Qazaq jýrnalısi Baku Media Open-2026 týrnıriniń jeńimpazy atandy

Baký qalasynda Ázerbaıjan Respýblıkasy Jastar jáne sport mınıstrliginiń uıymdastyrýymen buqaralyq aqparat quraldary ókilderi arasynda ústel tennısinen halyqaralyq Baku Media Open-2026 týrnıri boldy.

Oǵan Ázerbaıjan, Qazaqstan, Túrkııa men Grýzııadan 50-ge jýyq tanymal BAQ ókilderi qatysty, dep habarlady SportPress.kz.

Qazaqstan atynan belgili sport jýrnalısi, Beksports.kz portalynyń bas redaktory Bek Tóleýov, «Qazaqstan tarıhy» portalynyń jetekshisi Altynbek Qumyrzaq pen telejýrnalıst Qyrmyzy Jandos el namysyn qorǵady.

Týrnırdiń qorytyndysy boıynsha áıelder arasyndaǵy jarysta otandasymyz Qyrmyzy Jandos qarsylastaryna esh múmkindik bermeı, jeńimpaz atandy. Ol týrnırde alty oıyn oınap, sonyń bárinde aıqyn jeńiske jetip, altyn medaldi jeńip aldy.

-Bul men úshin erekshe áserge toly jarys boldy. Halyqaralyq týrnırde elimizdiń namysyn qorǵap, Qazaqstannyń ánuranyn shyrqatý – úlken mártebe. Qarsylastardyń barlyǵy tájirıbeli ári myqty boldy. Sondyqtan ár oıynǵa barynsha jaýapkershilikpen daıyndaldym. Osyndaı deńgeıdegi jarysty uıymdastyrǵan Ázerbaıjan Respýblıkasy Jastar jáne sport mınıstrligine alǵysymdy bildiremin. Bul jeńis – tek meniń ǵana emes, Qazaqstan jýrnalısteriniń ortaq jetistigi dep bilemin, — dedi týrnırdiń jeńimpazy Qyrmyzy Jandos.

Qazaqstan jýrnalısteriniń halyqaralyq dodadaǵy jeńisi elimizdegi buqaralyq aqparat quraldary ókilderiniń kásibı qyzmetpen qatar sportty serik etip, salaýatty ómir saltyn nasıhattaýǵa qosyp júrgen úlesiniń jarqyn kórinisi boldy.