«اقجايىق» كلۋبى رەسەي چەمپيوناتىنا قاتىسپايدى

دوپتى حوككەيدەن جوعارى ليگا كوماندالارى اراسىندا بۇكىلرەسەيلىك جارىسقا قاتىسىپ جۇرگەن ورالدىڭ «اقجايىعى» جاڭا ماۋسىمدا چەمپيوناتتان تىس قالدى، دەپ حابارلادى Kazinform اگەنتتىگى.

بقو دەنە شىنىقتىرۋ جانە سپورت باسقارماسىنىڭ حابارلاۋىنشا، دوپتى حوككەي وليمپيادالىق سپورت تۇرلەرى تىزىمىنە كىرمەگەن. سول سەبەپتى باسىم باعىتتاعى سپورت ءتۇرى بولىپ ەسەپتەلمەيدى.

— دەگەنمەن 2025 جىلى وبلىستىق بيۋدجەتتەن 61 ملن تەڭگە ءبولىندى. سونداي-اق قوسىمشا ءىسساپار شىعىندارىنا 27 ملن تەڭگە بەرىلدى. سوڭعى ماۋسىمدا كوماندا رەسەيدىڭ كەمەروۆو قالاسىندا وتكىزىلگەن فينالدىق تۋرنيرگە قاتىسىپ، وندا 9-ورىنعا يە بولدى. بۇكىلرەسەيلىك جارىستاعى سوڭعى ناتيجەلەرىن ەسكەرە وتىرىپ، قارجى جاڭا ماۋسىمدا تەك قازاقستان اۋماعىندا وتكىزىلەتىن چەمپيوناتتارعا قاتىسۋعا قاراستىرىلادى. سونىمەن قاتار دوپتى حوككەيدەن سپورتشىلار مەن باپكەرلەردى شەتەلگە ىسساپارعا جىبەرۋ ءۇشىن جەكە ينۆەستورلاردى تارتۋ ماقساتىندا «قپو ب.ۆ.»، «جايىقمۇناي» سياقتى ءىرى كومپانيالارعا ءوتىنىشحات جىبەرىلدى، — دەلىنگەن حابارلامادا.

«اقجايىق» دوپتى حوككەي كلۋبىنىڭ باس جاتتىقتىرۋشىسى نيكولاي شاۆالدين كومانداعا قارجى بولىنبەگەنىن راستادى.

ىرگەسى قالانعانىنا الداعى جىلى جارتى عاسىر تولاتىن «اقجايىق» دوپتى حوككەيدەن قازاقستانداعى جالعىز كاسىبي كلۋب بولىپ ەسەپتەلەدى.