Olımpıada men Paralımpıadanyń emblemalary tanystyryldy

2032 jyly Aýstralııanyń Brısben qalasynda ótetin Olımpıada jáne Paralımpıada oıyndarynyń resmı emblemalary tanystyryldy. Emblemalardan eldiń tabıǵaty men mádenıetine tán erekshelikterdi kórýge bolady.

Ulttyq Olımpıada komıtetiniń málimetine qaraǵanda, emblemalardyń basty beınesi — Aýstralııada mekendeıtin kakadýdyń eki túri. Olımpıadanyń sımvoly retinde qyzǵylt kakadý, al Paralımpıadanyń sımvoly retinde sary aıdarly kakadý tańdalǵan.

«Dızaında basqa da nyshandar kórinis tapqan. Qustardyń aıdarlarynan Kvınslend shtatynyń sulbasyn baıqaýǵa bolady. Al Olımpıada jáne Paralımpıada alaýy birlik, úmit pen shabytty bildiredi. Úsh jáne eki qaýyrsynnyń ornalasýy Aýstralııanyń jazǵy Olımpıada oıyndaryn tarıhta úshinshi ret qabyldaıtynyn meńzeıdi. Bul oıyndar 2032 jyly ótedi.

Kakadý beınesi Aýstralııanyń baıyrǵy halyqtary úshin de erekshe mánge ıe. Olardyń mádenıetinde bul qustar jermen jáne dástúrmen tyǵyz baılanysty. Sondaı-aq olar adamdardy belgili bir jerlermen, tarıhpen jáne jón-joralǵylarymen baılanystyratyn habarshy retinde sanalady», delingen materıalda.

Eki emblemada da arnaıy ázirlengen qarippen jazylǵan «Brisbane 2032» degen jazý bar. Olımpıada emblemasynda bes saqına, al Paralımpıada emblemasynda agıtos belgisi beınelengen.

Jańa nyshandar Kvınslendtiń ár óńirinde birtindep tanystyryldy. Dızaınnyń alty bóligi sol aımaqtyń bes jerinde, atap aıtqanda, Úlken tosqaýyl rıfinde, Kasl-Hıllde, Rokgempton jaǵalaýynda, Ýaıldhors taýynda jáne Karrambın jaǵajaıynda kópshilik nazaryna usynyldy.

Keıin barlyq element biriktirilip, eki tolyqqandy emblema jasaldy. Olar alǵash ret Brısbenniń Saýt-Benk aýdanynda kópshilikke kórsetildi.

Kórkemdik tujyrymdamany «Brısben-2032» Uıymdastyrý komıtetiniń jetekshiligimen jergilikti jáne halyqaralyq shyǵarmashylyq agenttikterden quralǵan top ázirledi.

Tanystyrylǵan emblemalar aldaǵy Oıyndardyń bezendirilýinde keńinen qoldanylatyn bolady. Al Olımpıada men Paralımpıada oıyndarynyń tumary nemese tumarlary keıinirek tanystyrylady.

Brısbendegi jazǵy Olımpıada oıyndary 2032 jyly 23 shilde men 8 tamyz aralyǵynda, al Paralımpıada oıyndary 24 tamyz ben 5 qyrkúıek aralyǵynda ótedi.

2032 jyly bolatyn Olımpıada jáne Paralımpıada oıyndary qyr astynda tur. Erteń kózdi ashyp, jumǵansha ýaqyt ta óte shyǵady. Sondyqtan elimizge tórt jylda bir aınalyp keletin dúbirli dodalarǵa daıyndyqty qazirden bastaý kerek. Osy jaǵynan alǵanda Týrızm jáne sport mınıstrliginiń otandastarymyzdy jarysqa daıyndaý maqsatynda reforma jasap jatqany qýantady.

Búgin mınıstrlik jurtshylyqty osy reformalardan týraly taǵy da habardar etti. Onda elimizde jattyqtyrýshy men sportshynyń jalaqysy kóbeıetini belgili boldy.

Dastan KENJALIN,

ASTANA