Атырау облысында спортты өрге сүйрегендер марапатталды

Атырау облысының әкімі Нұрлан Ноғаев өткен жылды қорытындылап, жаңа жылға жоспар түзген келелі кеңес, алқалы мәжіліс өткізіп, облыстың спортын өрге тартып жүрген бірқатар азаматтарды марапаттады.

Спортшылар балына жиналған көпшілік алдында өңір басшысы  Атырау өлкесінде спорттың дамуына серпін беріп, қолдау көрсетіп, демеушілік танытып жүрген атымтай-жомарт азаматтарға алғысын білдіріп, халық атынан арнайы төсбелгілермен марапаттады. Бұқаралық спорттың өрісі кеңуіне, шалғайдағы ауыл, аудандарда спорт нысандарының салынуына да ерен еңбегін сіңіріп, қаржысын құйған кәсіпкерлер де марапатқа кенеліп, ықыласқа бөленді.

Ит жылында Атырау облысының спортшылары әлемдік додаларда олжа салды, ел ішіндегі маңызды бәсекелерде жүлдесіз қайтқан жоқ. Өткен жылы Тәуелсіздік мерекесі қарсаңында Атырауда аралас жекпе-жектен M-1 Challenge  халықаралық турнир ұйымдастырылды. Атырау облыстық денешынықтыру және спорт басқармасының қолдауымен өткізілген «Challenge Battle in Atyrau» турнирі әлемнің 100 мемлекетіне тікелей эфирде көрсетілді. Атырау облысының атымтай-жомарт азаматтарының  қолға алып, мұрындық болуымен өткен  М-1 Global сайысы қазақ жерінде алғаш рет ұйымдастырылды.

Осындай  айтулы додаларды өткізу, ұйымдастыру шаруасына шаш-етектен көмегін көрсетіп жүрген жандар қандай құрметке де лайық. Елдің ықыласы мен халықтың марапатына бөленіп, құрметке ие болған қайраткерлердің бірі де бірегейі  – Ерлан Хисметұлы Табылдиев. Облыс әкімі белгілі кәсіпкер, мырзалығы мол меценат Ерлан Хисметұлының кеудесіне «Денешынықтыру мен спортты дамытуға қосқан үлесі үшін» төсбелгісін тағып, алғысын білдірді.

Қуаныш НҰРДАНБЕК,

АЛМАТЫ