ەلگە ورالعان قانداس باۋىرلارعا ۇندەۋ

9 ماۋسىم كۇنى قازاقستان رەسپۋبليكاسى پرەزيدەنتتىگىنە وتەتىن سايلاۋدى  ۇلتىمىزدىڭ تاعدىرىن شەشەتىن، ەلىمىزدەگى تۇراقتىلىقتى ساقتاپ، مەملەكەتىمىزدىڭ باعىت-باعدارىن، دامۋ جولىن ودان ءارى جالعاستىرۋ ءۇشىن جاسالعان ۇلكەن ساياسي وقيعا دەپ بىلەمىن.

ەلىمىز كەڭەس وداعىنان ءبولىنىپ شىعىپ، ءوزىنىڭ ىرگە تاسىن قالاپ، ەگەمەندىگىن العان سوڭ، قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆ كۇللى الەمگە تارىداي شاشىلعان قانداستارىمىزدىڭ وتانعا ورالۋىنا ۇندەۋ تاستادى. سول كەزدەن باستاپ شارتاراپقا  شاشىلىپ كەتكەن اعايىن وزەنگە قۇيىلعان تاراۋ-تاراۋ بۇلاقتاي وزدەرىنىڭ تاريحي وتانىنا اعىلا باستادى. بۇگىنگى تاڭدا 1 ميلليوننان اسا قانداسىمىز ەلگە ورالىپ، ەلىمىزدىڭ وقۋ-اعارتۋ، الەۋمەتتىك-ەكونوميكالىق، اۋىلشارۋاشىلىق، مادەني-رۋحاني دامۋىنا ءوز ۇلەسىن قوسۋدا.

مەن ءوزىمدى باقىتتى سەزىنەمىن. ويتكەنى، 1995 جىلى قحر قۇلجا قالاسىنان ىلە-قازاق اۆتونوميالى وبلىسى اكىمىنىڭ كومەكشىسى مىندەتىن اتقارىپ جۇرسەم دە، تاريحي وتانىما ويلانباي، ەكىلەنبەي بىردەن ورالدىم. سول كۇننەن باستاپ قازاقستاننىڭ ءاربىر قادامىمەن تەڭ تاعدىرلاس بولدىم. كوز الدىمدا جاس مەملەكەت كوركەيىپ، گۇلدەندى، ەكونوميكا جان-جاقتى دامىدى. ارينە، باس كەزىندە ءتىل، سالت-سانادا بەلگىلى دارەجەدە قيىنشىلىقتار بولدى. بىراق، «كوپپەن كورگەن ۇلى توي» دەمەكشى، قانداي قيىندىق بولسا دا، ءبارىن جەڭە بىلدىك، ءبارى وتە شىقتى، ءبارى دە ۇمىت بولدى. وسى ۋاقىتتا قازاقستان جەر-جۇزىنە ءوزىن دەموكراتيالىق، زايىرلى، قۇقىقتىق ەل رەتىندە تانىتتى. ال ءبىزدىڭ بالالارىمىز بىردەن ءسىڭىسىپ كەتتى. قازىر ولار دۇنيەنىڭ قاي بۇرىشىنا بارسا دا، كەۋدەلەرىن كوتەرىپ، ماقتانىش سەزىممەن جۇرەدى. ويتكەنى تولقۇجاتتارىندا «قازاقستان ازاماتى» دەگەن اتا-بابالارىمىزدان قالعان كيەلى جەردىڭ اتى جازىلعان.

مەملەكەتتىڭ تاعدىرىن، ۇلتىمىزدىڭ بولاشاعىن ويلايتىن، ءاربىر قازاقستان ازاماتى ءۇشىن وسىنداي ۇلكەن ساياسي دودادا مايدان ايقىن بولىپ، كوزقاراسى قىراعىلىقپەن ءوز پرەزيدەنتىن تاڭداۋ ابزال.

اعىلشىن جانە قىتاي تىلدەرىن ەركىن مەڭگەرگەن، باسشىلىق لاۋازىمداردا قىزمەت ەتىپ، مول تاجىريبە جيناعان، ۇلتتىڭ قامىن ويلايتىن، ەلىن، جەرىن سۇيەتىن قاسىم-جومارت كەمەل ۇلى توقاەۆتىڭ كانديداتۋراسىن قولداپ، پرەزيدەنتكە ۇسىنۋ ءبىزدىڭ بارلىق شەتەلدەن كەلگەن قانداس باۋىرلاردىڭ ورتاق تالعامى بولسىن دەپ ۇندەۋ جاريالايمىن.

قاسىم-جومارت كەمەل ۇلى توقاەۆ بەلگىلى ديپلومات، سارابدال ساياساتشى. ماسكەۋ مەملەكەتتىك حالىقارالىق قاتىناستار ينستيتۋتىن، رف سىرتقى ىستەر مينيسترلىگىنىڭ ديپلوماتيالىق اكادەمياسىن بىتىرگەن. بەيجىڭ لينگۆيستيكالىق ينستيتۋتىندا ءبىر جىلدىق تاعلىمدامادان وتكەن. حالىقارالىق دارەجەدەگى ديپلوماتتار ا.ا. گرومىكومەن، ە.ا. شەۆاردنادزەمەن قىزمەتتەس بولدى. كسرو سىرتقى ىستەر مينيسترلىگىنىڭ ورتالىق اپپاراتىندا، كسرو-نىڭ سينگاپۋر مەن قىتايداعى ەلشىلىكتەرىندە قىزمەت ەتتى.

تاۋەلسىزدىك العان سوڭ قازاقستان رەسپۋبليكاسىنىڭ سىرتقى ىستەر ءمينيسترى، قر پرەمەر-ءمينيسترىنىڭ ورىنباسارى – سىرتقى ىستەر ءمينيسترى، قر پرەمەر-ءمينيسترى، قر مەملەكەتتىك حاتشىسى – سىرتقى ىستەر ءمينيسترى، بۇۇ باس حاتشىسىنىڭ ورىنباسارى، بۇۇ-نىڭ جەنەۆاداعى بولىمشەسىنىڭ باس ديرەكتورى، بۇۇ-نىڭ قارۋسىزدانۋ جونىندەگى جەنەۆاداعى باس حاتشىسى قىزمەتىن اتقاردى. ول بۇۇ-نىڭ جەنەۆاداعى بولىمشەسىنىڭ باس ديرەكتورى قىزمەتىنە تاعايىندالعان ازيادان شىققان العاشقى وكىل بولدى. 2013 جىلى 16 قازاندا قر پارلامەنتى سەناتىنىڭ توراعاسى بولىپ سايلاندى.

قۇرمەتتى وتانداستار!

كۇللى الەمدە گەوساياسات شيەلەنىسىپ، ۇلتتار مەن دىندەر اراسىنداعى قاقتىعىستار تولاستاماي وتىرعان ءىرى مەملەكەتتەردىڭ كۇش-كورسەتىپ، ازدار مەن السىزدەردى جايپاپ وتۋگە دايىن تۇرعان بۇگىنگى تاڭدا ەلىمىزدە كەمەلدى دە ىسكەر، ديپلوماتتىق عىلىمدى تولىق يگەرگەن قاسىم-جومارت كەمەل ۇلى توقاەۆ اعامىزعا ءبىر كىسىدەي داۋىس بەرۋگە شاقىرامىن.

سەرىك كەنەنباي،

دۇنيەجۇزىلىك قازاق كۇرەسى

فەدەراتسياسىنىڭ ۆيتسە-پرەزيدەنتى،

قازاق كۇرەسىنەن ازيا

فەدەراتسياسىنىڭ پرەزيدەنتى،

قازاقستان-قىتاي ەكونوميكالىق

دامۋ ورتالىعىنىڭ پرەزيدەنتى