پورتۋگاليا – فۋتبول لابوراتورياسى

نەگە پورتۋگاليا؟

پورتۋگاليا فۋتبولشى دايىنداپ ساتۋدان الەمدەگى نومەرى ءبىرىنشى ەل. ەۋروپاداعى ءومىر ءسۇرۋ دەڭگەيى ارزان. وقۋ اقىسى تومەن. قازاقستان حالقىنىڭ قالتاسى كوتەرەرلىكتەي. لەگيونەرلەرگە ليميت جوق. فۋتبول مادەنيەتى قالىپتاسقان، وتە جوعارى. الەمنىڭ №1 فۋتبولشىسى دا – كريشتيانو رونالدو، الەمنىڭ №1 جاتتىقتىرۋشىسى – جوزە موۋرينو دا پورتۋگاليادان شىققان. بۇل ءبىزدىڭ بالالارعا ۇلكەن ستيمۋل بولارى انىق.

ارلاندار فك اتىنان باردىق، قازاقستاننىڭ وكىلى بولدىق. ەشقانداي جۇرەكسىنبەي فيفا، ۋەفا-نىڭ ءتيىستى ماماندارىنا، الەمنىڭ الپاۋىت فۋتبول كلۋبتارىنا تىكەلەي بايلانىسقا شىقتىم. ناتيجەسىندە، پورتۋگاليانىڭ براگا كۋبوگى تۋرنيرىنە شاقىرتۋ الدىم. «ارلاندار» اتىنان بارىپ، بۇكىل قازاقستاننىڭ اتىنان وكىل بولىپ كەتتىك.  بارلىق جاعدايدى سول جەردە ءتۇسىندىم. سەبەبى، بىلۋىمىزشە «استانادان» باسقا وسى كۇنگە دەيىن قازاقستاننان بىردە ءبىر فۋتبول كلۋبى كەلمەپتى.

العاشقى كۇندەرى قازاقستاندى بىلمەي قينالعان ەدى، سوڭىندا ءبارى قازاقستان دەپ جانكۇيەر بولدى. ەستىمەگەن ەلى بولعاندىقتان با العاشقى اشىلۋ سالتاناتىندا بىزگە بۇكىل ستاديون اياقتارىنان تىك تۇرىپ قوشەمەت كورسەتتى. ايتپەسە بىزدەن بولەك، ەۋروپا، لاتىن امەريكا ەلدەرىنەن دە كلۋبتار كەلگەن ەدى. گازەتتەرى ءار نومىرىندە باسقا ەل ەمەس تەك قازاقستاننان «ارلاندار» فك دەپ جازىپ جاتتى. حالقى دا تەك بىزگە ەرەكشە قۇرمەت كورسەتىپ، بارلىعى كەزەككە تۇرىپ سۋرەتكە ءتۇستى. كوز الدىڭىزعا ستاديوننىڭ كوپشىلىگى سىزبەن سۋرەتكە ءتۇسىپ تۇرعانىن ەلەستەتىپ كورىڭىزشى!

قازاقستاننان فۋتبول كلۋبىنىڭ قاتىسۋ ولار ءۇشىن ۇلكەن جاڭالىق بولدى. بۇل اسەرىمدى ءبىر سوزبەن ايتار بولسام، ءوزىمدى وزگە عالامشاردان كەلگەندەي سەزىندىم…

قولىمىزدان كەلگەنشە قازاقستاندى تانىتۋعا تىرىسىپ باقتىق. جابىلۋ سالتاناتىندا ستاديون ساحناسىندا «قارا جورعا» ءبيىن بيلەپ بەردىك. تريبۋنا ءبىزدى وتىرعىزبادى، قايتا بيلەتكىزدى. وزدەرى دە بيلەدى…

كلۋب باسشىلارى: كلۋب حالىقتىكى.

پورتۋگاليادا كلۋب باسشىلارىنان كوپ ەستىگەنىم – كلۋبتىڭ يەسى حالىق دەيدى. باسشىلىق وزدەرىن جاي ۇيىمداستىرۋشىلار رەتىندە سەزىنەدى. حالىقتان قاتتى قايمىعاتىنداي كورىندى. جابىلۋ سالتاناتىندا 90-نان اسا كوماندانى ساحناعا شىعارۋ ءبىراز كۇش. سودان بولار براگا اكىمى شارشاعان بولۋ كەرەك، سوڭعى 3-4 كوماندانى ساحناعا شىعارماي-اق تومەندە ماراپاتتاپ قايتارعىسى كەلگەن ەدى، ستاديون حالقى بىردەن ورەتۇرەگەلدى. ودان ادامنىڭ زارەسى قاشپاۋ مۇمكىن ەمەس. لەزدە ساحناعا شىعاردى. باسشىلارى حالىقتىڭ پىكىرىمەن ساناسقاندى ءجون كورەدى.

بالالارى دا ەركىن ويلى، اسقاق رۋحتى. وكىنىشكە وراي، قۇل بولعان مەن بولماعاننىڭ ايىرماشىلىعى قاتتى ءبىلىنىپ تۇرادى ەكەن. ءبىزدىڭ بالالار قاتتى اسەرلەندى، ۇلكەن تاجىريبە بولدى.

مەنى تاڭقالدىردى

كوپ نارسەگە تاڭ قالا قويماس ەدىم. بىراق، پورتۋگاليادا بالالار ءۇيىنىڭ بولماۋى، ابورت جاساتۋعا تىيىم سالىنعانى مەنى تاڭ قالدىردى. ارينە ودان كەيىن فۋتبولى دا ءوز اسەرىن بەرمەي قويمادى. ولار فۋتبولدى بيلەپ ءجۇرىپ وينايتىنداي كورىندى.

قازاق حالقىمەن ءبىر ۇقساستىعى – شاشۋ شاشادى ەكەن. كوماندالارى جەڭىسكە جەتسە شاشۋ شاشاتىن ءداستۇرى بار.

ناتيجە

قازاقستاننان ءبىر فۋتبول كلۋبىنىڭ كەلگەنىن ەستىگەن پورتۋگاليا كاسىبي فۋتبول كلۋبىنىڭ پرەزيدەنتى ماريو كوستا مىرزا ارنايى ليسسابوننان كەزدەسۋ ءۇشىن كەلدى. پايدالى كەلىسىمدەر بولدى. ازىرگە قۇپيا.

براگالونا فۋتبول كلۋبىمەن ارىپتەستىك مەموراندۋمىنا قول جەتكىزدىك. پورتۋگالياداعى جارىستارعا تۇراقتى تۇردە شاقىرتۋ، تاجىريبە الماسۋ، ت.ب. سياقتى بىرقاتار كەلىسىمدەر جاساستىق.

جاقىن ۋاقىتتا ءبىز ءۇشىن ۇلكەن سەنساتسيا جاڭالىقتار بولادى. جوسپارلارىمىز قۇپيا. ناتيجەسىن الداعى ۋاقىتتا كورە جاتارسىزدار. تەك كۇتىڭىزدەر دەگىم كەلەدى.

فازىلبەك ابساتتار ۇلى،
«ارلاندار» فك پرەزيدەنتى