Kelesi jyldan bastap balalar jáne jasóspirimder sport mektepteriniń jattyqtyrýshylaryna 30 paıyz qosymsha aqy tólenedi

2026 jylǵy 1 qańtardan balalar jáne jasóspirimder sport mektepteriniń jattyqtyrýshy-oqytýshylaryna 30 paıyz qosymsha aqy tólenedi. Bul týraly Májilis depýtattarynyń saýalyna jaýabynda premer-mınıstr Oljas Bektenov aıtty, dep habarlady Úkimettiń baspasóz qyzmeti.

— 2022 jyldan beri Úkimettiń qaýlysyna sáıkes azamattyq qyzmetshilerdiń jalaqysy jyl saıyn 20 paıyzǵa ósirilýde. Sonymen qatar 2026 jylǵy 1 qańtardan bastap, balalar-jasóspirimder sport mektepteriniń jattyqtyrýshy-oqytýshylaryna biliktilik sheberligi úshin laýazymdyq jalaqysyna 30 paıyz kóleminde qosymsha aqy tóleýge 2025-2028 jyldarǵa arnalǵan respýblıkalyq bıýdjet jobasynda 1,8 mlrd teńge qarastyrylǵan. Qazirgi tańda Úkimettiń qaýlysyna tıisti tolyqtyrýlar ázirlenip, kelisý satysynda, — dedi Úkimet basshysy.

Premer-mınıstr sonymen birge, qoldanystaǵy zańnamaǵa sáıkes respýblıkalyq mańyzy bar qalalar, oblystyq ákimdikter jergilikti bıýdjet qarajatynan sport salasyndaǵy qyzmetkerlerge ústemeaqy taǵaıyndaýǵa jáne aýyldyq jerde jumys isteıtin sport salasy mamandaryna laýazymdyq jalaqynyń keminde 25 paıyz bolatyn kóterińki laýazymdyq jalaqy tóleýge múmkindikteri bar ekenin atap ótti.