SportPress.kz Qazaqstan sport jańalyqtary
Dopty hokkeıden joǵary lıga komandalary arasynda búkilreseılik jarysqa qatysyp júrgen Oraldyń «Aqjaıyǵy» jańa maýsymda chempıonattan tys qaldy, dep habarlady Kazinform agenttigi.
BQO dene shynyqtyrý jáne sport basqarmasynyń habarlaýynsha, dopty hokkeı olımpıadalyq sport túrleri tizimine kirmegen. Sol sebepti basym baǵyttaǵy sport túri bolyp eseptelmeıdi.
— Degenmen 2025 jyly oblystyq bıýdjetten 61 mln teńge bólindi. Sondaı-aq qosymsha issapar shyǵyndaryna 27 mln teńge berildi. Sońǵy maýsymda komanda Reseıdiń Kemerovo qalasynda ótkizilgen fınaldyq týrnırge qatysyp, onda 9-orynǵa ıe boldy. Búkilreseılik jarystaǵy sońǵy nátıjelerin eskere otyryp, qarjy jańa maýsymda tek Qazaqstan aýmaǵynda ótkiziletin chempıonattarǵa qatysýǵa qarastyrylady. Sonymen qatar dopty hokkeıden sportshylar men bapkerlerdi shetelge issaparǵa jiberý úshin jeke ınvestorlardy tartý maqsatynda «QPO b.v.», «Jaıyqmunaı» sııaqty iri kompanııalarǵa ótinishhat jiberildi, — delingen habarlamada.
«Aqjaıyq» dopty hokkeı klýbynyń bas jattyqtyrýshysy Nıkolaı Shavaldın komandaǵa qarjy bólinbegenin rastady.
Irgesi qalanǵanyna aldaǵy jyly jarty ǵasyr tolatyn «Aqjaıyq» dopty hokkeıden Qazaqstandaǵy jalǵyz kásibı klýb bolyp esepteledi.
