SportPress.kz قازاقستان سپورت جاڭالىقتارى
2026 جىلعى 1 قاڭتاردان بالالار جانە جاسوسپىرىمدەر سپورت مەكتەپتەرىنىڭ جاتتىقتىرۋشى-وقىتۋشىلارىنا 30 پايىز قوسىمشا اقى تولەنەدى. بۇل تۋرالى ءماجىلىس دەپۋتاتتارىنىڭ ساۋالىنا جاۋابىندا پرەمەر-مينيستر ولجاس بەكتەنوۆ ايتتى، دەپ حابارلادى ۇكىمەتتىڭ ءباسپاسوز قىزمەتى.
— 2022 جىلدان بەرى ۇكىمەتتىڭ قاۋلىسىنا سايكەس ازاماتتىق قىزمەتشىلەردىڭ جالاقىسى جىل سايىن 20 پايىزعا وسىرىلۋدە. سونىمەن قاتار 2026 جىلعى 1 قاڭتاردان باستاپ، بالالار-جاسوسپىرىمدەر سپورت مەكتەپتەرىنىڭ جاتتىقتىرۋشى-وقىتۋشىلارىنا بىلىكتىلىك شەبەرلىگى ءۇشىن لاۋازىمدىق جالاقىسىنا 30 پايىز كولەمىندە قوسىمشا اقى تولەۋگە 2025-2028 جىلدارعا ارنالعان رەسپۋبليكالىق بيۋدجەت جوباسىندا 1،8 ملرد تەڭگە قاراستىرىلعان. قازىرگى تاڭدا ۇكىمەتتىڭ قاۋلىسىنا ءتيىستى تولىقتىرۋلار ازىرلەنىپ، كەلىسۋ ساتىسىندا، — دەدى ۇكىمەت باسشىسى.
پرەمەر-مينيستر سونىمەن بىرگە، قولدانىستاعى زاڭناماعا سايكەس رەسپۋبليكالىق ماڭىزى بار قالالار، وبلىستىق اكىمدىكتەر جەرگىلىكتى بيۋدجەت قاراجاتىنان سپورت سالاسىنداعى قىزمەتكەرلەرگە ۇستەمەاقى تاعايىنداۋعا جانە اۋىلدىق جەردە جۇمىس ىستەيتىن سپورت سالاسى ماماندارىنا لاۋازىمدىق جالاقىنىڭ كەمىندە 25 پايىز بولاتىن كوتەرىڭكى لاۋازىمدىق جالاقى تولەۋگە مۇمكىندىكتەرى بار ەكەنىن اتاپ ءوتتى.
