ورتالىق ازيا ويىندارى قايتا جاندانادى

وڭتۇستىك كورەيادا ۇلتتىق وليمپيادالىق كوميتەتتەر قاۋىمداستىعىنىڭ باس اسسامبلەياسى اياسىندا ورتالىق ازيا ەلدەرى ۇلتتىق وليمپيادالىق كوميتەتتەرىنىڭ كەزەكتى سەسسياسى ءوتتى.

وعان قازاقستان، قىرعىزستان، تاجىكستان جانە وزبەكستان ۇوك وكىلدەرى قاتىسىپ، كۇن تارتىبىندەگى باستى تاقىرىپ ورتالىق ازيا ويىندارىن قايتا جاڭعىرتۋ تۋرالى ماسەلەنى تالقىلادى.

تاراپتار بىرلەسكەن سپورت باعدارلاماسىن ازىرلەۋگە، سونداي-اق الداعى ەكى جىلدا ورتالىق ازيا ويىندارىن قايتا جالعاستىرۋعا كەلىستى. ويىنداردى ۇيىمداستىرۋشى ەل مەن وتەتىن كۇنى كەيىنىرەك حابارلاناتىن بولعان.

العاشقى ورتالىق ازيا سپورتتىق ويىندارى 1995 جىلى تاشكەنتتە ءوتتى. كەيىنگىسى 1997 جىلى الماتىدا، 1999 جىلى بىشكەكتە، سوڭعىسى 2003 جىلى دۋشانبەدە ۇيىمداستىرىلدى.

ورتالىق ازيا ويىندارىنا قازاقستان، اۋعانستان، يران، قىرعىزستان، تاجىكستان، تۇركىمەنستان مەن وزبەكستان قاتىسادى دەپ جوسپارلانىپ وتىر.

داستان كەنجالين،

استانا

II ورتالىق ازيا ويىندارى. الماتى. 1997 جىل. ورتالىق ستاديون.