Qarsylasty qurmetteý bir jaǵynan sypaıylyq kórsetý bolsa, ekinshiden aıaýshylyqtan da shyǵýy múmkin degen de oı keledi.  Qalaı desek de «Real Madrıd» klýby jasyl alańda aıaqpen emes, baspen, ıaǵnı sana-sezimimen, oı-órisimen oınaıtyn komanda ekenin kórsetti.

Osydan 12 jyl buryn, dálirek aıtsaq 2013 jyly 22 naýryzda Astanada álem chempıonatynyń irikteý týrnırinde ulttyq qurama Germanııa komandasymen oınaǵan edi.  Olar S tobynda oınaǵan. Osy matchta Germanııa alań ıelerin 3:0 esebimen jeńdi. Sol kezde esep 3:0 emes, 10:0 bolatyn edi. Alaıda, «nemis» mashınasy» olaı etpedi. Olar sypaıylyq tanytyp, Qazaqstan quramasynyń qaqpasyna úsh dop soǵyp, alańda emin-erkin júrip, rahattanyp oınady. Bul matchta qonaqtardyń quramynda Mıýller, Shvaınshtaıger, Ozıl, Hedıra, Draksler, Podolskı, Gıýndogan, Mertezaker, Lam, Noıer (qaqpashy) men basqa da fýtbolshylar alańǵa shyqty. Osy qurammen olar Astanadan on goldy arqalap alyp ketetin edi.

Qysqasy, «Qaırattyń» búgingi oıynyna qaıta kelsek, alań ıelerine Eýropanyń terezesin ashyp berdi deýge bolady. Endi Almatynyń komandasyn jer-júzindegi barlyq eldiń jankúıeri biledi. Bul árıne, «Qaırattyń» oıynshylaryna kóz tigetin klýbtar kóbeıedi degen sóz.

«Qaırat» – «Real» (Madrıd) 0:5 (0:1)

Almaty. Ortalyq stadıon. 22 788 kórermen.

Arbıtr: Marko Gýıda (Italııa).

«Qaırat»: Sherhan Qalmyrza, Erkin Tapalov (Iýg Stanoev, 64), Aleksandr Martynovıch, Egor Sorokın, Lýısh Mata, Aleksandr Mrynskıı, Ofrı Arad (Oljas Baıbek, 64), Damır Qasabolat, Valerıı Gromyka (Georgı Zarııa, 80), Jorjıno (Edmılson Santos, 64), Dastan Sátbaev (Rıkardıno, 80).

«Real Madrıd»: Tıbo Kýrtýa, Raýl Asensıo, Dın Heısen, Davıd Alaba, Fran Garsııa, Orelen Chýamenı (Djýd Bellıngem, 80), Danı Sebalos, Franko Mastantýono (Rodrıgo, 70), Arda Gıýler (Edýardý Kamavınga, 80), Vınısýs Jýnıor (Bram Dıas, 70), Kılıan Mbappe (Gonsalo Garsııa, 81).

Goldar: Kılıan Mbappe (25, penaltı, 52, 74). Edýardý Kamavınga (83). Braım Dıas (90+3).

Eskertýler: Valerıı Gromyka (48), Ofrı Arad (55).

Buǵan deıin «Qaırat» U-19 komandasy Jasóspirimder lıgasynda «Real Madrıd» jastarynan 1:4 esebimen jeńilip qaldy. Osy málimetti de bile júrińizder.

Dastan KENJALIN,

ASTANA

Foto: MAXIM SHIPENKOV/EPA/TASS