قۇرلىقتا قازاق كۇرەسىنىڭ قاتارى كوبەيدى

نيدەرلاندى كورولدىگىندە قازاق كۇرەسىنەن ەۋرازيا كۋبوگى ءۇشىن كوماندالىق جەكپە-جەكتەر ءوتتى. ەۋروپا مەن ازيانىڭ كىللى مىقتىلارىن جيناعان بۇل جارىستى دۇنيەجۇزىلىك قازاق كۇرەسى فەدەارتسياسى، بىرىككەن كۇرەس وداعىمەن (UWW)  بىرىگىپ ۇيىمداستىردى. قاتىسۋشى كوماندالار ەكى توپقا ءبولىنىپ ونەر كورسەتتى. ايتالىق، ەۋروپا ايماعىنان  گوللانديا، بەلارۋس، گەرمانيا مەن گرۋزيا ەلدەرىنىڭ پالۋاندارى كۇش سىناسسا،  ازيادان موڭعوليا، قىرعىزستان، وزبەكستان مەن قازاقستاننىڭ تاڭداۋلى سپورتشىلارى بوزكىلەمدە  تارتىستى بەلدەسۋلەر وتكىزدى.

جارىستا اۋەلى وتانداستارىمىز قىرعىزستان مەن وزبەكستان كوماندالارىنىڭ جىگىتتەرىن جەڭىپ، موڭعوليامەن كەزدەستى. بىراق، پالۋاندارىمىز موڭعولداردان ايلاسىن اسىرا المادى. ال، قازاقستان قۇراماسى ءۇشىنشى ورىن ءۇشىن بەلدەسۋدە  نامىستى قولدان بەرمەي، نيدەرلاندى سپورتشىلارىن باسىمدىلىقپەن جەڭىپ، ەۋرازيا كۋبوگىنىڭ قولا جۇلدەگەرى اتاندى.

فينال موڭعوليا مەن گرۋزيا كوماندالارى اراسىندا ءوتتى. گرۋزيا  قۇراماسىنىڭ پالۋاندارى اراسىندا سامبودان الەم چەمپيوندارى مەن ەۋروپا بىرىنشىلىكتەرىندە توپجارعان مارقاسقا سپورتشىلاردىڭ قاتارى كوپ ەدى. موڭعولدار دا وسال ەمەس ەكەنىن كورسەتە ءبىلدى. موڭعوليا قۇراماسى بۇل جارىسقا ءوز ەلدەرىندە  ەسىمدەرى قالىڭ جۇرتقا تانىلعان بىلەكتى دە جۇرەكتى جىگىتتەرىن ساراپتاپ الىپ كەلىپتى. دەگەنمەن دە تاۋ حالقىنىڭ وكىلدەرى شەبەرلىكتەرى الدەقايدا جوعارى ەكەنىن تاماشا كورسەتىپ، باس جۇلدەگە تىگىلگەن قوماقتى سىياقى مەن  ەۆرازيا كۋبوگىن جەڭىپ الدى. ءبىر ايتا كەتەر ماسەلە، دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى يسلام الماقان ۇلى ابىشەۆتىڭ: «قازاق كۇرەسىن الەمگە تاراتىپ، ناسيحاتىن كۇشەيتۋ ءۇشىن وزگە ەلدەردىڭ پالۋاندارى جەڭىس بيىگىنەن ءجيى كورىنۋى كەرەك. ويتكەنى، ولار ءوز ەلىنە جەڭىسپەن جەلپىنە ورالىپ قانا قويماي، اقپارات قۇرالدارىنان جەڭىسىمەن بىرگە قازاق كۇرەسىن دارىپتەيتىن بولادى. سوندىقتان دا قازاق كۇرەسىن الەم ساحناسىنا شىعارۋدىڭ ەڭ ءبىر ءتيىمدى جولى، وزگە ەلدەردىڭ سپورتشىلارىنىڭ جەڭىسكە جەتىپ وتىرۋى، ءبىزدىڭ قازاق كۇرەسىنىڭ بولاشاعى ءۇشىن ماڭىزى زور دەپ بىلەمىن»، – دەگەن ەدى.

راسىمەن دە، ءبىز قاشانعا دەيىن باس جۇلدەلەردى ءوز جامباسىمىزعا باسىپ الىپ قالا بەرەمىز؟! قازاق كۇرەسىن الەمگە تانىتىپ، ولاردىڭ  ۇلتتىق كۇرەسىمىزگە قىزىعۋشىلىعى ارتىپ، بەلسەنە اينالىسۋى ءۇشىن قوناقتارعا جۇلدەنى اياماي تاراتۋدى قولعا العانىمىز دۇرىس بولار. دۇنيەجۇزىلىك قازاق كۇرەسى فەدەراتسياسىنىڭ ءبىرىنشى ۆيتسە-پرەزيدەنتى سەرىك ادام ۇلى تۇكەەۆتىڭ دە كوپ جىلدان بەرى العا قويعان ماقساتتارىنىڭ ءبىرى دە سول، الىستان ات ارتىپ جەتكەن  شەتەلدىك پالۋانداردىڭ  جۇلدەلى بولىپ ەلىنە  قايتۋى. مىسالى، مەن  قازاق كۇرەسىنەن 7 الەم چەمپيوناتى، 11  ازيا چەمپيوناتى، 4 الەم كۋبوگى، 5 ەۋروپا، 2 رەت پان-امەريكا مەن افريكا چەمپيوناتتارىنىڭ دۇبىرىلەتە  وتكەنىنىڭ كۋاسى بولىپ كەلەمىن. تالاي رەت سەرىك ادام ۇلىنىڭ تورەشىلەر القاسىمەن جارىس الدىندا وتكىزەتىن وتىرىستا ارقاشاندا جەكپە-جەك بارىسىندا ەكى پالۋان تەڭدەي ونەر كورسەتسە شەتەلدىڭ وكىلىنە جەڭىستى اياماي بەرگەن ءجون ەكەنىن باسا ايتاتىن. سوندىقتان دا مۇحيت اسىپ، قۇس ۇشسا قاناتى تالاتىن جەردەن قازاق كۇرەسى ءۇشىن كۇرەسۋگە  شىن ىنتاسىمەن جەتكەن قوناققا قۇرمەتپەن قاراعانىمىز ءلازىم. سونىمەن بىرگە، تاعى ءبىر ۇتاتىنىمىز  شەتەلدىكتەر ءبىزدىڭ كۇرەستەگى ەرەجەلەردى انا تىلىمىزدە ايتىلاتىن «باستا»، «توقتا»، «تازا»، «جارتىلاي»، «جامباس» دەگەن تىركەستەردى جاتتاپ ۇيرەنە باستادى.

الامان جارىس اياقتالعان كەزدە بىرىككەن كۇرەس وداعىنىڭ (UWW) باسۇيلەستىرۋشىسى ەدمار ابۋللاەۆ مۇنداي جاقسى ۇيىمداستىرىلعان جارىس گوللانديا ەلىندە العاش رەت بولعانىن ايتتى ىلگەرىدە ەشقاشان دا جەكپە-جەك تۇرلەرىنەن وليمپيادالىق سپورت تۇرلەرى بىلاي تۇرسىن الەمدىك جانە حالىقارالىق دەڭگەيدەگى بايراقتى جارىستار نيدەرلاندى مەملەكەتىندە وتكەنىن ەستىمەگەن ەكەن. سوندىقتان دۇنيەجۇزىلىك قازاق كۇرەسى فەدەراتسياسى بىرىككەن كۇرەس وداعىمەن (UWW) بىرىگىپ قىزعالداقتار ەلىندە  ءساتتى وتكىزگەن بۇل جارىستىڭ باعاسى وتە زور ەكەنىنە توقتالا كەتتى. وسىنىڭ ءوزى قازاق كۇرەسى  ءۇشىن ۇلكەن ءبىر جەتىستىك دەپ ايتۋعا بولادى. عاسىرلار بويى ۇرپاقتان-ۇرپاققا جالعاسىپ كەلە جاتقان قاسيەتتى دە كيەلى ۇلتتىق كۇرەسىمىزدىڭ كەمەلىنە كەلىپ، الەمگە شىعاتىن ۋاقىتى جەتتى. كەلەر جىلى كورەيادا ەكى جىلدا ءبىر كەلەتىن دۇنيەجۇزىلىك جەكپە-جەك ويىندارىنىڭ باعدارلاماسىنا قازاق كۇرەسىنىڭ  كىرگەنى تۋرالى سەرىك ادام ۇلى  قۋانا سۇيىنشىلەپ ايتتى.  بۇل حابار  وسى ەۋرازيا كۋبوگى ءوتىپ جاتقان كەزدە جەتسە كەرەك. ەندەشە ەسىكتەن كىرگەلى وتىرعان 2019 جىلى دۇنيەجۇزىلىك قازاق كۇرەسى فەدەراتسياسى بىرىككەن كۇرەس وداعىمەن (UWW) بىرىگىپ وتكىزەتىن الامان جارىستاردىڭ قاتارى كوپتەپ بولعالى تۇر. سوندىقتان دا قازاق كۇرەسى ءۇشىن كەلەر جىل قۇتتى بولعاي دەپ تىلەيىك.

اقىن ورداباي ۇلى،

الماتى