ورلوۆتان ون جىل بۇرىن ايتقان ەدىم!!!

رەسەيلىك كاسىپقوي بوكسشى ماكسيم داداشەۆتىڭ كەزەكتى شايقاس بىتكەن ساتتە ءولىپ كەتۋى الەمدى تاعى دۇرلىكتىردى. ارادا ەكى-ءۇش كۇن وتكەندە تاعى ءبىر شەت ەلدىك كاسىپقوي بوكسشى شارشى الاڭدا قازا بولدى. بۇگىندە مۇنداي مىسالدار از ەمەس. مىنا سپورت شولۋشىسى كۇلە وتىرىپ ايتقان قورىتىندىنى مەن مۇنان ون جىل بۇرىن جالىنىپ وتىرىپ ايتقان ەدىم! كاسىپقوي بوكستى توقتاتىڭدار دەي المايمىن. تەك بۇل سپورت تۇرىنە تەرەڭ مەديتسينالىق باقىلاۋ مەن سول شايقاستاردى وتكىزەتىن ارنايى فەدەراتسيالاردىڭ ءجىتى قاداعالاۋى كەرەك-اق.

مەن ەرەجەسىز جەكپە-جەكتەر تۋرالى ايتقانمىن! ول جازعاندارىم ينتەرنەتتە دە، سپورت جايلى كىتاپتارىمدا دا بار. ءوز باسىم بۇل جەكپە-جەكتەردى زالدان دا،تەلە ەكراننان دا كورۋگە جۇيكەم شىدامايدى! بۇلار سپورت ەمەس — ادام ءولتىرۋ ءادىس-ايلالارىن ناسيحاتتاۋ!!! ادامنىڭ باسىنان قۇلاشتاپ ۇرۋ، سەكىرىپ تەبۋ، يەك استىنان، ماڭدايدان تىزەمەن سوعۋ، كۇرە تامىردى قاپسىرىپ بۋىندىرۋ، اياقتى، قولدى شىتىناتىپ قايىرۋ، اياقتان، ساننان، بۇتتىڭ اراسىنان تەبۋ، تاعى باسقا كورسەڭ جۇرەك قوزعالاتىن ادىستەر سپورتقا ءتان با؟! ارينە، ولاي ەمەس! ادام بالاسىنىڭ اعزاسى مىڭنىڭ، ميلليوننىڭ الدىندا قانىن سۋداي شاشىپ، تالدىرىپ ءتۇسىرىپ، «ويباي، ءولدىم!» دەپ ايتقىزۋعا جارالعان كۇل-قوقىس ەمەس قوي! بۇلاردىڭ ءبارى ادامنىڭ تويىنعاننان كەيىن بار قىزىققا قاناعاتتانباي، قان كورگىسى، ءولىم كورگىسى كەلگەن شەكتەن شىعۋى عانا! اقشا تابۋ كوزى ەكەنى دە راس. بىراق ول بەر جاعى عانا.

باستىسى — ادامزاتتىڭ تاعىعا، جىرتقىشقا اينالىپ بارا جاتقانىنا باستى دالەل! بەتى اۋلاق، بىرتە-بىرتە ادام ولتىرۋدەن جارىس وتە مە دەپ قورقامىن. كىم كوپ ادام ولتىرسە – سول چەمپيون! اينالايىن-اۋ، جەكپە-جەك كەرەك بولسا – كۇرەس، بوكس، دزيۋدو، كاراتە ،تەاكۆوندو، تاعى سول سياقتى رەسمي سپورت تۇرلەرى بار عوي! ايتپاعىم; ماعان سالسا ەرەجەسىز جەكپە-جەكتەردىڭ ءبارىن توقتاتۋ كەرەك!!! ەركەكتىكتى، جىگىتتىكتى دالەلدەۋدىڭ باسقا دا جولدارى جەتەدى!  ەمەليانەنكونى، نۇرماعانبەتوۆتى، ءوزىمىزدىڭ نازاروۆ باستاعان وسى سالادا اتتارى شىققان ازاماتتاردى بالالارعا ۇلگى-ونەگە قىلىپ، كۋمير ەتۋدىڭ تۇككە قاجەتى جوق! بۇل سويقاندى جاقسى مەڭگەرىپ العان جان ءبىر كۇنى بولماسا ءبىر كۇنى بىرەۋدى سەسپەي قاتىرادى! نەگە ولاي ىستەدىڭ دەپ ايتا المايسىڭ. ويتكەنى ول كاسىپقوي ۇرىپ جىعۋشى! ادەتتە ءبىز كاسىپقويلىقتى قوعام بوپ تا، مەملەكەت بوپ تا ماقۇلدايمىز عوي! ويپىرماي دەيمىن وسى، قازاقستان حالقى دا ەرەجەسىز جەپە-جەك كورۋگە قۇمار-اق. ءبىزدىڭ مەملەكەتكە انشىلەر مەن سپورتشىلار عانا كەرەك سەكىلدى – عىلىمداعى جەتىستىككە، اۋىل شارۋاشىلىعى سالاسىنداعى وزىق ىستەرگە، تەحنيكا، ەلەكترونيكا، تاعى باسقا دا ەرتەڭىمىز بوپ سانالاتىن سالالارداعى تالانتتىلارعا ونداي ابىروي دا،اقشا دا جوق… جارايدى،بۇگىنگى تاقىرىپ – ەرەجەسىز جەكپە-جەكتەردىڭ تامىرىنا بالتا شابۋ جايلى! مەنىڭ جالعىز داۋىسىم از بولادى. قولداساڭىزدار كوپ بولىپ وسى قارسىلىق توبىن قۇرىپ، اركىم شاماسى جەتكەن جەرگە دەيىن وسى قوزعالىستى ناسيحاتتايىق! ادام دەگەن اتىمىز بار ەمەس پە؟ ناعىز ادام سپورتتىڭ گۋماندى ءتۇرىن عانا ناسيحاتتاۋ كەرەك دەپ سانايمىن مەن.

نەسىپ جۇنىسباەۆ،

قازاقستاننىڭ ەڭبەك سىڭىرگەن قايراتكەرى