SportPress.kz Qazaqstan sport jańalyqtary
Bokstan halyqaralyq dárejedegi sport sheberi, Azııa, álem chempıony Mereı Aqshalov pen kıkboksıngtan Qazaqstan Respýblıkasyna eńbek sińirgen sport sheberi, álemniń eki dúrkin chempıony Nurbolat Rysmaǵambetov Semeı sport akademııasynyń oqýshylarymen júzdesti, dep habarlady Semeı sport akademııasynyń baspasóz qyzmeti.
Oqýshylar chempıondarǵa saýaldaryn qoıyp, kezdesý emen-jarqyn áńgimemen órbidi. Ásirese, jerlesimiz Mereıge qyzyqty suraqtar kóp qoıyldy. Onyń boksqa kelýi, jeńisi pen jeńilisi qatar júrgen sporttyq mansabynan bastap Beıjińdegi sátsizdik, Almaty qalasyndaǵy álem chempıonatyndaǵy fınal, «Astana arlandaryndaǵy» aıyrmashylyq jaıy jan-jaqty aıtyldy. Áńgime aýany qazaq sportynyń búgini, erteńi, damýyna aýǵanda Mereı de, Nurbolat sportshylarǵa barlyq jaǵdaıdyń jasalyp jatqanyn aıryqsha atap ótti.
–Bizdiń sportshylarǵa qazir álemniń kez-kelgen jerinde ótetin jarysqa barýǵa múmkindik bar. Oǵan memleket jaǵdaı jasap otyr. Jyl saıyn sport mektepteriniń materıaldyq-bazalary jańaryp keledi. Oǵan búgin kezdesý ótip otyrǵan Semeı sport akademııasy dálel ekenin basa aıtqym keledi. Jeńiske jetýdiń bir joly ǵana bar. Janyńdy salyp jattyǵý jasap, baryńdy salyp óner kórsetý,– deıdi Mereı Aqshalov.
Kezdesýden keıin Semeı sport akademııasynyń dırektory Mereı Kóshkinov sport ustahanasynyń jumysymen tanystyra júrip, 200 balaǵa arnalǵan jataqhanany, kúres zaldaryn, zamanaýı medıınalyq quraldar men jabdyqtardy kórsetti. Bapkerler biliktiligi, oqýshylardyń jattyǵýy jaıynda da Mereı Qoıshybekuly tushymdy pikir aıtty.
