وليمپيادا مەن پاراليمپيادانىڭ ەمبلەمالارى تانىستىرىلدى

2032 جىلى اۋستراليانىڭ بريسبەن قالاسىندا وتەتىن وليمپيادا جانە پاراليمپيادا ويىندارىنىڭ رەسمي ەمبلەمالارى تانىستىرىلدى. ەمبلەمالاردان ەلدىڭ تابيعاتى مەن مادەنيەتىنە ءتان ەرەكشەلىكتەردى كورۋگە بولادى.

ۇلتتىق وليمپيادا كوميتەتىنىڭ مالىمەتىنە قاراعاندا، ەمبلەمالاردىڭ باستى بەينەسى — اۋستراليادا مەكەندەيتىن كاكادۋدىڭ ەكى ءتۇرى. وليمپيادانىڭ سيمۆولى رەتىندە قىزعىلت كاكادۋ، ال پاراليمپيادانىڭ سيمۆولى رەتىندە سارى ايدارلى كاكادۋ تاڭدالعان.

«ديزايندا باسقا دا نىشاندار كورىنىس تاپقان. قۇستاردىڭ ايدارلارىنان كۆينسلەند شتاتىنىڭ سۇلباسىن بايقاۋعا بولادى. ال وليمپيادا جانە پاراليمپيادا الاۋى بىرلىك، ءۇمىت پەن شابىتتى بىلدىرەدى. ءۇش جانە ەكى قاۋىرسىننىڭ ورنالاسۋى اۋستراليانىڭ جازعى وليمپيادا ويىندارىن تاريحتا ءۇشىنشى رەت قابىلدايتىنىن مەڭزەيدى. بۇل ويىندار 2032 جىلى وتەدى.

كاكادۋ بەينەسى اۋستراليانىڭ بايىرعى حالىقتارى ءۇشىن دە ەرەكشە مانگە يە. ولاردىڭ مادەنيەتىندە بۇل قۇستار جەرمەن جانە داستۇرمەن تىعىز بايلانىستى. سونداي-اق ولار ادامداردى بەلگىلى ءبىر جەرلەرمەن، تاريحپەن جانە ءجون-جورالعىلارىمەن بايلانىستىراتىن حابارشى رەتىندە سانالادى»، دەلىنگەن ماتەريالدا.

ەكى ەمبلەمادا دا ارنايى ازىرلەنگەن قارىپپەن جازىلعان «Brisbane 2032» دەگەن جازۋ بار. وليمپيادا ەمبلەماسىندا بەس ساقينا، ال پاراليمپيادا ەمبلەماسىندا اگيتوس بەلگىسى بەينەلەنگەن.

جاڭا نىشاندار كۆينسلەندتىڭ ءار وڭىرىندە بىرتىندەپ تانىستىرىلدى. ديزايننىڭ التى بولىگى سول ايماقتىڭ بەس جەرىندە، اتاپ ايتقاندا، ۇلكەن توسقاۋىل ريفىندە، كاسل-حيللدە، روكگەمپتون جاعالاۋىندا، ۋايلدحورس تاۋىندا جانە كاررامبين جاعاجايىندا كوپشىلىك نازارىنا ۇسىنىلدى.

كەيىن بارلىق ەلەمەنت بىرىكتىرىلىپ، ەكى تولىققاندى ەمبلەما جاسالدى. ولار العاش رەت بريسبەننىڭ ساۋت-بەنك اۋدانىندا كوپشىلىككە كورسەتىلدى.

كوركەمدىك تۇجىرىمدامانى «بريسبەن-2032» ۇيىمداستىرۋ كوميتەتىنىڭ جەتەكشىلىگىمەن جەرگىلىكتى جانە حالىقارالىق شىعارماشىلىق اگەنتتىكتەردەن قۇرالعان توپ ازىرلەدى.

تانىستىرىلعان ەمبلەمالار الداعى ويىنداردىڭ بەزەندىرىلۋىندە كەڭىنەن قولدانىلاتىن بولادى. ال وليمپيادا مەن پاراليمپيادا ويىندارىنىڭ تۇمارى نەمەسە تۇمارلارى كەيىنىرەك تانىستىرىلادى.

بريسبەندەگى جازعى وليمپيادا ويىندارى 2032 جىلى 23 شىلدە مەن 8 تامىز ارالىعىندا، ال پاراليمپيادا ويىندارى 24 تامىز بەن 5 قىركۇيەك ارالىعىندا وتەدى.

2032 جىلى بولاتىن وليمپيادا جانە پاراليمپيادا ويىندارى قىر استىندا تۇر. ەرتەڭ كوزدى اشىپ، جۇمعانشا ۋاقىت تا وتە شىعادى. سوندىقتان ەلىمىزگە ءتورت جىلدا ءبىر اينالىپ كەلەتىن ءدۇبىرلى دودالارعا دايىندىقتى قازىردەن باستاۋ كەرەك. وسى جاعىنان العاندا تۋريزم جانە سپورت مينيسترلىگىنىڭ وتانداستارىمىزدى جارىسقا دايىنداۋ ماقساتىندا رەفورما جاساپ جاتقانى قۋانتادى.

بۇگىن مينيسترلىك جۇرتشىلىقتى وسى رەفورمالاردان تۋرالى تاعى دا حاباردار ەتتى. وندا ەلىمىزدە جاتتىقتىرۋشى مەن سپورتشىنىڭ جالاقىسى كوبەيەتىنى بەلگىلى بولدى.

داستان كەنجالين،

استانا