قازاق كۇرەسىنەن اچ: العاشقى كۇنى-اق التى التىن، قوس كۇمىس جۇلدە الدىق (فوتو)

بۇگىن تۇركىستان قالاسىندا Qazaq Kuresi اسسوتسياتسياسى، تۇركىستان وبلىستىق دەنە شىنىقتىرۋ جانە سپورت باسقارماسى مەن وبلىستىق قازاق كۇرەسى فەدەراتسياسىنىڭ ۇيىمداستىرۋىمەن ءتول كۇرەسىمىزدەن ازيا چەمپيوناتى جالاۋىن جەلبىرەتتى.

اۋەلى سارىقۇرلىق دوداسى باستالماس بۇرىن قازاق كۇرەسىنىڭ دامۋىنا سەرپىن بەرەتىن ماڭىزدى جيىن – Qazaq Kuresi اسسوتسياتسياسى اتقارۋشى كوميتەتىنىڭ وتىرىسى ءوتتى. وسى القالى جيىندا ازيالىق Qazaq Kuresi اسسوتسياتسياسىن قۇرىلعانى تۋرالى حابار جاريالانىپ، ونىڭ پرەزيدەنتى سايلانعاننان كەيىن تۇركىستاندا سالىنعان سۋ جاڭا Olympic center سپورت ورداسىندا ازيا چەمپيوناتى سالتاناتتى جاعدايدا اشىلدى.

ونىڭ اشىلۋ راسىمىنەن سوڭ بالۋانداردىڭ بەلدەسۋلەرى باستالىپ كەتتى. جالپى، بيىلعى ءدۇبىرلى دوداعا  ازيانىڭ 12 ەلىنەن كەلگەن 150-گە جۋىق سپورتشى قاتىسىپ جاتىر. ولاردىڭ جارتىسى بۇگىن Olympic center سپورت ورداسىنا جايىلعان بوزكىلەمدە 8 سالماق دارەجەسى بويىنشا سىنعا ءتۇستى. اتاپ ايتقاندا ەرلەر 55، 66، 82 جانە 100 كەلىدەن اسا سالماقتا كۇرەسسە، ايەلدەر 48، 56، 65 جانە 77 كگ سالماق دارەجەسىندە كىلەمگە شىقتى.

بۇل بەلدەسۋلەردە ەرلەر اراسىنداعى بارلىق سالماقتا قازاق جىگىتتەرى قارسىلاستارىنىڭ جاۋىرىنىن جەرگە تيگىزىپ، ازيا چەمپيونى اتاندى. 55 كەلىدە ارحات بايمۋرزين، 66 كگ سالماقتا نۇرعالي تۇرسىنعازيەۆ قۇرمەت تۇعىرىنىڭ ەڭ بيىك ساتىسىنا كوتەرىلسە، 82 كەلىدە اسىلحان كارىم مەن تۇيە بالۋان ەرقانات مولداعاليەۆكە تەڭ كەلەر بالۋان بولمادى.

ەرلەر كۇرەسىندە قىرعىزستان، وزبەكستان مەن يران ەلىنىڭ ساڭلاقتارى جامان ناتيجە كورسەتكەن جوق. ولار ءتورت سالماقتا جۇلدە الىپ قالدى. مىسالى، الاتاۋدىڭ ار جاعىنان كەلگەن اعايىندار 2 كۇمىس جانە 1 قولا مەدالدى يەلەنسە، وزبەكستان قۇراماسىنىڭ ءتورت وكىلى قولا جۇلدەنى قاناعات تۇتتى. «ءۇشتىڭ ءوزى كۇش» دەمەكشى، 150-دەن اسا بالۋاننىڭ اراسىنان ۇزدىك ۇشتىككە كىرۋدىڭ ءوزى ءبىز ايتايىق، جامان كورسەتكىش ەمەس.

پارسى شىعاناعىنان كەلگەن ەكى بالۋان 82 جانە اسا اۋىر سالماقتا ەكىنشى ورىنعا يە بولدى. ەكەۋى دە التىن جۇلدە ءۇشىن ايانباي كۇرەسىپ، بوزكىلەمدە تەر توكتى. الايدا، بۇل جولى ولاردىڭ جولى بولمادى.

ايەلدەر كۇرەسى دە قىزىقتى جانە تارتىستى ءوتتى. بۇل سىندا دا قازاق، وزبەك، قىرعىز جانە ءۇندى قىزدارى وزگە ەلدەردەن كەلگەن قارسىلاستارىنىڭ الدى بولىپ، ءتورت سالماقتاعى جۇلدەنىڭ ءبارىن ءبولىسىپ الدى.

48 كەلىدە وتانداسىمىز ايدانا قاسەنقىزى وزبەكستاندىق مۋحاببات يوكۋبوۆانى جەڭسە، ءۇشىنشى ورىن قىرعىزستاننىڭ سپورتشىسى ايمان ابدراشيتوۆاعا بۇيىردى.

56 كگ سالماقتا وزبەكستاننىڭ وكىلى نوزيگۋل حولميرزاەۆا بوزكىلەم يەسى اقنۇر اسىلبەكوۆامەن كۇرەستە التىن مەدالدى جەڭىپ الدى. ال قولا جۇلدەنى ءۇندى ارچي پاحروت يەلەندى.

65 كەلىدە تاعى ءبىر وزبەك سپورتشىسى مۋسليماحون احمەدوۆا التىن جۇلدەنى قالتاسىنا باستى. ول دا تاعى ءبىر وتانداسىمىز ۇلدانا تاڭجارىقوۆانى قاپىدا قالدىرىپ، ازيا چەمپيونى اتاندى. ءۇشىنشى ورىنعا كەلسەك، بۇل جۇلدەگە ءۇندى حۋشي تياگي يە بولدى.

كەلەسى، 77 كەلى سالماقتا قازاقستان كومانداسىنان ارۋجان جانداربايدىڭ جولى بولدى. ولاي دەيتىنىمىز، ونىڭ فينالداعى قارسىلاسى قىرعىز سپورتشىسى ادينا المازبەكوۆا التىن مەدالدى قولدان بەرگىسى كەلەتىن بالۋان سياقتى بولىپ كورىنگەن جوق. ول دا ازيا چەمپيونى اتاعىن الۋعا بار كۇش-جىگەرىن سالدى. دەگەنمەن ارۋجان جانداربايدىڭ ايلاسىن اسىرىپ، ەلىمىزگە قىزدار اراسىنداعى كۇرەستە ەكىنشى التىن جۇلدەنى الىپ بەردى.

وسىلايشا، ازيا چەمپيوناتىنىڭ العاشقى كۇنى ەل قۇراماسىنىڭ قورجىنىنا 6 التىن، 2 كۇمىس مەدال ءتۇستى.

ەرتەڭ، 29 قازاندا ەرلەر 60، 74، 90، +100، ال ايەلدەر 52، 60، 70، +77 كەلى سالماق دارەجەسىندە كۇرەسەدى.

 

 

داستان كەنجالين،

تۇركىستان